Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Isaia 54: “Amin’ny indrafo lehibe … no ampodiako anao”

“Isaia 54: -Amin’ny indrafo lehibe … no ampodiako anao,-” Testamenta Taloha: Boky torolalana ho an’ny mpampianatra seminera (2026)

“Isaia 54: -Amin’ny indrafo lehibe no ampodiako anao,-” Testamenta Taloha: Boky torolalana ho an’ny mpampianatra seminera

Isaia 50–57: Lesona 125

Isaia 54

“Amin’ny indrafo lehibe … no ampodiako anao”

Mety hahatsapa ho nafoy sy irery ny olona indraindray. Indraindray ny olona dia mety hihevitra fa tsy eo ho azy ireo Andriamanitra. Satria nandika ny fanekempihavanana nataon’izy ireo tamin’i Jehovah ny mpianakavin’i Isiraely dia naely patrana izy ireo. Mety nahatsapa izy ireo fa nahafoy azy ireo Andriamanitra. Na izany aza dia nampahatsiahy ny vahoakan’ny fanekempihavanany tamin’ny alalan’i Isaia ny Tompo, na tamin’izany na amin’izao fotoana izao, fa hanangona azy ireo amin’ny indrafo lehibe Izy ary hanome azy ireo fiadanana. Ity lesona ity dia afaka manampy ny mpianatra hahatsapa ny fitiavan’ny Mpamonjy sy ny fanolorantenany ho azy ireo.

Fanomanana ny mpianatra: Asao ny mpianatra hamaky ny Isaia 54, ka hitady ireo teny na andian-teny izay hozarain’izy ireo amin’ny olona iray izay mahatsapa ho irery na nafoy.

Sahanasa fianarana azo atao

Mahatsapa ho afoy

Atomboy amin’izao rafi-tantara manaraka izao ny fotoam-pianarana. Azon’ny mpianatra atao ny misafidy ny tahadikan’ilay rafi-tantara mba hifantohany samirery na anankiray ho an’ny iray kilasy. Hanana fahafahana hamaly ilay rafi-tantara nosafidiny ny mpianatra any amin’ny faran’ny lesona.

Mahatsapa ho irery sy ho nafoy i Fidy satria …

Nanota izy ary tsy mino fa hamela azy amin’ny zavatra nataony Andriamanitra.
Vao haingana izy no nifindra toerana amina faritra vaovao iray ary sarotra taminy ny nahazo namana.
Tsy tsapany hoe voavaly ny vavaka nataony.

Saintsaino ny zavatra azonao lazaina an’i Fidy mba hanampiana azy. Eritrereto ny zavatra tianao ho fantany momba an’i Jesoa Kristy.

Nandritra ny fiainan’i Isaia dia nanatri-maso ny fanapariahana ny Fanjakana Avaratr’i Isiraely noho ny faharatsian’ilay fanjakana izy (jereo ny 2 Mpanjaka 17:6–23). Naminany ihany koa izy fa noho ny faharatsian’ny Fanjakana Atsimon’i Joda dia ho lasa babo ihany koa izy io (jereo ny Isaia 39:5–7). Noho izany dia maro tamin’ireo tao amin’ny mpianakavin’i Isiraely no mety nahatsapa ho nafoin’ Andriamanitra.

Ao amin’ny Isaia 54, i Isaia dia naminany momba ny zavatra hataon’ny Tompo ho an’ny vahoakan’ny fanekempihavanany. Nampiasa io toko io ny Mpamonjy taty aoriana mba hampianarana ny Nefita ny fomba hanangonany an’i Isiraely amin’ny andro farany (jereo ny 3 Nefia 22).

Rehefa mandalina ny Isaia 54 ianao dia henoy ireo bitsika avy amin’ny Fanahy Masina mba hanampiana anao hahafantatra ny zavatra tsapan’ny Ray any An-danitra sy i Jesoa Kristy momba ny fifandraisan’Izy Ireo aminao.

