ຜູ້ຮຽນເຮັດຫຍັງ?

ໃນຖານະຄູສອນ EnglishConnect, ທ່ານຕ້ອງເຂົ້າໃຈສິ່ງທີ່ຜູ້ຮຽນຈະເຮັດ ເພື່ອວ່າທ່ານຈະສາມາດຊ່ວຍເຂົາເຈົ້າໃຫ້ປະສົບຄວາມສຳເລັດ. ຜູ້ຮຽນຈະປະສົບຄວາມສຳເລັດຫລາຍທີ່ສຸດ ເມື່ອເຮັດກິດຈະກຳການຮຽນສ່ວນຕົວ, ເຂົ້າຮ່ວມກຸ່ມສົນທະນາ, ແລະ ພັດທະນານິໄສການຝຶກຝົນພາສາອັງກິດທຸກວັນ. ແຕ່ລະບົດຮຽນໃນ EnglishConnect 1 ສຳລັບຜູ້ຮຽນ ແລະ EnglishConnect 2 ສຳລັບຜູ້ຮຽນ ຖືກແຍກເປັນສອງພາກ: “Personal Study” (ການສຶກສາສ່ວນຕົວ) ແລະ “Conversation Group” (ກຸ່ມສົນທະນາ). ທົບທວນ “ຄຳນຳ” ໃນຄູ່ມືຜູ້ຮຽນ EnglishConnect ເພື່ອຊ່ວຍໃຫ້ທ່ານເຂົ້າໃຈປະສົບການຂອງຜູ້ຮຽນ.

ຮູບອະທິບາຍສະແດງວ່າ ການສຶກສາສ່ວນຕົວ ແລະ ກຸ່ມສົນທະນາເປັນຂະບວນການທີ່ໝູນວຽນ

ສະແຫວງຫາການຮຽນຮູ້ໂດຍການສຶກສາ ແລະ ໂດຍສັດທາ

ຮາກຖານຂອງປະສົບການ EnglishConnect ແມ່ນເພື່ອຊ່ວຍຜູ້ຮຽນໃຫ້ “ສະແຫວງຫາການຮຽນຮູ້, ແມ່ນແຕ່ໂດຍການສຶກສາ ແລະ ໂດຍສັດທານຳອີກ” (ຄຳສອນ ແລະ ພັນທະສັນຍາ 88:118). ທຸກບົດຮຽນໃນ EnglishConnect ມີສູນກາງຢູ່ທີ່ຫລັກທຳຂອງການຮຽນຮູ້. ສິ່ງເຫລົ່ານີ້ຄືຫລັກທຳທາງວິນຍານ ທີ່ຊ່ວຍໃຫ້ເຮົາເພິ່ງອາໄສພຣະຜູ້ເປັນເຈົ້າ ເພື່ອເພີ່ມຄວາມສາມາດຂອງເຮົາໃນການຮຽນຮູ້ ແລະ ສິດສອນ. ຫລັກທຳຂອງການຮຽນຮູ້ສາມາດຊ່ວຍໃຫ້ເຮົາເຂົ້າໃຈສັກກະຍະພາບທີ່ແທ້ຈິງຂອງເຮົາ ແລະ ຄວາມສາມາດຂອງພຣະຜູ້ຊ່ວຍໃຫ້ລອດທີ່ຈະຊ່ວຍເຮົາ. ຫລັກທຳຂອງການຮຽນຮູ້ທີ່ເຮົາຈະສຶກສາ ແລະ ເປັນຕົວຢ່າງ ໃນປະສົບການ EnglishConnect ແມ່ນລວມທັງ:

ທ່ານເປັນລູກຂອງພຣະເຈົ້າ

ເຮົາເປັນລູກຂອງພຣະເຈົ້າ ພ້ອມດ້ວຍສັກກະຍະພາບ ແລະ ຈຸດປະສົງນິລັນດອນ.

(ເບິ່ງ ໂຣມ 8:16–17; “ຄອບຄົວ: ການປະກາດຕໍ່ໂລກ.”)

ໃຊ້ສັດທາໃນພຣະເຢຊູຄຣິດ

ພຣະເຢຊູຄຣິດສາມາດຊ່ວຍໃຫ້ເຮົາເຮັດທຸກສິ່ງ ຂະນະທີ່ເຮົາໃຊ້ສັດທາໃນພຣະອົງ.

(ເບິ່ງ ຟີລິບປອຍ 4:13; ອີເທີ 12:27; ໂມໂຣໄນ 7:33.)

ຮັບເອົາໜ້າທີ່ຮັບຜິດຊອບ

ເຮົາມີອຳນາດທີ່ຈະເລືອກ, ແລະ ເຮົາມີຄວາມຮັບຜິດຊອບຕໍ່ການຮຽນຮູ້ຂອງເຮົາເອງ.

(ເບິ່ງ 2 ນີໄຟ 2:14, 16; ຄຳສອນ ແລະ ພັນທະສັນຍາ 58:27–28.)

ຮັກ ແລະ ສິດສອນຊຶ່ງກັນແລະກັນ

ເຮົາສາມາດຮຽນຮູ້ຈາກພຣະວິນຍານສັກສິດ ຂະນະທີ່ເຮົາຮັກ, ສິດສອນ, ແລະ ຮຽນຮູ້ກັບຄົນອື່ນ.

(ເບິ່ງ ໂຢຮັນ 13:34–35; ໂຢຮັນ 14:26–27; ຄຳສອນ ແລະ ພັນທະສັນຍາ 84:106; 88:77, 122–23.)

