« ការស្ថាបនាគន្លងនៃការគិតដែលមានភាពវិជ្ជមាន ៖ ‹ ឯអ្នកណាដែលមានគំនិតជាប់តាមទ្រង់ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការស្ថាបនាគន្លងនៃការគិតដែលមានភាពវិជ្ជមាន ៖ ‹ ឯអ្នកណាដែលមានគំនិតជាប់តាមទ្រង់ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
សុខភាពខាងរាងកាយ និងខាងសតិអារម្មណ៍ ៖ មេរៀនទី ១៨៣
ការស្ថាបនាគន្លងនៃការគិតដែលមានភាពវិជ្ជមាន
« ឯអ្នកណាដែលមានគំនិតជាប់តាមទ្រង់ »
ការគិតរបស់យើងអាចប៉ះពាល់ដល់អារម្មណ៍របស់យើង និងជម្រើសដែលយើងធ្វើជារៀងរាល់ថ្ងៃ ។ ការគិតខ្លះជួយយើងធ្វើការសម្រេចចិត្តបានល្អ ខណៈពេលដែលការគិតផ្សេងទៀតអាចជះឥទ្ធិពលយ៉ាងអវិជ្ជមានដល់អារម្មណ៍ និងសកម្មភាពរបស់យើង ។ ដូចដែលព្រះវរបិតាសួគ៌ និងព្រះយេស៊ូវគ្រីស្ទជ្រាបដឹង និងយល់ពីការគិតរបស់យើង ( ទំនុកដំកើង ១៣៩:១–២ ) ការផ្តោតលើទ្រង់ទាំងទ្វេអាចជួយយើងបង្កើតគន្លងនៃការគិតដែលមានភាពវិជ្ជមាន ។ មេរៀននេះអាចជួយសិស្សឲ្យមើលទៅកាន់ព្រះអង្គសង្គ្រោះ នៅពេលពួកគេស្ថាបនាគន្លងនៃការគិតដែលមានភាពវិជ្ជមាន ។
ការរៀបចំសិស្ស ៖ សូមអញ្ជើញសិស្សឲ្យយកចិត្តទុកដាក់ចំពោះគំនិតដែលពួកគេមានពេញមួយថ្ងៃ ។ ពួកគេថែមទាំងអាចគិតពិចារណាពីរបៀបដែលគំនិតទាំងនោះធ្វើឲ្យពួកគេទទួលអារម្មណ៍ ។
សកម្មភាពរៀនសូត្រដែលអាចមាន
ឥទ្ធិពលនៃការគិតរបស់យើង
អ្នកអាចចាប់ផ្តើមថ្នាក់ដោយទុកពេលឲ្យសិស្ស៣០វិនាទីដើម្បីសរសេរការគិតមួយចំនួនដែលពួកគេមានកាលពីម្សិលមិញ ឬថ្ងៃនេះ ។
សូមពិចារណាបង្ហាញរូបភាពខាងក្រោមនេះនៅលើក្ដារខៀន ។ អ្នកអាចពន្យល់ថា ដ្យាក្រាមនេះអាចតំណាងឲ្យឥទ្ធិពលដែលគន្លងនៃការគិតរបស់យើងអាចមានចំពោះសកម្មភាព និងការរីកចម្រើនរបស់យើង ។ ប្រសិនបើយើងមិនគ្រប់គ្រងការគិតទាំងនោះតាមរបៀបដែលមានភាពវិជ្ជមានទេ នោះគន្លងនៃការគិតដែលឥតប្រយោជន៍អាចនឹងធ្វើឲ្យយើងមានអារម្មណ៍ជាប់គាំង ។ ពេលខ្លះយើងអាចសន្មតថាសមត្ថភាពរបស់យើងក្នុងការសម្រេចចិត្ត និងធ្វើសកម្មភាពមានដែលកំណត់ ។ នៅពេលដែលយើងផ្តោតលើការគិតទាំងនេះ វាអាចបណ្តាលឲ្យយើងមានអារម្មណ៍មិនល្អចំពោះខ្លួនឯង និងអ្នកដទៃ ។ គន្លងនៃការគិតដែលមានប្រយោជន៍ជួយយើងឆ្ពោះទៅមុខ ។ ការគិតទាំងនោះជួយយើងឲ្យស្គាល់សមត្ថភាពរបស់យើងក្នុងការធ្វើសកម្មភាពដោយសេចក្ដីជំនឿលើព្រះយេស៊ូវគ្រីស្ទ ។
-
តើការគិតបែបណាខ្លះដែលអាចនាំឲ្យយើងមានអារម្មណ៍ជាប់គាំង ( រណ្តៅ ) ? តើការគិតបែបណាខ្លះដែលជួយយើងឲ្យឆ្ពោះទៅមុខ ( ផ្លូវ ) ?
