ເຮົາຈະກຽມພ້ອມສຳລັບກຸ່ມສົນທະນາແນວໃດ?

ກຸ່ມສົນທະນາມີຄວາມສຳຄັນຕໍ່ປະສົບການໃນ EnglishConnect. ໃນກຸ່ມສົນທະນາ, ຜູ້ຮຽນມີໂອກາດທີ່ຈະຝຶກການສົນທະນາທີ່ມີຄວາມໝາຍ. ໃນຂະນະທີ່ເຂົາເຈົ້າພົບກັນ, ຜູ້ຮຽນສາມາດໄດ້ຮັບຄວາມໝັ້ນໃຈ, ຮຽນຮູ້ຈາກພຣະວິນຍານ, ແລະ ສະໜັບສະໜູນຊຶ່ງກັນແລະກັນ.

ການເວົ້າພາສາອັງກິດຊ່ວຍໃຫ້ຜູ້ຮຽນກ້າວໜ້າ ແລະ ເປັນວິທີສຳຄັນໃນການສະແຫວງຫາຂອງປະທານທາງດ້ານພາສາ. ທ່ານສາມາດນຳພາກຸ່ມສົນທະນາ ໂດຍການໃຊ້ພາອັງກິດງ່າຍໆ. ຖ້າຫາກຈຳເປັນ, ຜູ້ຮຽນສາມາດເບິ່ງຄຳແປຢູ່ໃນຄູ່ມືຜູ້ຮຽນ EnglishConnect ໃນພາສາແມ່ຂອງເຂົາເຈົ້າ. ຄຳແປມີໃຫ້ສຳລັບຈຸດປະສົງ, ຫລັກທຳຂອງການຮຽນຮູ້, ຄຳສັບ, ແລະ ຄຳແນະນຳ.

ກ່ອນກຸ່ມສົນທະນາຂອງທ່ານຈະພົບກັນ, ໃຫ້ທົບທວນແຕ່ລະພາກໃນຄູ່ມືຜູ້ຮຽນ EnglishConnect. ຂ້າງລຸ່ມແມ່ນຂັ້ນຕອນທີ່ຊ່ວຍທ່ານກຽມພ້ອມ:

ອະທິຖານ ແລະ ສະແຫວງຫາຄວາມຊ່ວຍເຫລືອຈາກພຣະເຈົ້າ.
ພິຈາລະນາວິທີທີ່ທ່ານຈະສົ່ງເສີມສັດທາ, ການຜູກມິດ, ແລະ ການເຕີບໂຕໃນກຸ່ມ.
1. ເຮົາຈະສາມາດເຊື້ອເຊີນພຣະວິນຍານໄດ້ແນວໃດ?
2. ເຮົາຈະສາມາດຊ່ວຍໃຫ້ຜູ້ຮຽນສະແຫວງຫາ ແລະ ຮັບຮູ້ຄວາມຊ່ວຍເຫລືອຈາກພຣະຜູ້ເປັນເຈົ້າໄດ້ແນວໃດ?
3. ເຮົາຈະສາມາດຊ່ວຍໃຫ້ຜູ້ຮຽນຮັກ ແລະ ສະໜັບສະໜູນຊຶ່ງກັນແລະກັນໄດ້ແນວໃດ?
4. ເຮົາຈະສາມາດຊ່ວຍຜູ້ຮຽນເວົ້າພາສາອັງກິດ ແລະ ປັບປຸງໄດ້ແນວໃດ?
ສຶກສາຫລັກທຳຂອງການຮຽນຮູ້.
1. ເຮົາເຄີຍປະສົບຫລັກທຳນີ້ແນວໃດ?
2. ເຮົາຈະສາມາດຊ່ວຍໃຫ້ຜູ້ຮຽນນຳໃຊ້ຫລັກທຳນີ້ໄດ້ແນວໃດ?
3. ເຮົາຈະສາມາດນຳໃຊ້ຫລັກທຳນີ້ໃນການສິດສອນຂອງເຮົາໄດ້ແນວໃດ?
ທົບທວນຄຳສັບ ແລະ ແບບແຜນ.
1. ເຮົາຈະສາມາດໃຊ້ຄຳສັບ ແລະ ແບບແຜນໃນການສົນທະນາດ້ວຍຄວາມໝັ້ນໃຈໄດ້ແນວໃດ?
ອ່ານກິດຈະກຳ 1–3.
1. ເຮົາຈະສາທິດແຕ່ລະກິດຈະກຳໄດ້ແນວໃດ?
2. ເຮົາຈະຈັບຄູ່ຜູ້ຮຽນເພື່ອການຝຶກຝົນໄດ້ແນວໃດ?
3. ເຮົາຈະສະໜັບສະໜູນຜູ້ຮຽນຂະນະທີ່ເຂົາເຈົ້າຝຶກຝົນໄດ້ແນວໃດ?
ທົບທວນພາກ “ປະເມີນ”.
1. ເຮົາຈະຊ່ວຍໃຫ້ຜູ້ຮຽນຮູ້ສຶກປະສົບຄວາມສຳເລັດໄດ້ແນວໃດ?
2. ເຮົາຈະຊ່ວຍໃຫ້ຜູ້ຮຽນໃຊ້ “ບົດຕິດຕາມການສຶກສາສ່ວນຕົວ” ຢູ່ໃນຄູ່ມືຜູ້ຮຽນໄດ້ແນວໃດ?
ທົບທວນພາກ “ກະທຳດ້ວຍສັດທາເພື່ອຝຶກຝົນພາສາອັງກິດທຸກວັນ”.
1. ເຮົາຈະຊຸກຍູ້ໃຫ້ຜູ້ຮຽນມີສ່ວນຮ່ວມເຮັດພາກ “ການສຶກສາສ່ວນຕົວ” ກ່ອນກຸ່ມຈະພົບກັນ ແລະ ຝຶກຝົນພາສາອັງກິດທຸກວັນໄດ້ແນວໃດ?
2. ເຮົາຈະຊຸກຍູ້ໃຫ້ຜູ້ຮຽນເພິ່ງອາໄສພຣະຜູ້ເປັນເຈົ້າໄດ້ແນວໃດ?

