ທ່ານບໍ່ຈຳເປັນຕ້ອງມີປະສົບການການສິດສອນ ເພື່ອທີ່ຈະເປັນຄູສອນ EnglishConnect. ບາງທີທ່ານອາດບໍ່ເຄີຍສອນພາສາອັງກິດມາກ່ອນ ແລະ ຮູ້ສຶກບໍ່ແນ່ໃຈວ່າຈະເລີ່ມຕົ້ນແນວໃດ. ບໍ່ເປັນຫຍັງ. ບົດຮຽນ EnglishConnect ຖືກອອກແບບຢ່າງລະມັດລະວັງ ແລະ ຢ່າງຮອບຄອບ ໂດຍໃຊ້ຫລັກທຳການສອນພາສາ ແລະ ຫລັກທຳທາງວິນຍານ ເພື່ອຊ່ວຍໃຫ້ທ່ານປະສົບຄວາມສຳເລັດ. ທ່ານບໍ່ຈຳເປັນຕ້ອງເປັນຜູ້ຊ່ຽວຊານ. ທ່ານບໍ່ຈຳເປັນຕ້ອງຮູ້ຄຳຕອບສຳລັບທຸກຄຳຖາມ. ບົດບາດຂອງທ່ານຄືການອຳນວຍຄວາມສະດວກໃນການພັດທະນາພາສາ ໂດຍການໃຫ້ໂອກາດເພື່ອຝຶກຝົນ. ທ່ານບໍ່ຈຳເປັນຕ້ອງສອນຫລັກໄວຍະກອນ ຫລື ເຂົ້າໃຈທຸກຢ່າງກ່ຽວກັບພາສາອັງກິດ. ແທນນັ້ນ, ໃຫ້ທ່ານສຸມໃສ່ສະພາບແວດລ້ອມທີ່ຜູ້ຮຽນຮູ້ສຶກສະບາຍໃຈ ທີ່ຈະເວົ້າພາສາອັງກິດ ແລະ ຮຽນຮູ້ຈາກຄວາມຜິດພາດຂອງຕົນເອງ.

ເຮົາຈະສິດສອນຜູ້ຮຽນໄດ້ແນວໃດ ຖ້າຫາກເຮົາບໍ່ຮູ້ພາສາຂອງເຂົາເຈົ້າ?

ການສອນພາສາອັງກິດໂດຍການໃຊ້ພາສາອັງກິດພຽງຢ່າງດຽວນັ້ນເປັນເລື່ອງປົກກະຕິທົ່ວໂລກ. ຕາມຈິງແລ້ວ, ນີ້ສາມາດເປັນພອນໄດ້ ເພາະມັນຊ່ວຍເພີ່ມປະລິມານພາສາອັງກິດທີ່ຜູ້ຮຽນໄດ້ຍິນ ແລະ ໃຊ້. ຈົ່ງຈື່ຈຳທີ່ຈະເວົ້າພາສາອັງກິດງ່າຍໆ. ໃຊ້ພາບ, ທ່າທາງມື, ແລະ ພາສາກາຍ ເພື່ອຊ່ວຍໃຫ້ຜູ້ຮຽນເຂົ້າໃຈຄຳສັບ ແລະ ຮູບແບບ. ທ່ານສາມາດສະແດງຮູບ, ແຕ້ມຮູບ, ແລະ ສະແດງອອກມາໄດ້. ທ່ານສາມາດຊີ້ບອກຜູ້ຮຽນໃຫ້ໄປຫາແຫລ່ງຊ່ວຍເຫລືອໃນ EnglishConnect 1 ສຳລັບຜູ້ຮຽນ ຫລື EnglishConnect 2 ສຳລັບຜູ້ຮຽນ, ຫລື ທ່ານສາມາດໃຊ້ວັດຈະນານຸກົມອອນລາຍ. ສິ່ງນີ້ຍັງຈະສອນຜູ້ຮຽນເຖິງວິທີໃຊ້ແຫລ່ງຊ່ວຍເຫລືອທີ່ມີຢູ່ ເພື່ອຊອກຫາຄຳຕອບ. ຫລີກເວັ້ນການອະທິບາຍຍາວ. ແທນນັ້ນ, ໃຫ້ສະແດງໃຫ້ຜູ້ຮຽນເຫັນວ່າຕ້ອງເຮັດຫຍັງ ໂດຍການສາທິດແທນ.

ຈົ່ງຈື່ຈຳວ່າພວກທ່ານກຳລັງຮຽນຮູ້ນຳກັນ. ເຊື້ອເຊີນຜູ້ຮຽນໃຫ້ຫັນມາຫາພຣະຜູ້ເປັນເຈົ້າ ເພື່ອການຊ່ວຍເຫລືອເປັນປະຈຳ. ໃນຖານະຄູສອນຂອງເຂົາເຈົ້າ, ທ່ານສາມາດເປັນຕົວຢ່າງແຫ່ງສັດທາ ແລະ ຄວາມພະຍາຍາມໄດ້. ການເວົ້າພາສາອັງກິດກັບຜູ້ຮຽນເປັນການສະແດງສັດທາ. ພຣະຜູ້ເປັນເຈົ້າຈະອວຍພອນທ່ານ ແລະ ຜູ້ຮຽນ ເມື່ອທ່ານເວົ້າພາສາອັງກິດດ້ວຍສັດທາ.

ເຮົາຈະສາມາດເວົ້າພາສາແມ່ໃນລະຫວ່າງກຸ່ມສົນທະນາໄດ້ຫລືບໍ່?