ດຳເນີນໄປໜ້າ

ດ້ວຍຄວາມຊ່ວຍເຫລືອຈາກພຣະເຈົ້າ, ເຮົາສາມາດດຳເນີນໄປໜ້າ ເຖິງແມ່ນຕ້ອງປະເຊີນກັບອຸປະສັກກໍຕາມ.

(ເບິ່ງ 2 ນີໄຟ 31:20; 32:9; ຄຳສອນ ແລະ ພັນທະສັນຍາ 50:41–42.)

ປຶກສາກັບພຣະຜູ້ເປັນເຈົ້າ

ເຮົາພັດທະນາການຮຽນຮູ້ຂອງເຮົາ ໂດຍການປຶກສາກັບພຣະເຈົ້າທຸກວັນກ່ຽວກັບຄວາມພະຍາຍາມຂອງເຮົາ.

(ເບິ່ງ ສຸພາສິດ 3:5–6; ມັດທາຍ 7:7–8; ແອວມາ 37:37.)

ການສຶກສາສ່ວນຕົວ

ກ່ອນເຂົ້າຮ່ວມກຸ່ມສົນທະນາ, ຜູ້ຮຽນຈະສຳເລັດພາກ “Personal Study” (ການສຶກສາສ່ວນຕົວ) ໃນຄູ່ມືຜູ້ຮຽນກ່ອນ. ໃນພາກນີ້, ຜູ້ຮຽນຈະສຶກສາຫລັກທຳຂອງການຮຽນຮູ້, ທ່ອງຈຳຄຳສັບ, ແລະ ຝຶກຝົນການໃຊ້ແບບແຜນປະໂຫຍກ.

ການທ່ອງຈຳຄຳສັບ ແລະ ການຝຶກຝົນແບບແຜນເປັນກິດຈະກຳທີ່ດີທີ່ສຸດໃນການສຶກສາສ່ວນຕົວ. ສິ່ງນີ້ເຮັດໃຫ້ຜູ້ຮຽນສາມາດສ້າງແນວຄິດໄດ້ດ້ວຍຈັງຫວະຄວາມໄວຂອງຕົນເອງ.

ກຸ່ມສົນທະນາ

ໃນກຸ່ມສົນທະນາ, ຜູ້ຮຽນຈະສຳເລັດກິດຈະກຳ “Conversation Group” (ກຸ່ມສົນທະນາ) ໃນຄູ່ມືຜູ້ຮຽນ. ການເຮັດວຽກເປັນກຸ່ມນ້ອຍ ຫລື ເປັນຄູ່, ຜູ້ຈະຮຽນສົນທະນາຫລັກທຳຂອງການຮຽນຮູ້, ທົບທວນຄຳສັບ ແລະ ແບບແຜນປະໂຫຍກ, ແລະ ຝຶກການສົນທະນາ. ກິດຈະກຳແຕ່ລະຢ່າງກະກຽມຜູ້ຮຽນສຳລັບກິດຈະກຳຄັ້ງຕໍ່ໄປ. ໃນທ້າຍຂອງກຸ່ມສົນທະນາແຕ່ລະຄັ້ງ, ຜູ້ຮຽນຈະປະເມີນຄວາມກ້າວໜ້າຂອງຕົນ ແລະ ຕັ້ງເປົ້າໝາຍສຳລັບການຝຶກຝົນທຸກວັນ.

ການຝຶກຝົນທຸກວັນ

ເພື່ອຮຽນພາສາອັງກິດໄດ້ດີທີ່ສຸດ, ຜູ້ຮຽນຕ້ອງພັດທະນານິໄສຂອງການຝຶກຝົນທຸກວັນ. ເພື່ອສ້າງນິໄສນີ້, ຜູ້ຮຽນຕ້ອງຊອກຫາວິທີທີ່ຈະປະສົມປະສານພາສາອັງກິດເຂົ້າໃນກິດຈະກຳປະຈຳວັນຂອງເຂົາເຈົ້າ. ຍົກຕົວຢ່າງ, ເມື່ອເຂົາເຈົ້າຟັງເພງ, ເຂົາເຈົ້າສາມາດຟັງເປັນພາສາອັງກິດ. ຜູ້ຮຽນຍັງສາມາດສົນທະນາພາສາອັງກິດແບບງ່າຍໆຢູ່ບ້ານ, ຢູ່ບ່ອນທຳງານ, ຫລື ຢູ່ໂບດນຳອີກ. (ເບິ່ງ ແນວຄິດເພີ່ມເຕີມໃນພາກ “ຄຳແນະນຳການສຶກສາ” ໃນຄູ່ມືຜູ້ຮຽນ EnglishConnect.) ສິ່ງສຳຄັນໃນການຝຶກຝົນທຸກວັນ ຄືການຊ່ວຍໃຫ້ຜູ້ຮຽນຊອກຫາວິທີທີ່ຈະໃຊ້ພາສາອັງກິດ ໃນຊີວິດປະຈຳວັນຕາມປົກກະຕິ.

ໃນສ່ວນໜຶ່ງຂອງການຝຶກຝົນທຸກວັນ, ຜູ້ຮຽນສາມາດສຳເລັດພາກ “Personal Study” (ການສຶກສາສ່ວນຕົວ) ທີ່ກ່ຽວຂ້ອງ ໃນຄູ່ມືຜູ້ຮຽນ. ເຂົາເຈົ້າກໍສາມາດສຳເລັດກິດຈະກຳບົດຮຽນ ແລະ ການປະເມີນຜົນທາງອອນລາຍໄດ້ທີ່ englishconnect.org/learner/resources ແລະ ໃນ ປຶ້ມບົດຝຶກຫັດ EnglishConnect 1 ແລະ ປຶ້ມບົດຝຶກຫັດ EnglishConnect 2.