សិស្សអាចលើកឡើងអំពីការគិតដូចជា « អ្នកធ្វើឲ្យខ្ញុំខឹង » អាចបណ្តាលឲ្យពួកគេមានអារម្មណ៍ជាប់គាំង ។ ការគិតថា « ខ្ញុំអាចព្យាយាមម្តងទៀត » អាចជួយពួកគេឆ្ពោះទៅមុខ ។
-
តើមានការសម្រេចចិត្តអ្វីខ្លះ ដែលមនុស្សម្នាក់អាចធ្វើដោយផ្អែកលើការគិតមិនត្រឹមត្រូវ ឬមិនមានប្រយោជន៍ ?
សូមចំណាយពេលបន្តិចដើម្បីយាងអញ្ជើញព្រះវិញ្ញាណឲ្យជួយអ្នកឲ្យស្គាល់ពីរបៀបដែលអ្នកបានឃើញការគិតរបស់អ្នកបានជះឥទ្ធិពលលើសកម្មភាពដែលអ្នកធ្វើ ។ នៅពេលអ្នកសិក្សា ចូរស្វែងរកការបំផុសគំនិត ដើម្បីដឹងពីអ្វីដែលអ្នកអាចធ្វើបាន ដើម្បីយកឈ្នះលើគន្លងនៃការគិតអវិជ្ជមានទាំងនេះ ។
ការផ្តោតចិត្តរបស់យើងនៅលើព្រះយេស៊ូវគ្រីស្ទ
នៅពេលយើងខិតខំដើម្បីគ្រប់គ្រងគន្លងនៃការគិតដែលឥតប្រយោជន៍ ឬមិនត្រឹមត្រូវ វាអាចមានប្រយោជន៍ក្នុងការផ្ដោតគំនិតរបស់យើងឡើងវិញទៅលើព្រះវរបិតាសួគ៌ និងព្រះយេស៊ូវគ្រីស្ទ ។ ដើម្បីជួយសិស្សឲ្យឃើញពីរបៀបដែលព្រះអម្ចាស់សន្យាថានឹងប្រទានពរដល់យើង នៅពេលយើងផ្តោតលើទ្រង់ សូមពិចារណាបង្ហាញវគ្គបទគម្ពីរខាងក្រោម ។ អ្នកអាចដាក់សិស្សជាក្រុមដែលមានគ្នាបីនាក់ ហើយឲ្យសិស្សម្នាក់ៗសិក្សាវគ្គបទគម្ពីរមួយ ហើយចែកចាយអ្វីដែលពួកគេបានរៀន ។
អេសាយ ២៦:៣–៤
គោលលទ្ធិ និងសេចក្ដីសញ្ញា ៦:២៣, ៣៦–៣៧
-
តើពរជ័យអ្វីខ្លះដែលយើងអាចទទួលបាន នៅពេលយើងផ្ដោតចិត្ត ( ការគិត ) របស់យើងលើព្រះយេស៊ូវគ្រីស្ទ ?