ທ່ານຈະຊ່ວຍຜູ້ຮຽນໄດ້ຫລາຍທີ່ສຸດ ເມື່ອທ່ານສຸມໃສ່ການເວົ້າພາສາອັງກິດຕະຫລອດທັງກຸ່ມສົນທະນາ. ທ່ານສາມາດເຮັດໄດ້ໂດຍການຍົກຕົວຢ່າງ. ຈົ່ງເຮັດໃຫ້ດີທີ່ສຸດ ເພື່ອເວົ້າພຽງແຕ່ພາສາອັງກິດ. ໃຊ້ຄຳງ່າຍໆ ແລະ ປະໂຫຍກສັ້ນໆ. ເວົ້າຊ້າໆ ແລະ ເວົ້າຊ້ຳວະລີເກົ່າເລື້ອຍໆ. ຂຽນຄຳ ແລະ ວະລີສຳຄັນໄວ້ເທິງກະດານ. ທ່ານກໍຍັງສາມາດໃຊ້ພາບ, ແຕ້ມຮູບ, ຫລື ສະແດງອອກໄດ້. ຫລີກເວັ້ນຈາກການອະທິບາຍຍາວ ແລະ ແປທຸກສິ່ງທີ່ທ່ານເວົ້າ. ຖ້າຫາກທ່ານຕ້ອງໃຊ້ພາສາແມ່, ໃຫ້ຂໍອະນຸຍາດກ່ອນ ແລະ ໃຊ້ພາສາແມ່ໃຫ້ໜ້ອຍທີ່ສຸດເທົ່າທີ່ຈະເປັນໄປໄດ້ ແລະ ແລ້ວຈຶ່ງກັບມາເປັນພາສາອັງກິດ. ຊຸກຍູ້ໃຫ້ຜູ້ຮຽນເວົ້າພາສາອັງກິດໃຫ້ຫລາຍທີ່ສຸດເທົ່າທີ່ເຂົາເຈົ້າຈະສາມາດເຮັດໄດ້ ແລະ ຢ່າຢ້ານທີ່ຈະເຮັດຜິດພາດ. ຊ່ວຍໃຫ້ເຂົາເຈົ້າປະສົບກັບຄວາມສຳເລັດ ແລະ ສັນລະເສີນທຸກຄວາມພະຍາຍາມ. ຖ້າຫາກຜູ້ຮຽນຕ້ອງການຄວາມຊ່ວຍເຫລືອເພີ່ມເຕີມ, ໃຫ້ຊີ້ໄປທີ່ຄູ່ມືຜູ້ຮຽນ, ຊຶ່ງເຂົາເຈົ້າສາມາດຫາອຸປະກອນໃນພາສາແມ່ຂອງເຂົາເຈົ້າໄດ້. ເມື່ອທ່ານສຸມໃສ່ການຊ່ວຍເຫລືອຜູ້ຮຽນໂດຍການລົງມືເຮັດ, ທ່ານຈະມີຄວາມຈຳເປັນຕ້ອງໃຊ້ພາສາແມ່ໜ້ອຍລົງ.

ເຮົາຈະສິດສອນກຸ່ມຫລາຍພາສາໄດ້ແນວໃດ?

ການສິດສອນກຸ່ມຫລາຍພາສາເປັນໂອກາດທີ່ດີເລີດໃນການສົ່ງເສີມການເວົ້າພາສາອັງກິດ ເພາະພາສາອັງກິດເປັນພາສາທົ່ວໄປໃນກຸ່ມ. ໃນຖານະຄູສອນ, ໃຫ້ໃຊ້ຄູ່ມືຜູ້ຮຽນທີ່ເປັນພາສາອັງກິດ. ຊ່ວຍຜູ້ຮຽນໃຫ້ໃຊ້ຄູ່ມືຜູ້ຮຽນໃນພາສາແມ່ຂອງເຂົາເຈົ້າ, ຖ້າມີໃຫ້, ເພື່ອວ່າເຂົາເຈົ້າຈະສາມາດໄດ້ຮັບຜົນປະໂຫຍດຈາກການແປ. ຖ້າເປັນໄປໄດ້, ໃຫ້ຈັດຜູ້ຮຽນເປັນກຸ່ມນ້ອຍໆ ເພື່ອສົນທະນາຫລັກທຳການຮຽນຮູ້ໃນພາສາແມ່ຂອງເຂົາເຈົ້າ, ແຕ່ຕ້ອງໃຫ້ແນ່ໃຈວ່າບໍ່ມີໃຜຖືກກີດກັນ. ຖ້າຫາກມີຜູ້ເວົ້າພາສາໃດພາສາໜຶ່ງພຽງຄົນດຽວໃນກຸ່ມ, ໃຫ້ກຸ່ມນັ້ນສົນທະນາຫລັກທຳການຮຽນຮູ້ໃນພາສາອັງກິດທີ່ງ່າຍໆ ເພື່ອໃຫ້ທຸກຄົນລວມເຂົ້ານຳ.

ເຮົາຈະຊ່ວຍຜູ້ຮຽນຝຶກພາສາອັງກິດທຸກມື້ໄດ້ແນວໃດ?

