“Fanantenana,” Lohahevitra sy fanontaniana (2023)
Torolalana amin’ny fandalinana ny filazantsara
Fanantenana
Fahatokiana fa ireo fampanantenana mandrakizay dia ho tanteraka amin’ny alalan’i Jesoa Kristy
Matetika ny fiainana dia mitondra toe-javatra tsy ampoizina sy sarotra izay mety hitarika antsika any amin’ny fahatsapana ho kivy, ho sahiran-tsaina ary ho resy. Mandritra ny fotoana toy izany dia tsy mamela antsika ho marefo sy irery ny Ray any An-danitra. Manolotra loharanom-panampiana ara-panahy maro Izy, tafiditra ao anatin’izany ny fanomezam-pahasoavan’ny fanantenana, izay manampy antsika hahazo tanjaka sy herimpo ary fiandrandrana hoavy feno fifaliana (jereo ny Môrônia 9:25).
Ho an’ireo izay miaina ny filazantsaran’i Jesoa Kristy, ny fanantenana dia mitondra fahatokiana fa mahalala antsika Andriamanitra ary hanatanteraka ireo fitahiana nampanantenainy araka ny sitrapony sy ny fotoanany. Ny fanomezam-pahasoavan’ny fanantenana avy amin’ Andriamanitra dia manampy antsika hijery ireo zavatra iainana eto amin’ny fiainana an-tany amin’ny fomba fijery mibanjina ny mandrakizay, indrindra ao anatin’ireo fotoana izay hitsapana ny finoantsika (jereo ny Jeremia 17:7). I Jesoa Kristy dia Andriamanitry ny fanantenana ary nataony izay ahafahantsika mandray fanantenana miavosa (jereo ny Romana 15:13). Ny fanantenana tonga dia avy amin’ny fananana finoana ny fitiavan’ny Mpamonjintsika sy ny hery ananany mba hanavotana sy hamonjena ireo izay manatona Azy.
Inona no atao hoe fanantenana?
Ny fanantenana dia fanomezana masina izay tonga rehefa mampihatra finoana an’i Jesoa Kristy ny olona iray (jereo ny Môrônia 7:40–41). Mitondra fahatsapana fahatokiana izany fa ho tanteraka amin’ny alalany ireo fampanantenana mandrakizay. Izy no loharanon’ny fanantenana sy ny hery ho an’ny zanak’ Andriamanitra rehetra (jereo ny Joela 3:16). Ny fanantenana dia manome antsika fahatokian-tena ny handroso hatrany mandritra ireo fotoan-tsarotra eto amin’ny fiainana an-tany. Izany dia fiandrandrana amim-pifaliana ny Fitsanganana amin’ny maty sy ireo fitahiana nampanantenaina ho an’ny famonjena sy ho an’ny fisandratana. Ny fanantenana dia mitarika ny olona iray mba hifantoka amin’ireo zavatra ilain’ny hafa sy hanompo azy ireo ao amin’ny fomba feno fiantrana.
Topimaso momba ny lohahevitra: Fanantenana
Torolalana amin’ny fandalinana ny filazantsara mifandray amin’izany: Finoana an’i Jesoa Kristy, Sorompanavotan’i Jesoa Kristy, Fiantrana, Fanomezam-pahasoavan’ny Fanahy, Fitsanganana amin’ny maty
Fizarana 1
Manome fanantenana i Jesoa Kristy rehefa mikatsaka ny hanaraka Azy ianao
Ny maro amin’ireo zava-tsarotra atrehantsika eto amin’ity tany ity dia vokatry ny Fahalavoan’i Adama sy i Eva (jereo ny Fotopampianarana sy Fanekempihavanana 29:40). Ny aretina, ny fijaliana, ny fahotana ary ny fahafatesana dia mandrafitra ny zavatra iainantsika eto an-tany. Raha toa ka tsy nisy ny Sorompanavotana sy ny Fitsanganana amin’ny maty amin’ny alalan’i Jesoa Kristy dia tsy hahazo fahasitranana na famelan-keloka na fifaliana na fiainana mandrakizay velively isika (jereo ny 2 Nefia 9:7–9). Ho fadiranovana sy tsy hanam-panantenana mandrakizay isika (jereo ny Môzià 16:3–4).