អ្នកអាចសរសេរគោលការណ៍ដូចខាងក្រោមនៅលើក្តារខៀន ៖ នៅពេលយើងផ្តោតចិត្តរបស់យើងលើព្រះយេស៊ូវគ្រីស្ទ ទ្រង់នឹងផ្តល់ឲ្យយើងនូវភាពសុខសាន្ត និងកម្លាំង ។
ដើម្បីបង្កើនទំនុកចិត្តរបស់សិស្សថា ព្រះអង្គសង្គ្រោះនឹងជួយពួកគេផ្តោតលើទ្រង់ អ្នកអាចបង្ហាញវីដេអូ « Filling Our Minds with the Power of Jesus Christ » ( ២:០៧ ) ជំនួសឲ្យសេចក្តីថ្លែងការណ៍របស់ អែលឌើរ អាន់ឌើរសិន ខាងក្រោម ។
2:7 -
តើអ្នកគិតថា ការផ្ដោតចិត្តរបស់យើងទៅលើព្រះយេស៊ូវគ្រីស្ទផ្ដល់ឲ្យយើងនូវភាពសុខសាន្ត និងកម្លាំងដោយរបៀបណា ?
អែលឌើរ នែល អិល អាន់ឌើរសិន ក្នុងកូរ៉ុមនៃសាវកដប់ពីរនាក់បានបង្រៀនយើងពីរបៀបដែលយើងអាចផ្ដោតចិត្តរបស់យើងលើព្រះយេស៊ូវគ្រីស្ទ ។
ការបំពេញគំនិតរបស់យើងនូវព្រះចេស្តារបស់ព្រះយេស៊ូវគ្រីស្ទ ពុំមានន័យថា ទ្រង់ជាគំនិតតែមួយគត់ដែលយើងមាននោះទេ ។ ប៉ុន្តែ វាមានន័យថា គំនិតទាំងអស់របស់យើងត្រូវបានហ៊ុមព័ទ្ធ នៅក្នុងសេចក្ដីស្រឡាញ់ ព្រះជន្ម និងការបង្រៀនរបស់ទ្រង់ ព្រមទាំងពលិកម្មដ៏ធួន និងការមានព្រះជន្មរស់ឡើងវិញដ៏រុងរឿងរបស់ទ្រង់ ។ ព្រះយេស៊ូវមិនត្រូវបានបំភ្លេចចោលនោះទេ ព្រោះគំនិតរបស់យើងមានវត្តមានទ្រង់ជានិច្ច ហើយ « សូមឲ្យ [ យើងបានសព្វព្រះទ័យ ] ! » យើងអធិស្ឋាន និងថ្លែងឡើងវិញនៅក្នុងចិត្តអំពីបទពិសោធន៍ ដែលបាននាំយើងឲ្យខិតកាន់តែជិតទ្រង់ ។ យើងស្វាគមន៍រូបភាពដ៏ទេវភាព ព្រះគម្ពីរដ៏បរិសុទ្ធ និងទំនុកតម្កើងដ៏បំផុសគំនិតមកក្នុងចិត្តយើង ដើម្បីសម្រាលគំនិតតានតឹងរាប់មិនអស់ប្រចាំថ្ងៃ ក្នុងជីវិតដ៏មមាញឹករបស់យើង ។ សេចក្ដីស្រឡាញ់របស់យើងចំពោះទ្រង់ ពុំអាចរារាំងយើងពីភាពសោកសៅ និងទុក្ខព្រួយក្នុងជីវិតរមែងស្លាប់នេះបានទេ ប៉ុន្តែសេចក្ដីស្រឡាញ់នេះអនុញ្ញាតឲ្យយើង ហែលឆ្លងកាត់ឧបសគ្គនានាដោយកម្លាំងមួយដែលលើសពីសមត្ថភាពយើងផ្ទាល់ ។ ( « ចិត្តខ្ញុំនឹកគិតទៅលើរឿងនេះអំពីព្រះយេស៊ូវគ្រីស្ទ » លីអាហូណា ខែឧសភា ឆ្នាំ២០២៣ ទំព័រ ៩២ ) ( នាទីទី ៣:៥០ដល់ ៥:០២ )
-
តើការណែនាំណាខ្លះពីអែលឌើរ អាន់ឌើរសិន ដែលអ្នកចាប់អារម្មណ៍ ?
-
តើរូបភាព ព្រះគម្ពីរ ឬតន្ត្រីពិសិដ្ឋបានជួយអ្នក ឬនរណាម្នាក់ដែលអ្នកស្គាល់ឲ្យផ្ដោតលើព្រះយេស៊ូវគ្រីស្ទយ៉ាងដូចម្ដេច ?