ໃນການຮຽນພາສາອັງກິດ, ຜູ້ຮຽນຈຳເປັນຕ້ອງພັດທະນານິໄສການຝຶກຝົນທຸກວັນ. ຊຸກຍູ້ຜູ້ຮຽນໃຫ້ສ້າງນິໄສນີ້ ໂດຍການຫາວິທີງ່າຍໆເພື່ອປະສົມປະສານພາສາອັງກິດເຂົ້າກັບກິດຈະກຳປະຈຳວັນຂອງເຂົາເຈົ້າ (ເບິ່ງພາກ “ການຝຶກຝົນທຸກວັນ”). ຍົກຕົວຢ່າງ, ຜູ້ຮຽນສາມາດເລືອກຊົມລາຍການ ຫລື ຟັງເພງເປັນພາສາອັງກິດໄດ້. ທ່ານສາມາດຊຸກຍູ້ຜູ້ຮຽນໃຫ້ໃຊ້ລາຍການແນວຄິດ ເພື່ອປັບປຸງການສຶກສາທຸກວັນ ຊຶ່ງຢູ່ຫລັງ “Personal Study Tracker” ໃນເບື້ອງຕົ້ນຂອງຄູ່ມືຜູ້ຮຽນ. ໃຊ້ລາຍການນີ້ເພື່ອສ້າງແຮງບັນດານໃຈໃຫ້ຜູ້ຮຽນຊອກຫາວິທີທີ່ສ້າງສັນ ແລະ ມີຄວາມໝາຍ ໃນການຝຶກຝົນທຸກວັນ.

ລະຫວ່າງການປະຊຸມກຸ່ມ, ໃຫ້ເຊື້ອເຊີນຜູ້ຮຽນໃຫ້ສຶກສາ ແລະ ຝຶກພາສາອັງກິດທຸກວັນ ແລະ ຕິດຕາມຜົນຄວາມພະຍາຍາມຂອງເຂົາເຈົ້າ. ທ່ານອາດຂໍໃຫ້ຜູ້ຮຽນສອງສາມຄົນແບ່ງປັນສິ່ງທີ່ເຂົາເຈົ້າເຮັດໃນການຝຶກຝົນທຸກວັນ. ທ່ານອາດພິຈາລະນາທີ່ຈະສ້າງພື້ນທີ່ອອນລາຍ, ເຊັ່ນ ກຸ່ມສົນທະນາ, ສຳລັບຜູ້ຮຽນໃນກຸ່ມ. ປຶກສາກັບຜູ້ນຳຂອງທ່ານເພື່ອຊອກຫາວິທີທີ່ເໝາະສົມ ເພື່ອຊ່ວຍໃຫ້ກຸ່ມເຊື່ອມຕໍ່ລະຫວ່າງອາທິດ ຜ່ານທາງການສົ່ງຂໍ້ຄວາມກຸ່ມ ແລະ ວິທີອື່ນໆ. ທ່ານສາມາດສະໜັບສະໜູນຜູ້ຮຽນ ຂະນະທີ່ເຂົາເຈົ້າເຮັດວຽກງານເພື່ອໃຫ້ບັນລຸເປົ້າໝາຍຂອງເຂົາເຈົ້າ, ແຕ່ຈົ່ງຈື່ຈຳວ່າ, ເຂົາເຈົ້າຕ້ອງຮັບຜິດຊອບຕໍ່ການຮຽນຮູ້ຂອງຕົນເອງ.

ເຮົາຈະຈັດກຸ່ມ EnglishConnect ໄດ້ແນວໃດ?

ປຶກສາກັບຜູ້ນຳສາດສະໜາຈັກໃນທ້ອງຖິ່ນ ເພື່ອຕັດສິນໃຈກ່ຽວກັບການຈັດ ແລະ ການດຳເນີນກຸ່ມ EnglishConnect. ຕາມຫລັກການແລ້ວ, ຄູສອນຜູ້ໃຫຍ່ສອງຄົນຈະຖືກມອບໝາຍໃຫ້ແຕ່ລະກຸ່ມ. ໃຫ້ພິຈາລະນາຄວາມຕ້ອງການຂອງຜູ້ຮຽນ ແລະ ຄວາມສາມາດໃນທ້ອງຖິ່ນ ເມື່ອທ່ານເລືອກສະຖານທີ່, ຕາຕະລາງເວລາ, ແລະ ຈັງຫວະຄວາມໄວ.

ການປະຊຸມກຸ່ມ EnglishConnect ຈະໃຊ້ເວລາດົນປານໃດ?

ບົດຮຽນ EnglishConnect ມີໄລຍະເວລາຈາກ 60 ເຖິງ 90 ນາທີ. ປະຕິບັດຕາມຊ່ວງເວລາທີ່ລະບຸໄວ້ສຳລັບແຕ່ລະກິດຈະກຳ. ຢ່າລຶບກິດຈະກຳໃດໆ; ພຽງແຕ່ໃຊ້ເວລາຕ່ຳສຸດທີ່ແນະນຳສຳລັບການປະຊຸມກຸ່ມທີ່ສັ້ນກວ່າ ແລະ ໃຊ້ເວລາດົນກວ່າທີ່ແນະນຳ ຖ້າເວລາເອື້ອອຳນວຍ.

ໝາຍເຫດ: ປຶກສາກັບຜູ້ທີ່ດູແລໂປຣແກຣມ ແລະ ພິຈາລະນາຄວາມຕ້ອງການຂອງຜູ້ຮຽນ ແລະ ຄວາມສາມາດໃນທ້ອງຖິ່ນ ຂະນະທີ່ທ່ານທຳການຕັດສິນໃຈເຫລົ່ານີ້.

ກຸ່ມຂອງເຮົາຄວນປະຊຸມກັນເລື້ອຍປານໃດ?

ໂດຍທົ່ວໄປແລ້ວ, ກຸ່ມຈະພົບກັນອາທິດລະຄັ້ງ. ຖ້າຕ້ອງການ, ກຸ່ມສາມາດພົບກັນເລື້ອຍຂຶ້ນ. ເພື່ອໃຫ້ການປະຊຸມກຸ່ມມີປະສິດທິພາບຫລາຍທີ່ສຸດ, ຜູ້ຮຽນຕ້ອງມີເວລາພຽງພໍລະຫວ່າງການປະຊຸມ ເພື່ອເຮັດພາກ “Personal Study” ໃຫ້ສຳເລັດ.