Ny fampanantenan’ny Tompo ho an’ireo vahoakany

Azonao atao ny mampahatsiahy ny mpianatra fa matetika i Isaia no nampiasa sary tao amin’ny asasorany. Ny fiatoana mba hieritreretana lesona nianarana avy amin’ilay sary nampidirina tao dia afaka manasa ny Fanahy Masina hampianatra antsika ny hafatry ny Tompo ao amin’ireo soratra masina ireo. Ao amin’ny Isaia 54, i Isaia dia nampiasa ny sarin’ny fifandraisana ao amin’ny fanambadiana mba hampianarana momba ny fifandraisana mifono fanekempihavanana nataon’ny Tompo tamin’ny mpianakavin’i Isiraely. Maneho ny Mpamonjy ilay lehilahy, ary ilay vehivavy no maneho ny mpianakavin’i Isiraely. Azonao atao ny mizara ny famakiana ny andian-tsoratra masina manaraka ho fizarana kelikely kokoa, toy ny andininy 1–4, 5–8, 9–10, 13, 17. Mba hanampiana ny mpianatra hahatakatra kokoa ny zavatra vakin’izy ireo dia azonao atao ny miato aorian’ny andian-tsoratra masina tsirairay ary manasa ny mpianatra hametraka fanontaniana.

Afaka mahita fampahalalana mikasika ireo teny na andian-teny sasantsasany ao amin’ireo andininy ireo ianao ao amin’ny fizarana Loharanom-pitaovana fanampiny.

Vakio tsara ny Isaia 54:1–10, 13, 17, ka tadiavo ny zavatra nampanantenain’i Jesoa Kristy ho an’ny vahoakan’ny fanekempihavanany.

Inona no ampianarin’ny sariohatry ny mpivady anao momba ny fifandraisan’ny Tompo amin’ny mpianakavin’i Isiraely?
Inona no ampianarin’ireo anarana sy anarana fiantsoana ny Mpamonjy ao amin’ny andininy 5 momba Azy?

Azonao atao ny mamela fotoana ho an’ny mpianatra hizara teny sy andian-teny manan-danja avy amin’ireo andininy ireo ary hifanakalo hevitra momba ny zavatra ampianarin’izany momba ny Tompo. Afaka manao izany miaraka na anaty vondrona kely ny mpianatra.

Soraty eny amin’ny solaitrabe ny hoe I Jesoa Kristy Mpanavotra antsika dia… ary asao ny mpianatra hameno ilay fehezan-teny amin’ny alalan’ny fampiasana ny zavatra hitany ao amin’ny Isaia 54:4–10, 13, 17.
Inona avy ireo fomba sasantsasany azonao hamaranana ilay fehezan-teny hoe I Jesoa Kristy Mpanavotra antsika dia…?
Azon’ny mpianatra atao ny mamarana ilay fehezan-teny amin’ny fomba maro, anisan’izany ny:

I Jesoa Kristy Mpanavotra antsika dia …
- hanangona ny vahoakany amin’ny famindram-po.
- manana hatsaram-panahy tsy manam-pahataperana ho an’ny vahoakany.
- hanatanteraka ny fanekempihavanana nataony tamin’ny olony.
- mampanantena fiadanana.
Rehefa mahita ny soratra masina ho manan-danja eo amin’ny fiainan’izy ireo ny mpianatra dia ho mora kokoa aminy ny mahatakatra ny fomba ampiharana ny fotopampianaran’ny Mpamonjy amin’izy ireo manokana. Ireto fanontaniana manaraka ireto, na hafa izay mety ho eritreretinao, dia afaka manampy azy ireo hifanakalo hevitra momba ny maha-zava-dehibe ireo fahamarinana hitan’izy ireo.
Iza amin’ireo fahamarinana ireo no heverinao fa afaka manampy indrindra ny tanora ankehitriny? Nahoana?

Saintsaino hoe iza amin’ireo fahamarinana ireo no tena manan-danja indrindra aminao manokana.

