Төгс эзэмших сургаалын дадлага 9

PDF файлыг нээх

• Аврагч Өөрийн хүүхэд нас, өсвөр насандаа, дэлхий дээр тохинуулж байхдаа судрын эдгээр номоос алийг нь судалсан бол?

Дараах судруудаас нэгийг эсвэл хоёрыг уншаад, Аврагч Хуучин Гэрээнээс цээжилсэн үг хэллэг, шүлгүүдээ хэрхэн ашиглаж байсныг олж мэд: Maтай 4:2–4; 19:4–5; Марк 7:9–10; Лук 24:27.

• Та нар юу олж мэдсэн бэ?

  Суралцагчид Аврагч маань уруу таталтыг даван туулах, бусдын асуултад хариулах, буруу ойлголтыг залруулах, бусдад заахын тулд цээжилсэн судруудаа ашигладаг байсан гэдгийг онцлон хэлж болно. Хэрэв суралцагчид Аврагчийн эш татсан шүлгүүдийг мэдэхийг хүсвэл Матай 4:2–4 дээр Аврагч Дэд хууль 8:3-ыг, Maтай 19:4–5 дээр Тэрээр Эхлэл 2:24-ийг, Maрк 7:9–10 дээр Гэтлэл 20:12 ба Дэд хууль 5:16-г эш татсан гэдгийг хуваалцаарай.

  Суралцагчдад төгс эзэмших сургаалын судрын хэсгүүдийг эсвэл судрын түлхүүр хэллэгүүдийг цээжилж, амьдралдаа ашигласнаар Есүс Христийн үлгэр жишээг дагаж байна гэдгээ ойлгоход нь тусал.

• Цээжилсэн судар тань ямар нөхцөл байдалд тус болсон эсвэл ирээдүйд ямар нөхцөл байдалтай тулгарахад танд тус болж болох вэ?

  Зарим жишээ нь хичээл заахад, үг хэлэхэд, бусдын асуултад хариулахад, хувийнхаа хариултыг эрэлхийлэхэд, уруу таталттай тулгарахад зэрэг байж болно.

• Судрын түлхүүр үг хэллэгүүдийг эсвэл хэсгүүдийг цээжлэхэд тус болдог юуг та хийдэг эсвэл хийж болох вэ?

Зарим төгс эзэмших сургаалын судрын эшлэлүүд болон түлхүүр үг хэллэгүүдийг цээжлэхэд хэдэн минут зарцуул. (Хэрэв та хүсвэл, түлхүүр үг хэллэгээс гадна нэмж бүтэн хэсгийг ч цээжилж болно.)

• Энэ үг хэллэг эсвэл хэсэг таны амьдралд хэрхэн тусалж болох вэ?

• Энэ нь танд Аврагчтай илүү адилхан болоход хэрхэн тусалж болох вэ?

Таны найз Миа “Бидний ням гаргийг өнгөрөөх арга зам хэтэрхий уйтгартай, цагийн гарз юм шиг санагддаг. Хэрэв бид Хүндэтгэлийн өдрийг ариунаар сахих талаар санаа зовдоггүй байсан бол амралтын өдрүүд маань илүү дээр байх байсан биш гэж үү?” гэж хэлсэн мэтээр төсөөл.

• Миа ямар шалтгаанаар энэ зарлигийг эсэргүүцэж байж болох вэ?

Миад юу тус болох боломжтой талаар бодож байгаа зүйлээ бэлтгэхэд хэдэн минут зарцуул. Үүнд:

• Судрууд, Сүмийн удирдагчдын хэлсэн үгс эсвэл бусад тэнгэрээс томилогдсон эх сурвалжууд. Эдгээрт Гэтлэл 20:8; Исаиа 58:13–14; Мозая 2:41; эсвэл Сургаал ба Гэрээнүүд 59:9, 13–15 гэх зэрэг эсвэл бусад төгс эзэмших сургаалын шүлгүүдийг хамруулж болно.

• Миад энэ нөхцөл байдлаа мөнхийн талаас харахад нь тусалж болох өөрийн чинь мэдэх үнэн эсвэл сургаалууд (жишээлбэл, Их Эзэнтэй илүү адилхан болоход энэ нь бидэнд хэрхэн тусалж болох тухай [Мосе 3:3-ыг үзнэ үү]).

• Хэн нэгэн сүмдээ ирж, ариун ёслолд оролцох зэргээр Хүндэтгэлийн өдрийг ариунаар сахихын тулд Их Эзэн Есүс Христэд итгэх итгэлээр үйлдэж болохыг харуулсан судрууд, Ерөнхий чуулганы яриа, эсвэл хувийн туршлагын жишээ байж болно. Тэд итгэлээ харуулсан үед Их Эзэн тэднийг хэрхэн адисалсан гэдгийг тайлбарлаж өгч болно. (Судрын зарим жишээнд Гэтлэл 16:14–30 мөн Жером 1:5–9 багтана.)

  Дараах зүйл бол суралцагчдыг санаа бодлоо өөр хоорондоо хуваалцахад бэлтгэх нэгэн арга зам юм.

  1. Суралцагч бүрд нэг хуудас цаас өг. Тэднээр цаасыг нугалах эсвэл шугам татах байдлаар гурван хэсэг болгон хуваалга.

  2. Хэсэг болгон дээр сүнслэг мэдлэг олж авах өөр өөр зарчмыг бичиж тэмдэглүүл.

  3. Нэг зарчмыг сонгож, сонгосон зарчмыг хэрэглэх нь Миад тустай байж болох нэг арга замыг бүх суралцагчаар цаасан дээр нь бичүүл.

  4. Суралцагчид цааснуудыг дамжуулж, өөр цаасан дээр өөр зарчмын тухай бичиж болно. Суралцагчдыг үргэлжлүүлэн дамжуулж, бичихийг хүс.

  5. Цаас тус бүр дээр хэд хэдэн санаа бичигдсэн байвал суралцагчдыг цаасыг өөртөө үлдээн, бичсэн зүйлийг уншихад урь.

  Уншсан зүйлдээ тулгуурлан дараах асуултуудад хариулахад хэдэн суралцагчийг урь. Та ихэвчлэн оролцдоггүй суралцагчдаас эдгээр асуултын нэг эсвэл хэд хэдэд нь хариулахыг хүсэж болно. Зарим суралцагчид бусдын бичсэнийг хуваалцахад илүү тухтай санагдаж болно.

• Таны уншсан эсвэл бичсэнээс Миад онцгой тустай байж болох нэг зүйл юу вэ? Яагаад?

• Та юу нэмж болох вэ?

Сүнслэг мэдлэг олж авах зарчмуудыг ашиглах нь өөрт байгаа асуулт, санаа зовоосон асуудалд хэрхэн тусалж чадах талаар дурдах зэргээр энэ туршлагаас санаж байхыг хүссэн зүйлсээ сургалтынхаа тэмдэглэлд бич.