EnglishConnect 1 ແລະ 2 ແຕ່ລະຢ່າງມີ 25 ບົດຮຽນ. ຖ້າຫາກກຸ່ມພົບກັນອາທິດລະຄັ້ງ, ຈະຕ້ອງໃຊ້ເວລາຫົກເດືອນຈຶ່ງຈະສຳເລັດໜຶ່ງລະດັບ. ຖ້າຫາກກຸ່ມພົບກັນອາທິດລະສອງຄັ້ງ, ຈະໃຊ້ເວລາສາມເດືອນ. ຖ້າຕ້ອງການ, ທ່ານສາມາດແບ່ງໂປຣແກຣມອອກເປັນສ່ວນນ້ອຍໆ ຫລື ໂມດູນຕ່າງໆ. ຍົກຕົວຢ່າງ, ທ່ານອາດຈະເລືອກເລີ່ມຕົ້ນກຸ່ມທີ່ຈະປະຊຸມພຽງສາມເດືອນ ອາທິດລະຄັ້ງ ເພື່ອສຳເລັດໝວດທີ 1 ເຖິງ 3. ການໃຊ້ແນວທາງນີ້ສາມາດຊ່ວຍຜູ້ຮຽນຍຶດຢູ່ກັບຄວາມມຸ່ງໝັ້ນ.

ໝາຍເຫດ: ເມື່ອກຳນົດເວລາການປະຊຸມກຸ່ມທີ່ບໍ່ໄດ້ເລີ່ມຕົ້ນດ້ວຍໝວດທີ 1, ໃຫ້ພິຈາລະນາທີ່ຈະເລີ່ມຕາຕະລາງເວລາບົດຮຽນຂອງກຸ່ມ ດ້ວຍບົດຮຽນທີ 1. ສິ່ງນີ້ຈະຊ່ວຍປະຖົມນິເທດຜູ້ຮຽນກ່ຽວກັບວິທີໃຊ້ຄູ່ມື. ປຶກສາກັບຜູ້ທີ່ດູແລໂປຣແກຣມ ແລະ ພິຈາລະນາຄວາມຕ້ອງການຂອງຜູ້ຮຽນ ແລະ ຄວາມສາມາດໃນທ້ອງຖິ່ນ ຂະນະທີ່ທ່ານທຳການຕັດສິນໃຈເຫລົ່ານີ້.

ເຮົາສາມາດສິດສອນຫລາຍກວ່າໜຶ່ງບົດຮຽນໃນການປະຊຸມກຸ່ມໄດ້ຫລືບໍ່?

ຖ້າຕ້ອງການ, ກຸ່ມສາມາດກວມຫລາຍກວ່າໜຶ່ງບົດຮຽນລະຫວ່າງການປະຊຸມກຸ່ມ. ເພື່ອໃຫ້ການປະຊຸມກຸ່ມມີປະສິດທິພາບຫລາຍທີ່ສຸດ, ຜູ້ຮຽນຕ້ອງມີເວລາພຽງພໍກ່ອນການປະຊຸມ ເພື່ອເຮັດພາກ “Personal Study” ສຳລັບແຕ່ລະບົດຮຽນໃຫ້ຄົບຖ້ວນ.

ເບິ່ງ “ກຸ່ມຂອງເຮົາຄວນປະຊຸມກັນເລື້ອຍປານໃດ?” ສຳລັບຂໍ້ມູນເພີ່ມເຕີມກ່ຽວກັບຕາຕະລາງບົດຮຽນ ແລະ ຈັງຫວະຄວາມໄວ.

ເຮົາຈະຮູ້ໄດ້ແນວໃດວ່າ ຜູ້ຮຽນຄວນເຂົ້າຮ່ວມ EnglishConnect ລະດັບໃດ?

EnglishConnect 1 ຮຽກຮ້ອງຄວາມຮູ້ໃນພາສາແມ່ຂອງບຸກຄົນ ແລະ ຄວາມສາມາດໃນການອ່ານຕົວອັກສອນອັງກິດ ແລະ ຄຳສັບພາສາອັງກິດຂັ້ນພື້ນຖານ. EnglishConnect 2 ແມ່ນສຳລັບຜູ້ຮຽນທີ່ສາມາດເວົ້າປະໂຫຍກພື້ນຖານ ແລະ ຕອບຄຳຖາມພື້ນຖານເປັນພາສາອັງກິດ. ໃນການຕັດສິນໃຈຖ້າຫາກວ່າຜູ້ຮຽນຄວນເຂົ້າຮ່ວມ EnglishConnect 1 ຫລື EnglishConnect 2, ທ່ານສາມາດໃຊ້ການສຳພາດຄວາມສາມາດທາງການເວົ້າປາກເປົ່າໃນ ພາກຫ້ອຍທ້າຍ ຂ.

EnglishConnect 3 ເປັນຫລັກສູດລະດັບປານກາງທີ່ຊ່ວຍໃຫ້ຜູ້ຮຽນພັດທະນາທັກສະພາສາອັງກິດທາງວິຊາການ. ເພື່ອທີ່ຈະເຂົ້າຮ່ວມ EnglishConnect 3, ຜູ້ຮຽນຕ້ອງສະໝັກ ແລະ ໄດ້ຄະແນນຕາມຄຸນສົມບັດໃນການສອບວັດລະດັບ. ຜູ້ຮຽນສາມາດສະໝັກໄດ້ທີ່ englishconnect.org/join.

EnglishConnect 3 ແມ່ນຫຍັງ?