Ahoana araka ny eritreritrao no hanatanterahan’i Jesoa Kristy ireo fampanantenana ireo amin’izao fotoana izao?

Nijoro ho vavolombelona ny Loholona Jeffrey R. Holland ao amin’ny Kôlejin’ny Apôstôly Roambinifolo hoe:

… Ao anatin’ny tontolo izay “afotofoton’ny tafiodrivotra sady tsy manana fampiononana” araka ny naminanian’i Jehovah azy, dia ahoana no fomba hahitantsika ilay antsoiny hoe “Ilay fanekempihavanan’ny … fiadanana”? Mahita izany isika amin’ny alalan’ny fitodihana Aminy, Izy izay nilaza fa hamindra fo amintsika, ary “amin’ny hatsaram-po maharitra mandrakizay” no hanomezany fiadanam-po ho an’ny zanantsiny. (“Tsy tahaka ny fanomen’izao tontolo izao,” Liahona, mey 2021, 36)

Inona no ianaranao momba ny zavatra tsapan’ny Ray any An-danitra sy i Jesoa Kristy momba anao?

Mampiseho ny zavatra nianarana

Ity sahanasa manaraka ity dia natao hanampiana ny mpianatra hampiseho ny zavatra nianarany sy tsapany momba ny Ray any An-danitra sy i Jesoa Kristy avy amin’ny fandalinana ny Isaia 54. Misafidiana fomba iray hamaliana izay mifanaraka indrindra amin’ny zavatra ilain’ny kilasinao. Ny ohatra sasantsasany amin’ny zavatra azonao atao dia ahitana ny fanasana ny mpianatra hilalao an-tsehatra ilay toe-javatra, na hanoratra hafatra an-tsoratra mba halefa, na hamorona tantara an-tsary ahitana ny resadresaka atao amin’i Fidy.

Ampahatsiahivo ny antony nahatonga an’i Fidy ahatsapa ho nafoy sy irery. Eritrereto ny zavatra azonao zaraina aminy avy amin’ny zavatra nianaranao tao amin’ny Isaia 54. Misy zavatra niainana manokana azonao zaraina aminy ve?

Inona no tianao hotsaroana momba ny Mpamonjy avy amin’ny fandalinanao ny Isaia 54?

Azonao atao ihany koa ny mizara ny fijoroana ho vavolombelona anananao momba ny Mpamonjy sy ny eritreritrao ary ny fahatsapanao rehefa mandalina ny Isaia 54.

Loharanom-pitaovana fanampiny

Inona no dikan’ireo teny sy andian-teny sasantsasany ao amin’ny Isaia 54?

Ao amin’ny Isaia 54:3 izy dia nilaza tamin’i Isiraely fa izy ireo dia “hitatra any amin’ny ankavanana sy any amin’ny ankavia” ary “[H]asiana mponina ny tanàna lao.” Izany dia maneho ny maro amin’ireo olona izay hangonina, noho izany dia mila “[halalahana] ny itoeran’ny lainao” (Isaia 54:2).

Ao amin’ny Isaia 54:9, ny Tompo dia nampahatsiahy an’i Isiraely ny fampanantenany ny tsy hanarona intsony ny tany amin’ny safo-drano (jereo ny Genesisy 9:15–17). Tahaka ny nifaranan’ny safo-drano sy ny nampanantenan’ny Tompo fa tsy handefa hafa intsony Izy, dia tsy ho mandrakizay ihany koa ny fahatezeran’ny Tompo tamin’ny mpianakavin’i Isiraely noho ny fahotan’izy ireo.

Ao amin’ny Isaia 54:10, i Isaia dia nampiasa sarin-tendrombohitra sy havoana, izay hita ho toy ny maharitra. Mampanantena ny Tompo fa ny famindrampony sy ny “faneken’ny fihavana[ny]” dia maharitra kokoa noho ny tendrombohitra sy ny havoana.

Isaia 54:2 Inona no manan-danja amin’ny sariohatra nampiasain’i Isaia momba ny lay?