អនុវត្តឆ្លើយតបទៅនឹងគំនិតដែលគ្មានប្រយោជន៍
ជំហានខាងក្រោមអាចជួយយើងយកឈ្នះលើគន្លងនៃការគិតអវិជ្ជមាន ។ សូមពិចារណាសរសេរជំហានទាំងនោះនៅលើក្តារខៀន ។
នៅពេលដែលយើងមានការគិតដែលឥតប្រយោជន៍ យើងអាច ៖
-
ស្គាល់ នូវគំនិតនោះនៅពេលវាកើតមានឡើង និងអារម្មណ៍ដែលជាលទ្ធផលមកពីការគិតនោះ ។
-
រៀបចំ ការគិតរបស់យើងឡើងវិញ ។
-
ឆ្ពោះទៅមុខ ដោយសេចក្ដីជំនឿលើព្រះយេស៊ូវគ្រីស្ទ ។
១. ស្គាល់ ។ សាច់រឿងខាងក្រោមនេះអាចជួយសិស្សឲ្យ ស្គាល់ នូវការគិតដែលគ្មានប្រយោជន៍មួយចំនួនដែលមនុស្សម្នាក់អាចមានពេញមួយថ្ងៃ ។ កែសម្រួលសាច់រឿងឲ្យត្រូវនឹងស្ថានភាពដែលសិស្សរបស់អ្នកអាចជួប ។
អំឡុងថ្នាក់គណិតវិទ្យា តូនីពិបាកយល់ពីគោលគំនិតដែលសិស្សដទៃទៀតងាយយល់ ។
នៅពេលដែល តូនី ត្រឡប់មកពីសាលារៀនវិញ ឪពុកម្តាយរបស់គាត់បានគំរាមដកទូរសព្ទរបស់គាត់ ប្រសិនបើគាត់មិនសម្អាតបន្ទប់របស់គាត់ ។
នៅយប់នោះ តូនីបានដឹងថាមិត្តរបស់គាត់ភាគច្រើនកំពុងទៅពិធីជប់លៀងដែលគេមិនបានអញ្ជើញគាត់ទៅ ។
-
តើតូនីអាចមានការគិតអ្វីខ្លះពេញមួយថ្ងៃ ?
នេះជារបៀបដែលសិស្សអាចឆ្លើយតបបាន ។ ក្នុងវង់ក្រចកគឺជាស្លាកនៃគន្លងនៃការគិតមិនត្រឹមត្រូវទូទៅ ។ អ្នកអាចស្វែងយល់បន្ថែមអំពីការគិតទាំងនោះនៅក្នុង Finding Strength in the Lord: Emotional Resilience « Healthy Thinking Patterns: Learn ។ »
-
« ខ្ញុំមិនពូកែគណិតវិទ្យាទេ ។ មនុស្សគ្រប់គ្នាឆ្លាតជាងខ្ញុំ » ។ ( ការដាក់ស្លាកខុស )
-
« ឪពុកម្តាយរបស់ខ្ញុំមិនដែលប្រាប់ខ្ញុំពីអ្វីដែលខ្ញុំធ្វើត្រូវនោះទេ ពួកគាត់តែងតែប្រាប់ខ្ញុំពីអ្វីដែលខ្ញុំត្រូវធ្វើឲ្យល្អជាង » ។ ( ទាំងអស់ ឬគ្មានអ្វីទាំងអស់ )
-
« មិត្តភក្ដិខ្ញុំមិនចូលចិត្តខ្ញុំទេ » ។ ( ចូលទៅការសន្និដ្ឋាន )
-
« មិនមានអ្វីល្អកើតឡើងនៅថ្ងៃនេះទេ ។ វាជាការបរាជ័យហើយបរាជ័យទៀត » ។ ( តម្រងផ្លូវចិត្ដអវិជ្ជមាន មិនជឿលើភាពវិជ្ជមាន )
-
-
តើអារម្មណ៍មួយណាដែល តូនីអាចដកពិសោធន៍ជាមួយនឹងការគិតទាំងនេះ ?