EnglishConnect ມີຫລາຍລະດັບ ເພື່ອຊ່ວຍໃຫ້ຜູ້ເຂົ້າຮ່ວມກ້າວໜ້າ. EnglishConnect 1 ແລະ 2 ຊ່ວຍໃຫ້ຜູ້ຮຽນພັດທະນາທັກສະພາສາອັງກິດຂັ້ນພື້ນຖານ. EnglishConnect 3 ເປັນຫລັກສູດລະດັບປານກາງທີ່ຊ່ວຍໃຫ້ຜູ້ຮຽນພັດທະນາທັກສະພາສາອັງກິດທາງວິຊາການ. ມັນຊ່ວຍໃຫ້ຜູ້ຮຽນກຽມພ້ອມສຳລັບ BYU–Pathway Worldwide. (ຮຽນຮູ້ເພີ່ມເຕີມກ່ຽວກັບ BYU–Pathway Worldwide ທີ່ byupathway.org.)

EnglishConnect 3 ເປັນຫລັກສູດອອນລາຍລາຄາປະຢັດ ທີ່ມີການຮວບຮວມການສົນທະນາອອນລາຍ ຫລື ໃນອາຄານປະຊຸມໃນທ້ອງຖິ່ນ. EnglishConnect 3 ລວມດ້ວຍແຫລ່ງຊ່ວຍເຫລືອການຮຽນຮູ້ອອນລາຍ ພ້ອມກັບຄວາມຄິດຄວາມເຫັນໃນການຟັງ, ການເວົ້າ, ການອ່ານ, ແລະ ການຂຽນ. ຜູ້ຮຽນສາມາດກ້າວໜ້າໃນຫລັກສູດຕາມຈັງຫວະຄວາມໄວຂອງຕົນເອງ. ຜູ້ຮຽນສາມາດເຂົ້າຮ່ວມ EnglishConnect 3 ຊ້ຳໄດ້ຫລາຍໆຄັ້ງຕາມຄວາມຕ້ອງການ ເພື່ອໃຫ້ບັນລຸເປົ້າໝາຍ. ການສຳເລັດ EnglishConnect 3 ຊ່ວຍໃຫ້ຜູ້ຮຽນຖືກຍົກເວັ້ນຈາກການປະເມີນພາສາອັງກິດ ເມື່ອສະໝັກເຂົ້າຮຽນທີ່ BYU–Pathway Worldwide.

ເພື່ອກຽມພ້ອມສຳລັບ EnglishConnect 3, ຜູ້ຮຽນຄວນສຳເລັດ EnglishConnect 1 ແລະ 2—ລວມທັງກິດຈະກຳໃນປຶ້ມບົດຝຶກຫັດ, ໂດຍສະເພາະກິດຈະກຳການອ່ານ ແລະ ການຂຽນ. ຊຸກຍູ້ຜູ້ຮຽນ EnglishConnect 2 ໃຫ້ສະໝັກເຂົ້າຮ່ວມ EnglishConnect 3 ທີ່ englishconnect.org/join.

EnglishConnect 3 ນຳສະເໜີຜ່ານທາງ BYU–Pathway Worldwide ໂດຍຮ່ວມມືກັບຜູ້ນຳໃນທ້ອງຖິ່ນ ແລະ ຜູ້ສອນສາດສະໜາຝ່າຍໃຫ້ບໍລິການຂອງສາດສະໜາຈັກ. ຜູ້ນຳທີ່ສົນໃຈສາມາດເຮັດວຽກງານກັບຜູ້ຈັດການສະຫວັດດີການ ແລະ ການກຸ້ມຕົນເອງໃນເຂດຂອງເຂົາເຈົ້າ ເພື່ອຈັດໃຫ້ມີ EnglishConnect 3 ໃນສະຖານທີ່ຂອງຕົນ.

ເຮົາຈະຊ່ວຍຜູ້ຮຽນທີ່ເຂົ້າຮ່ວມກຸ່ມທີ່ເລີ່ມແລ້ວໄດ້ແນວໃດ?

ບົດຮຽນໄດ້ຖືກອອກແບບເພື່ອຊ່ວຍໃຫ້ຜູ້ຮຽນສາມາດເຂົ້າຮ່ວມກຸ່ມ EnglishConnect ໄດ້ທຸກເວລາ. ຖ້າຫາກຜູ້ຮຽນຢາກເຂົ້າຮ່ວມຫລັງຈາກທີ່ກຸ່ມໄດ້ເລີ່ມຕົ້ນແລ້ວ, ກໍໃຫ້ຕ້ອນຮັບເຂົາເຈົ້າ, ຈັດຫາ EnglishConnect 1 ສຳລັບຜູ້ຮຽນ ຫລື EnglishConnect 2 ສຳລັບຜູ້ຮຽນ ໃຫ້ເຂົາເຈົ້າ (ຫລື ສະແດງໃຫ້ເຂົາເຈົ້າຮູ້ວິທີເຂົ້າເຖິງຄູ່ມື ໃນຫ້ອງສະໝຸດພຣະກິດຕິຄຸນ), ແລະ ຊ່ວຍໃຫ້ເຂົາເຈົ້າມີສ່ວນຮ່ວມ. ທ່ານ ຫລື ຜູ້ຮຽນຄົນອື່ນສາມາດຊ່ວຍຜູ້ຮຽນໃໝ່ປະສົມປະສານເຂົ້າກັບກຸ່ມໄດ້ ໂດຍການສະແດງໃຫ້ເຂົາເຈົ້າຮູ້ຈັກວິທີກຽມພ້ອມສຳລັບບົດຮຽນຕໍ່ໄປ. ພ້ອມນີ້, ຜູ້ຮຽນສາມາດເລືອກຮຽນຊ້ຳລະດັບເດີມ ຖ້າຫາກເຂົາເຈົ້າຕ້ອງການຝຶກຝົນຕື່ມອີກ.