Ny Boky torolalan’ny Fiangonana maneran-tany dia milaza hoe:

I Isaia dia namaritra ny Zionan’ny andro farany ho toy ny lay na tabernakely izay miorina mafy amin’ny alalan’ireo tsatòka (jereo ny Isaia 33:20; 54:2). Amin’izao fotoana izao ny Fiangonana dia narafitra ho tsatòka maro. Ny tsatòka tsirairay dia ahitana paroasy maro ary tarihin’ny filohan’ny tsatòka iray. Manorina tsatòka ny Tompo mba ho an’ny “fiaraha-mivondron[’ny]” olony sy “ho fiarovana sy ho fialofana” amin’izao tontolo izao (Fotopampianarana sy Fanekempihavanana 115:6). Ireo mpikambana sy mpitarika eo anivon’ny tsatòka iray dia miara-miasa mba handraisana anjara amin’ny asan’ Andriamanitra ho an’ny famonjena sy ho an’ny fisandratana (jereo ny 1.2). (Boky torolalan’ny Fiangonana maneran-tany: 6.1)

Inona no fahatsapan’ny Tompo momba ireo vahoakan’ny fanekempihavanany?

Nijoro ho vavolombelona ny Loholona Jeffrey R. Holland ao amin’ny Kôlejin’ny Apôstôly Roambinifolo hoe:

Na dia teo aza ny fahamombana sy ny fiodinana indraindray, dia mbola mampody sy manavotra ilay vehivavy vadiny (Isiraely) ihany ralehilahy (Kristy). …

… I Kristy, indraindray, dia tezitra tamin’ny rariny noho ny tsy fankatoavan’i Isiraely, saingy vetivety hatrany izany sady mandalo fotsiny—”fotoana kely.” Miverina hatrany ny fangorahana sy ny famindrampo ary izany no manjaka amin’ny fomba tena manome toky. Mety hanjavona ny tendrombohitra sy ny havoana. Mety ho maina ny rano amin’ny ranomasimbe. Ny zavatra tsy nandrasana hiseho indrindra teto amin’izao tontolo izao dia mety hitranga, saingy ny famindrampo sy ny fiadanan’ny Tompo dia tsy ho esorina amin’ny vahoakan’ny fanekempihavanany. Nanao voady masina Izy fa tsy ho tezitra mandrakizay amin’izy ireo” (Christ and the New Covenant[1997], 290)

Ahoana no nanehoan’i Jesoa Kristy fa miaraka Aminy isika?

Nijoro ho vavolombelona ny Loholona D. Todd Christofferson ao amin’ny Kôlejin’ny Apôstôly Roambinifolo hoe:

14:40

Ny maha iray antsika ao amin’ny Ray sy ny Zanaka ary ny Fanahy Masina no tsy isalasalana fa faratampony amin’ny fahatsapana ho manana toerana.

Arak’izany, ny fotopampianaran’ny fahatsapana ho manan-toerana dia azo fehezina amin’ny hoe —isika tsirairay dia afaka manambara fa: maty ho ahy i Jesoa Kristy; hitany fa mendrika ny rany latsaka aho. Tia ahy Izy ary afaka mitondra ny fiovana rehetra eo amin’ny fiainako. Hanova ahy ny fahasoavany raha toa ka mibebaka aho. Iray ao Aminy aho ao amin’ny fanekempihavanan’ny filazantsara; manana toerana ao amin’ny Fiangonany sy fanjakany aho; ary manana toerana eo amin’ny foto-keviny izay hitondra fanavotana ho an’ireo zanak’ Andriamanitra rehetra. (“Ny fotopampianaran’ny fahatsapana ho manana toerana,” Liahona, nôv. 2022, 56)

Sahanasa fianarana fanampiny

“Halalaho ny itoeran’ny lainao … ary aoreno mafy ny tsima-dainao” (Isaia 54:2)

Ity sahanasa ity dia afaka manampy ny mpianatra hahatakatra ny sariohatra nampiasain’i Isaia momba ny lay sy ny antony nanorenana ny Fiangonana ho tsatòka. Afaka mitondra lay ao an-dakilasy ianao ary manasa ireo mpianatra hanangana izany na mampiseho sarina lay iray. Angataho izy ireo hanazava ny tanjon’ny lay sy ny fomba hananganana izany mba haharetany ny rivotra sy ny orana.