-
តើមានវិធីមិនមានប្រយោជន៍អ្វីខ្លះ ដែលតូនីអាចនឹងត្រូវបានល្បួងឲ្យធ្វើតាមអារម្មណ៍ទាំងនេះ ?
២. រៀបចំការគិតរបស់យើងឡើងវិញ ។ សូមពិចារណាអាន អេសាយ ៥៥:៨–៩ ហើយពិភាក្សាអំពីរបៀបដែលការគិតរបស់ព្រះអម្ចាស់ខ្ពស់ជាងការគិតរបស់យើង ។ ការរៀបចំការគិតរបស់យើងឡើងវិញអាចជួយយើងលើកគំនិតរបស់យើងឡើងឲ្យកាន់តែដូចព្រះអម្ចាស់ ។ សូមពិចារណាបង្ហាញចំណុចខាងក្រោមនេះដល់សិស្ស ៖
កំណត់និយមន័យ
ការរៀបចំគំនិតរបស់យើងឡើងវិញ មានន័យថា នៅពេលដែលគំនិតដែលគ្មានប្រយោជន៍កើតឡើង យើងវាយតម្លៃគំនិតនោះចេញពីទស្សនៈផ្សេងមួយទៀត ។ យើងអាចធ្វើដូចនេះបានដោយសួរសំណួរដូចជា ៖
-
តើគំនិតនេះត្រឹមត្រូវទេ ?
-
តើវាមានប្រយោជន៍ទេ ?
-
តើការគិតអំពីព្រះវរបិតាសួគ៌ ព្រះយេស៊ូវគ្រីស្ទ និងការបង្រៀនរបស់ទ្រង់ទាំងទ្វេអាចជួយខ្ញុំជាមួយនឹងគំនិតនេះយ៉ាងដូចម្ដេច ?
អ្នកអាចសរសេរសំណួរទាំងនេះនៅលើក្ដារខៀនដើម្បីឲ្យសិស្សប្រើ នៅពេលពួកគេជួយតូនី ។
គំរូ
សម្តែងថាអ្នកជាតូនី ហើយអ្នកមានគំនិតថា « ខ្ញុំមិនពូកែគណិតវិទ្យាទេ » ។
ជួយតូនីរៀបចំគំនិតនេះឡើងវិញដោយឆ្លើយសំណួរដូចខាងក្រោម ៖
-
តើគំនិតនេះត្រឹមត្រូវទេ ?
-
តើវាមានប្រយោជន៍ទេ ?
-
តើការគិតអំពីព្រះវរបិតាសួគ៌ ព្រះយេស៊ូវគ្រីស្ទ និងការបង្រៀនរបស់ទ្រង់ទាំងទ្វេអាចជួយខ្ញុំជាមួយនឹងគំនិតនេះយ៉ាងដូចម្ដេច ?
អ្នកអាចរៀបចំការគិតរបស់តូនីឡើងវិញជាមួយនឹងអ្វីមួយដូចជា ៖ « គំនិតនេះមិនមានប្រយោជន៍ទេ ( ទោះបីជាឥឡូវនេះវាត្រឹមត្រូវក៏ដោយ ) ។ ខ្ញុំដឹងថា ព្រះវរបិតាសួគ៌បានសន្យាថានឹងឆ្លើយតបការអធិស្ឋានរបស់ខ្ញុំ ។ ខ្ញុំអាចអធិស្ឋានទូលសុំជំនួយរបស់ទ្រង់ ។ គ្រូរបស់ខ្ញុំនឹងជួយខ្ញុំ ហើយខ្ញុំអាចខិតខំបន្ថែមបាន » ។
-
តើមានវិធីអ្វីខ្លះទៀត ដែល តូនីអាចរៀបចំការគិតរបស់គាត់ឡើងវិញ ? តើគាត់អាចធ្វើអ្វីដើម្បីឆ្ពោះទៅមុខដោយមានសេចក្ដីជំនឿលើព្រះគ្រីស្ទ ?