ຈະເກີດຫຍັງຂຶ້ນຖ້າຫາກຜູ້ຮຽນພາດການປະຊຸມກຸ່ມ ຫລື ຢຸດມາ?

ບາງຄັ້ງຜູ້ຮຽນກໍມີຄວາມທ້າທາຍທີ່ເຮັດໃຫ້ຫຍຸ້ງຍາກທີ່ຈະເຂົ້າຮ່ວມກຸ່ມ, ແລະ ເຂົາເຈົ້າມັກຈະລັງເລໃຈທີ່ຈະກັບຄືນມາ ເພາະຄວາມອັບອາຍ ຫລື ຄວາມຢ້ານກົວ. ເຂົາເຈົ້າອາດສັນນິຖານວ່າ ເຂົາເຈົ້າໄດ້ພາດຫລາຍເກີນໄປ ແລະ ຕາມບໍ່ທັນ. ໃຫ້ເອື້ອມອອກໄປ ແລະ ເຊື້ອເຊີນຜູ້ຮຽນທີ່ຂາດຮຽນໃຫ້ມາຮ່ວມບົດຮຽນຄັ້ງຕໍ່ໄປ ບໍ່ວ່າເຂົາເຈົ້າໄດ້ພາດຈັກເທື່ອກໍຕາມ. ໃຫ້ການສະໜັບສະໜູນ ແລະ ໃຫ້ກຳລັງໃຈ. ຮັບຮອງກັບເຂົາເຈົ້າວ່າ EnglishConnect ໄດ້ຖືກອອກແບບເພື່ອວ່າຜູ້ຮຽນຈະສາມາດກັບມາເຂົ້າຮ່ວມໄດ້ທຸກເວລາ. ຜູ້ຮຽນສາມາດເລີ່ມຕົ້ນໃໝ່ ໂດຍການເຂົ້າຮ່ວມກຸ່ມ ແລະ ກຽມພ້ອມສຳລັບບົດຮຽນຄັ້ງຕໍ່ໄປ. ພິຈາລະນາທີ່ຈະເຊື້ອເຊີນສະມາຊິກກຸ່ມໜຶ່ງຄົນ ຫລື ຫລາຍກວ່ານັ້ນ ໃຫ້ຕິດຕໍ່ຫາຜູ້ຮຽນທີ່ຂາດ ແລະ ສະແດງການສະໜັບສະໜູນ.

ໝາຍເຫດ: ຢ່າເປີດເຜີຍຂໍ້ມູນຕິດຕໍ່ສ່ວນຕົວຂອງບຸກຄົນ ໂດຍບໍ່ໄດ້ຮັບອະນຸຍາດເປັນລາຍລັກອັກສອນຈາກເຂົາເຈົ້າ.

ເຮົາຈະສະໜັບສະໜູນຜູ້ຮຽນທີ່ຮຽນຊ້າກວ່າຄົນອື່ນໃນກຸ່ມໄດ້ແນວໃດ?

ຜູ້ຮຽນບາງຄົນຕ້ອງການເວລາຫລາຍຂຶ້ນເພື່ອຈະເຂົ້າໃຈ ແລະ ເວົ້າພາສາ. ຜູ້ຮຽນເຫລົ່ານີ້ຈະໄດ້ຮັບຜົນປະໂຫຍດຫລາຍທີ່ສຸດຈາກການສຳເລັດພາກ “Personal Study” ກ່ອນທີ່ຈະເຂົ້າຮ່ວມກຸ່ມສົນທະນາແຕ່ລະຄັ້ງ. ເຊື້ອເຊີນເຂົາເຈົ້າໃຫ້ຝຶກຄຳສັບ ແລະ ແບບແຜນປະໂຫຍກກ່ອນກຸ່ມຈະພົບກັນ. ລະຫວ່າງບົດຮຽນ, ໃຫ້ຈັບຄູ່ຜູ້ຮຽນເຫລົ່ານີ້ກັບຜູ້ຮຽນຄົນອື່ນໆ ທີ່ສາມາດໃຫ້ກຳລັງໃຈ ແລະ ສະໜັບສະໜູນໄດ້. ຊຸກຍູ້ຜູ້ຮຽນທຸກຄົນໃຫ້ເຮັດຫລາຍທີ່ສຸດເທົ່າທີ່ເຂົາເຈົ້າຈະສາມາດເຮັດໄດ້ ແລະ ຍອມຮັບຄວາມຜິດພາດ ຊຶ່ງເປັນສ່ວນໜຶ່ງຂອງຂະບວນການຮຽນຮູ້. ທ່ານຍັງອາດເລືອກທີ່ຈະທົບທວນ ແລະ ເຮັດກິດຈະກຳຊ້ຳໄດ້. ເຕືອນຜູ້ຮຽນທຸກຄົນວ່າ ການສຳເລັດພາກ “Personal Study” ກ່ອນການເຂົ້າຮ່ວມກຸ່ມສົນທະນາຄັ້ງຕໍ່ໄປ ມີຄວາມສຳຄັນຕໍ່ຄວາມກ້າວໜ້າຂອງເຂົາເຈົ້າ.

ເຮົາຈະສະໜັບສະໜູນຜູ້ຮຽນທີ່ຮຽນໄວໄດ້ແນວໃດ?