Hevero ny hampiseho ity sarina lay ity sy hanasa ny mpianatra hanisy anarana ireo ampahany samihafa amin’ny lay amin’ny alalan’ny fampiasana ny zavatra hitany ao amin’ny andininy 2.

Vakio ny Isaia 54:2, ka tadiavo ny zavatra nampianarin’i Isaia momba ny lay. Hevero ny hametraka ny sasany amin’ireto fanontaniana manaraka ireto mba hanampiana ny mpianatra hahatakatra ny fomba ifandraisan’ireo andininy ireo amin’ny Fiangonan’ny Mpamonjy amin’izao androntsika izao.

Ahoana araka ny eritreritrao no maha-toy ny lay ny Fiangonan’ny Mpamonjy?
Ahoana no hanohanan’ny tsatòka lay iray? Inona no azon’izany ampianarina antsika momba ny anjara asan’ireo tsatòkan’i Ziona ao amin’ny Fiangonan’ny Mpamonjy naverina tamin’ny laoniny?
Amin’ny fomba ahoana no hitaran’ny lay amin’izao androntsika izao raha ny fahitanao azy?

Hevero ny hizara ilay teny nambara ao amin’ny Boky torolalan’ny Fiangonana maneran-tany momba ireo tsatòka ao amin’ny Loharanom-pitaovana fanampiny. Azonao atao ihany koa ny mamaky ny Fotopampianarana sy Fanekempihavanana 115:6 ary mifanakalo hevitra momba ny fomba hanomezan’ireo tsatòkan’i Ziona fiarovana sy fialofana amin’ireo tafio-drivotry ny fiainana. Azonao atao ihany koa ny mamaky ny Môrônia 10:31 na ny Fotopampianarana sy Fanekempihavanana 82:14; 133:9 ary ifanakalozy hevitra ny zavatra asain’ny Tompo ataontsika amin’ny maha-mpikamban’ny Fiangonany antsika.

Ireo fampanantenan’i Tompo ho an’ Isiraely nanao fanekempihavanana

Rehefa mampiditra ny famakiana ny Isaia 54:1–10, 13, 17, ianao dia azonao atao ny mizara ity fanasana manaraka avy amin’ny Filoha Russell M. Nelson ity.

Eo am-pandalinanareo ny soratra masina … dia mamporisika anareo aho mba hanao lisitra mitanisa ny zavatra rehetra izay nampanantenain’ny Tompo fa hataony amin’i Isiraely nanao fankempihavanana. Ho talanjona tokoa ianareo! Saintsaino ireo fampanantenana ireo. Miresaha momba izany miaraka amin’ny fianakavianareo sy ny namanareo. Avy eo dia iaino ary jereo ny fahatanterahan’ireo fampanantenana ireo eo amin’ny fiainanareo. (“Aoka Andriamanitra no hanjaka,” Liahona, nôv. 2020, 95)

Asao ny mpianatra hitanisa ireo fampanantenan’ny Tompo amin’i Isiraely izay nanao fanekempihavanana ao amin’ny Isaia 54. Azonareo atao ny mifanakalo hevitra momba ny zavatra ampianarin’ireo fampanantenana ireo momba ny Tompo sy ny fomba fahitan’ny mpianatra ny fahatanterahan’izany eo amin’ny fiainany. Azonao atao ny mamporisika ny mpianatra hanohy hitady ireo fampanantenan’ny Tompo tamin’i Isiraely nanao fanekempihavanana rehefa mandalina ny soratra masina izy ireo.