Saingy tonga teto an-tany i Jesoa Kristy ary nizaka ireo fahoriana rehetra eo amin’ny fiainantsika (jereo ny Almà 7:11). Nefainy ny sazin’ny fahotana ho an’ireo izay mampihatra finoana Azy sy mibebaka amin’ny fahotan’izy ireo (jereo ny Mosesy 5:9). Novahany ny famatoran’ny fahafatesana ary nitsangana tamin’ny maty Izy, ka nanokatra ny lalana mba hahavelona antsika indray (jereo ny 2 Nefia 2:6–8). Nampanantena ny fahazoana fanantenana hahazo ny fiainana mandrakizay an’ireo olona rehetra izay manaraka Azy Izy (jereo ny Etera 12:32).
Zavatra tokony hosaintsainina
-
Ny finoana an’ Andriamanitra dia mitondra fanantenana sy fahatokiana ny amin’ny fisian’ny Fitsanganana amin’ny maty sy ny fiainana mandrakizay. Jereo ny Etera 12:4. Ahoana no ahafahan’ny fanantenana izay tonga avy amin’ny finoanao an’i Jesoa Kristy ho toy ny vatofantsiky ny fanahinao ao anatin’ny fiainanao andavanandro?
-
Ao amin’ny Bokin’i Môrmôna, ny vahoaka Antia-Nefia-Lehia dia niaina fiovana mahery vaika rehefa nandre ny hafatry ny filazantsara sy niova fo. Vakio ny Almà 27:28. Inona no fiantraikan’ny fanomezam-pahasoavan’ny fanantenana sy ny fahatakaran’izy ireo momba an’i Jesoa Kristy teo amin’ny fomba fijerin’izy ireo ny momba ity fiainana ity sy ny fiainan-ko avy? Ahoana no mety hampiharana io fitsipika io eo amin’ny fiainanao?
Sahanasa entina miara-mianatra amin’ny hafa
-
Mitondra alahelo ny fahafatesan’ny olona iray ao amin’ny fianakaviana. Noho i Jesoa Kristy nizaka ny fanaintainana sy ny fahorian’ny olombelona rehetra dia afaka mivavaka amin’ny Ray any An-danitra amin’ny anarany isika ary mikatsaka ny fanampiany mifono fampiononana. Ny fahazoana fanantenana dia ampanantenaina an’ireo izay mino ny drafitr’ Andriamanitra ho an’ny fitsanganana amin’ny maty sy ny fiainana mandrakizay. Mba hahatakarana tsara kokoa ny maha-zava-dehibe ny fanantenana ao anatina fotoana namoizana olona iray dia asao ireo mpikambana ao amin’ny vondrona mba hisafidy sy hamaky ny iray amin’ireto manaraka ireto: 1 Petera 1:3–5; Jakôba 4:11; Almà 13:27–29; Etera 12:32. Azonareo jerena koa ny “Trouver l’espérance grâce à la résurrection du Christ” (4:41). Ahoana no fomba itondran’ny fanomezam-pahasoavan’ny fanantenana fampiononana an’ireo izay namoy namana na olona akaikin’ny fo? Ahoana no hamariparitanao ilay fanantenana fa nanao izay ahafahanao sy ireo olona akakain’ny fonao hitsangana amin’ny maty sy hiaina mandrakizay i Jesoa Kristy?
Hianatra misimisy kokoa
-
Ohabolana 10:28; Fitomaniana 3:25–26; 1 Korintiana 15:19; Môrônia 9:25–26
-
“The Power of Hope” (horonan-tsary), Médiathèque de l’Évangile
-
Jeffrey R. Holland, “Hoavy feno fanantenanafampaherezam-panahy maneran-tany ho anʼny tanora tokan-tena sy mpivady vao herotrerony, 8 jan. 2023), Médiathèque de l’Évangile.