ຂະນະທີ່ທ່ານມີສ່ວນຮ່ວມກັບຜູ້ຮຽນ, ທ່ານອາດສັງເກດເຫັນວ່າ ບາງຄົນເຂົ້າໃຈດີ ແລະ ສາມາດສຳເລັດກິດຈະກຳຝຶກຫັດໄດ້ຢ່າງງ່າຍດາຍ. ໃຫ້ພິຈາລະນາທີ່ຈະທ້າທາຍຜູ້ຮຽນເຫລົ່ານີ້ໃຫ້ຮຽນຮູ້ຢ່າງເລິກເຊິ່ງ ໂດຍການໃສ່ລາຍລະອຽດເພີ່ມເຕີມ ຫລື ເຮັດກິດຈະກຳດຽວກັນໃນບໍລິບົດທີ່ແຕກຕ່າງ. ຍົກຕົວຢ່າງ, ເມື່ອຜູ້ຮຽນກຳລັງຝຶກຊ້ອມການພົບປະບາງຄົນ, ຂໍໃຫ້ເຂົາເຈົ້າຝຶກຊ້ອມການພົບກັບເພື່ອນໃໝ່ ຫລື ເຈົ້ານາຍໃໝ່. ຜູ້ຮຽນເຫລົ່ານີ້ຍັງສາມາດເສີມສ້າງຄວາມຮູ້ພາສາອັງກິດຢ່າງແຂງຂັນ ໂດຍການສະໜັບສະໜູນຜູ້ຮຽນທີ່ກຳລັງຮຽນໃນຈັງຫວະຄວາມໄວທີ່ຊ້າກວ່າ. ຜູ້ຮຽນທຸກຄົນສາມາດໄດ້ຮັບຜົນປະໂຫຍດຈາກການສິດສອນໝູ່ເພື່ອນ ແລະ ຊ່ວຍຄົນອື່ນໃຫ້ຝຶກຄຳສັບ ແລະ ຮູບແບບໃນພາສາອັງກິດ.

ເຮົາຈະສະໜັບສະໜູນຜູ້ຮຽນທີ່ມີຄວາມສາມາດໃນການເວົ້າພາສາອັງກິດທີ່ຕ່າງກັນໄດ້ແນວໃດ?

ການມີຜູ້ຮຽນທີ່ມີລະດັບຄວາມສາມາດໃນການເວົ້າພາສາອັງກິດຕ່າງກັນ ເປັນເລື່ອງປົກກະຕິ ແລະ ເປັນໂອກາດທີ່ເຂົາເຈົ້າຈະຊ່ວຍເຫລືອຊຶ່ງກັນແລະກັນ. ການຊ່ວຍເຫລືອຊຶ່ງກັນແລະກັນສາມາດສົ່ງເສີມການຜູກມິດ ແລະ ການເຕີບໂຕໄດ້. ທຸກຄົນມີສິ່ງທີ່ຈະນຳສະເໜີ. ຍົກຕົວຢ່າງ, ຜູ້ຮຽນບາງຄົນອາດຈະຊ່ວຍໃຫ້ຜູ້ອື່ນຮູ້ສຶກໝັ້ນໃຈໄດ້ ເພາະເຂົາເຈົ້າເຕັມໃຈທີ່ຈະເຮັດຜິດພາດ. ຈັບຄູ່ຜູ້ຮຽນໃນຮູບແບບຕ່າງໆ. ທ່ານສາມາດຈັບຄູ່ຜູ້ຮຽນກັບຜູ້ທີ່ມີລະດັບໃກ້ຄຽງກັນ ເພື່ອຊ່ວຍເຂົາເຈົ້າຂະຫຍາຍຄວາມສາມາດນຳກັນ. ຫລື ທ່ານສາມາດຈັບຄູ່ຜູ້ຮຽນກັບບາງຄົນໃນລະດັບທີ່ແຕກຕ່າງໄດ້. ຜູ້ຮຽນລະດັບທີ່ຕ່ຳກວ່າຈະໄດ້ຮັບຜົນປະໂຫຍດຈາກຄວາມຄິດຄວາມເຫັນ ແລະ ການສະໜັບສະໜູນ. ຜູ້ຮຽນລະດັບທີ່ສູງກວ່າຈະໄດ້ຮັບຜົນປະໂຫຍດຈາກການສິດສອນໝູ່ເພື່ອນ ແລະ ການອະທິບາຍເປັນພາສາອັງກິດ. ຈົ່ງຈື່ຈຳວ່າ, ການມີກຸ່ມທີ່ມີຄວາມສາມາດດ້ານການເວົ້າພາສາອັງກິດຕ່າງກັນ ເປັນເລື່ອງປົກກະຕິ ແລະ ສາມາດເປັນໂອກາດທີ່ດີເລີດສຳລັບຜູ້ຮຽນ ທີ່ຈະໄດ້ຮັບຜົນປະໂຫຍດຈາກການຊ່ວຍເຫລືອຊຶ່ງກັນແລະກັນ.

ເຮົາຈະເຮັດແນວໃດເມື່ອຜູ້ຮຽນຖາມຄຳຖາມກ່ຽວກັບຫລັກໄວຍະກອນ?

ແທນທີ່ຈະສອນຫລັກໄວຍະກອນຍາວໆ ຫລື ໃຊ້ເວລາຫລາຍເວົ້າເຖິງກົດເກນ, ໃຫ້ຊີ້ບອກຜູ້ຮຽນຫັນກັບມາທີ່ຮູບແບບຕ່າງໆ. ຜູ້ຮຽນຈະຫລີກເວັ້ນຈາກຄວາມຜິດພາດຫລາຍຢ່າງ ໂດຍການປະຕິບັດຕາມຮູບແບບ. ມັນຈະມີປະສິດທິພາບຫລາຍຂຶ້ນ ໂດຍການຝຶກພາສາ ແທນທີ່ຈະເວົ້າກ່ຽວກັບພາສາ. ຄຳອະທິບາຍກ່ຽວກັບຫລັກໄວຍະກອນຄວນລຽບງ່າຍ, ສັ້ນໆ, ແລະ ນຳໄປປະຕິບັດໄດ້. ຖ້າຫາກທ່ານສິດສອນຫລັກທຳ, ໃຫ້ຍົກປະໂຫຍກຕົວຢ່າງ ແລະ ເຊື້ອເຊີນໃຫ້ຜູ້ຮຽນຝຶກປະໂຫຍກໃຊ້ຫລັກທຳ. ຜູ້ຮຽນຈະໄດ້ຮັບຜົນປະໂຫຍດຫລາຍທີ່ສຸດຈາກການໄດ້ຍິນ ແລະ ການຝຶກພາສາອັງກິດ.