អនុវត្ត
ជ្រើសរើសគំនិតមួយក្នុងចំណោមគំនិតទាំងអស់របស់តូនី ដើម្បីអនុវត្តជំនាញនៃការរៀបចំឡើងវិញដោយការឆ្លើយតបទៅនឹងសំណួរ ។
អនុវត្តគន្លងនៃការគិតដែលមានភាពវិជ្ជមាន
សូមបង្ហាញរូបភាពដូចខាងក្រោម ។ សិស្សក៏អាចគូររូបនេះដាក់ក្នុងសៀវភៅកំណត់ហេតុការសិក្សារបស់ពួកគេផងដែរ ។ សូមពន្យល់ថា ជណ្ដើរអាចតំណាងឲ្យវិធីដែលព្រះអង្គសង្គ្រោះជួយយើងឲ្យផ្ដោតលើទ្រង់ រៀបចំគន្លងនៃការគិតរបស់យើងឡើងវិញ ហើយឆ្ពោះទៅមុខ ។
-
ស្គាល់ ។ សរសេរគំនិតអវិជ្ជមាន ឬគ្មានប្រយោជន៍ដែលអ្នកធ្លាប់មាន ឬអាចមាននាពេលអនាគតនៅក្នុងរូបពពុះគំនិតនៅក្នុងរណ្តៅ ។ កំណត់អារម្មណ៍ណាមួយដែលអាចមានមកជាមួយនឹងគំនិតនោះ ។
-
រៀបចំ ការគិតរបស់អ្នកឡើងវិញ ។ សួរខ្លួនឯងនូវសំណួរខាងក្រោម ដើម្បីជួយអ្នករៀបចំការគិតនោះឡើងវិញ ។ អ្នកអាចសរសេរចម្លើយនៅជាប់នឹងជណ្ដើរ ។
-
តើគំនិតនេះត្រឹមត្រូវទេ ? តើវាមានប្រយោជន៍ទេ ?
-
តើការផ្ដោតលើព្រះវរបិតាសួគ៌ ព្រះយេស៊ូវគ្រីស្ទ និងការបង្រៀនរបស់ទ្រង់ទាំងទ្វេអាចជួយខ្ញុំជាមួយនឹងគំនិតនេះយ៉ាងដូចម្ដេច
-
-
ឆ្ពោះទៅមុខ ដោយសេចក្ដីជំនឿលើព្រះយេស៊ូវគ្រីស្ទ ។ សរសេរគំនិតថ្មីមួយដែលនឹងជួយអ្នកឆ្ពោះទៅមុខដោយសេចក្ដីជំនឿទៅលើព្រះយេស៊ូវគ្រីស្ទនៅក្នុងរូបពពុះគំនិតនៅខាងក្រៅរណ្តៅ ។ សរសេរបទគម្ពីរ ឬទំនុកតម្កើង ស្វែងរករូបភាព ឬរាយបញ្ជីវិធីផ្សេងទៀតដែលអ្នកអាចរក្សាការផ្តោតអារម្មណ៍របស់អ្នកលើព្រះគ្រីស្ទ ( អេសាយ ២៦:៣–៤; គោលលទ្ធិ និងសេចក្ដីសញ្ញា ៦:៣៦ ) ដើម្បីគ្រប់គ្រងគំនិតនោះ ។
បន្ទាប់ពីមានពេលគ្រប់គ្រាន់ហើយ សូមអញ្ជើញសិស្សដែលស្ម័គ្រចិត្តឲ្យចែកចាយអ្វីដែលពួកគេចាប់អារម្មណ៍បំផុតពីមេរៀននោះ ។
សូមរំឭកសិស្សថា ការបង្កើតគន្លងនៃការគិតដែលមានភាពវិជ្ជមានជាញឹកញាប់ត្រូវការការខិតខំម្តងហើយម្តងទៀត ហើយព្រះអង្គសង្គ្រោះនឹងជួយពួកគេ ។ អ្នកអាចបញ្ចប់ថ្នាក់ដោយការអាន អេសាយ ២៦:៣–៤ ដើម្បីរំឭកពួកគេអំពីពរជ័យដែលព្រះយេស៊ូវគ្រីស្ទនឹងនាំមកក្នុងជីវិតពួកគេ នៅពេលពួកគេខិតខំផ្តោតចិត្តរបស់ពួកគេទៅលើទ្រង់ ។