Fizarana 2
Hitondra fanantenana ho anao ny finoanao an’i Jesoa Kristy
Matetika ny soratra masina no miresaka momba ny fanantenana miaraka amin’ireto toetra ireto, dia ny finoana sy ny fiantrana izany (jereo ny Môrônia 7:40–44). Ny ezaka ataontsika mba hampitomboana ny finoantsika an’i Jesoa Kristy sy hanaovana asa miaraka amin’ny fanehoana fiantrana amin’ny hafa dia mifandray mivantana amin’ny fahafahantsika manana fanantenana (jereo ny Môrônia 10:20–21). Raha niresaka momba ny maha-zava-dehibe ny finoana sy ny fanantenana ary ny fiantrana ny Filoha Russell M. Nelson dia nanazava hoe: “Ireo toetra telo ireo dia mifamatotra toy ny rohy eo amin’ny tariby ary mety tsy hisy famantarana hahafahana manavaka azy tsara. Izy ireo miaraka no lasa rohy mampifandray antsika amin’ny fanjakana selestialy. Izy ireo miaraka no lasa rohy mampifandray antsika amin’ny fanjakana selestialy.”
Ny fanantenana dia iray amin’ireo fitahiana azontsika raisina amin’ny alalan’ny Fanahy Masina rehefa mibebaka sy atao batisa isika (jereo Môrônia 8:25–26). Nampanantenaina isika fa rehefa manana “[finoana] tsy voahozongozona” an’i Jesoa Kristy dia hanampy antsika ny Ray any An-danitra mba hahazo “fanantenana mamirapiratra sy lavorary” (2 Nefia 31:19–20). Afaka mahazo fanantenana lehibe kokoa koa isika rehefa mandalina ny soratra masina (jereo ny Romana 15:4; Jakôba 4:6).
Zavatra tokony hosaintsainina
-
Raha niresaka tamin’ny tanora Rahavavy Patricia Holland dia nampianatra hoe: “Ny finoana dia ny faharesen-dahatra fa misy Andriamanitra, ny fanantenana dia ny fahatokiana fa hanampy antsika Izy, ary ny fiantrana dia ny fitiavany sy ny fahafahany miasa amin’ny alalantsika mba hitahiana ny hafa. Ahoana no hanampian’ny fianarana momba ny finoana sy ny fiantrana antsika hahatakatra bebe kokoa ny fanantenana?
Sahanasa entina miara-mianatra amin’ny hafa
-
Vakio miaraka amin’ireo mpikambana ao amin’ny vondrona ity teny manaraka nolazain’ny Filoha Dieter F. Uchtdorf ity:
“Ny fahavalo dia mampiasa ny fahakiviana mba hamatorana ny fo sy ny saina ao anatina haizina manempotra. Ny fahakiviana dia manala ao amintsika ny zavatra rehetra izay mampientanenana sy mitondra fifaliana ary mamela ilay sisa tavela banga izay maneho ny tokony ho tena endriky ny fiainana.
“Ny fanantenana etsy ankilany, dia toy ny taramasoandro miposaka eny ambonin’ny faravodilanitry ny toe-javatra misy iainantsika amin’ izao fotoana izao. Mamakivaky ny haizina amin’ny alalan’ny andro vao miposaka mamirapiratra izany. Mamporisika sy manentana antsika izany mba hametraka ny fitokiantsika eo amin’ilay fikarakarana feno fitiavana ataon’ilay Ray any An-danitra mandrakizay, izay nanomana lalana ho an’ireo izay mikatsaka fahamarinana mandrakizay ao anatin’ity izao tontolo izao ity izay ahitana tsy fahatomombanan’ny fahalalana, fisafotofotoana ary tahotra.”
Amin’ny fomba ahoana no ahafahan’ny fananana fanantenana manampy antsika hahita ao anatin’ny haizin’ity izao tontolo izao ity?
Hianatra misimisy kokoa
-
Russell M. Nelson, “A More Excellent Hope,” Ensign, feb. 1997, 60–64
-
Dieter F. Uchtdorf, “The Infinite Power of Hope,” Liahona, nôv. 2008, 21–24
Loharanom-pitaovana hafa momba ny fanantenana
-
Loharanom-pitaovana ho an’ny ankizy