ເຮົາຄວນແກ້ໄຂການອອກສຽງຫລືບໍ່?

ຢ່າໃຊ້ເວລາຫລາຍໃນການແກ້ໄຂການອອກສຽງ. ເຕືອນຜູ້ຮຽນວ່າການເຂົ້າໃຈນັ້ນສຳຄັນກວ່າການອອກສຽງທີ່ສົມບູນແບບ. ຊຸກຍູ້ຜູ້ຮຽນໃຫ້ຝຶກການອອກສຽງໃນລະຫວ່າງການສຶກສາສ່ວນຕົວ ເພື່ອຈະໄດ້ຝຶກຝົນຕາມຈັງຫວະຄວາມໄວຂອງຕົນເອງ. ຈົ່ງຮູ້ໄວ້ວ່າ ຖ້າຫາກຜູ້ຮຽນກັງວົນຫລາຍເກີນໄປກ່ຽວກັບການອອກສຽງ, ເຂົາເຈົ້າອາດຈະລັງເລທີ່ຈະຝຶກການສົນທະນາ. ຊຸກຍູ້ຜູ້ຮຽນໃຫ້ໃຊ້ໂມດູນການອອກສຽງອອນລາຍ ທີ່ englishconnect.org/learner/resources.

ເຮົາຈະລົງທະບຽນ ແລະ ຈັດການກຸ່ມ EnglishConnect ຂອງເຮົາໄດ້ແນວໃດ?

ໃຊ້ເຄື່ອງມື QuickReg (quickreg.englishconnect.org) ເພື່ອລົງທະບຽນ ແລະ ຈັດການກຸ່ມ EnglishConnect ຂອງທ່ານ. QuickReg ເປັນເຄື່ອງມືລົງທະບຽນກຸ່ມ ທີ່ຈັດຂຶ້ນໂດຍສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ທ່ານສາມາດໃຊ້ QuickReg ເພື່ອ:

ສ້າງກຸ່ມ: ເລືອກວັນທີ, ເວລາ, ແລະ ສະຖານທີ່ຂອງກຸ່ມທ່ານ.
ຈັດການກຸ່ມ: ເບິ່ງຂໍ້ມູນຜູ້ເຂົ້າຮ່ວມ ແລະ ອັບເດດຂໍ້ມູນກຸ່ມ.
ເຊື້ອເຊີນຜູ້ຄົນໃຫ້ເຂົ້າຮ່ວມ: ກຸ່ມຂອງທ່ານຈະປະກົດອອນລາຍ ທີ່ englishconnect.org/join. ທ່ານສາມາດແບ່ງປັນລິ້ງ ເພື່ອເຊື້ອເຊີນຜູ້ຄົນໃຫ້ລົງທະບຽນສຳລັບກຸ່ມຂອງທ່ານ.
ແຈກຢາຍໃບຮັບຮອງ: ໃນທ້າຍກຸ່ມຂອງທ່ານ, ທ່ານສາມາດເຂົ້າເຖິງ ແລະ ພິມໃບຮັບຮອງ.

ຜູ້ຮຽນຈະໄດ້ຮັບໃບຮັບຮອງ EnglishConnect ໄດ້ແນວໃດ?

EnglishConnect 1 ແລະ 2: ເມື່ອກຸ່ມສິ້ນສຸດລົງ, ຜູ້ຮຽນສາມາດໄດ້ຮັບໃບຮັບຮອງການເຂົ້າຮ່ວມໄດ້. ຜູ້ນຳ, ຜູ້ຊ່ຽວຊານ, ຫລື ຄູສອນສາມາດແຈກຢາຍໃບຮັບຮອງ. ບາງປະເທດອາດບໍ່ອະນຸຍາດໃຫ້ແຈກຢາຍໃບຮັບຮອງ EnglishConnect. ກະລຸນາກວດສອບຂໍ້ກຳນົດທາງກົດໝາຍໃນທ້ອງຖິ່ນ ກ່ອນທີ່ຈະມອບໃບຮັບຮອງ (ເບິ່ງ englishconnect.org/leader/approved-locations).

ໝາຍເຫດ: ໃນການເຂົ້າເຖິງ ແລະ ແຈກຢາຍໃບຮັບຮອງ, ກຸ່ມຂອງທ່ານຈະຕ້ອງລົງທະບຽນໃນເຄື່ອງມື QuickReg ທີ່ quickreg.englishconnect.org. (ເບິ່ງ “ເຮົາຈະລົງທະບຽນ ແລະ ຈັດການກຸ່ມ EnglishConnect ຂອງເຮົາໄດ້ແນວໃດ?” ໃນພາກ FAQ ນີ້.)

EnglishConnect 3: ຜູ້ຮຽນສາມາດໄດ້ຮັບໃບຮັບຮອງການສຳເລັດຫລັກສູດ ເມື່ອສຳເລັດລະດັບທີ່ກຳນົດໃນຫລັກສູດ. ການສຳເລັດ EnglishConnect 3 ຊ່ວຍໃຫ້ຜູ້ຮຽນຖືກຍົກເວັ້ນຈາກການປະເມີນພາສາອັງກິດ ເມື່ອສະໝັກເຂົ້າທີ່ BYU–Pathway Worldwide.