ທົບທວນພາກ “ແຫລ່ງຊ່ວຍເຫລືອກຸ່ມ” ໃນຄູ່ມືນີ້. (ແຫລ່ງຊ່ວຍເຫລືອເຫລົ່ານີ້ລວມຢູ່ໃນຄູ່ມືຜູ້ຮຽນ EnglishConnect.) ວາງແຜນວິທີທີ່ທ່ານຈະໃຊ້ແຫລ່ງຊ່ວຍເຫລືອເຫລົ່ານີ້. ພາກ “ວະລີກຸ່ມສົນທະນາ” ມີວະລີງ່າຍໆທີ່ສາມາດຊ່ວຍກຸ່ມໂຕ້ຕອບເປັນພາສາອັງກິດໄດ້. “ການອະທິຖານເປັນພາສາອັງກິດ” ມີແບບແຜນງ່າຍໆເພື່ອຊ່ວຍໃຫ້ຜູ້ຮຽນອະທິຖານເປັນພາສາອັງກິດ. ທ່ານສາມາດເຊື້ອເຊີນຜູ້ເຂົ້າຮ່ວມໃຫ້ທົບທວນພາກນີ້ ເພື່ອກຽມພ້ອມທີ່ຈະອະທິຖານເປີດ ຫລື ປິດ.

ແຫລ່ງຊ່ວຍເຫລືອການສິດສອນ ແລະ ຕົວຢ່າງເພີ່ມເຕີມມີຢູ່ໃນຫ້ອງສະໝຸດພຣະກິດຕິຄຸນ ແລະ ທີ່ englishconnect.org/teacher.

ໝູ່ເພື່ອນຈາກສາດສະໜາອື່ນ

ຜູ້ຮຽນສອງຄົນຝຶກຝົນການສົນທະນາໃນພາສາອັງກິດ

ການສຸມໃສ່ການຮຽນຮູ້ເທິງຮາກຖານສັດທາເປັນສິ່ງໜຶ່ງທີ່ເຮັດໃຫ້ EnglishConnect ມີເອກະລັກ. ທ່ານສາມາດລວມຜູ້ຄົນຈາກພື້ນຖານສາດສະໜາອື່ນໄດ້ ໂດຍການຊ່ວຍເຂົາເຈົ້າສະທ້ອນຄິດວ່າ ຫລັກທຳຂອງການຮຽນຮູ້ອາດນຳໃຊ້ກັບເຂົາເຈົ້າໄດ້. ທ່ານສາມາດໃຊ້ “ຄຳສັບຫລັກທຳຂອງການຮຽນຮູ້” ຢູ່ໃນຄູ່ມືຜູ້ຮຽນ EnglishConnect ເພື່ອຊ່ວຍໃຫ້ເຂົາເຈົ້າເຂົ້າໃຈຄຳສັບຂອງພຣະກິດຕິຄຸນ. ຕາມທີ່ພຣະວິນຍານຊົງນຳ, ໃຫ້ພິຈາລະນາທີ່ຈະເຊື້ອເຊີນເຂົາເຈົ້າໃຫ້ແບ່ງປັນສິ່ງທີ່ເຂົາເຈົ້າກຳລັງຮຽນຮູ້ ຂະນະທີ່ທ່ານສົນທະນາຫລັກທຳຂອງການຮຽນຮູ້. ສະແດງຄວາມເຄົາລົບຕໍ່ຄວາມເຊື່ອຂອງຜູ້ອື່ນ ຂະນະທີ່ແບ່ງປັນສັດທາຂອງທ່ານວ່າ ພຣະເຈົ້າສາມາດຊ່ວຍໃຫ້ເຂົາເຈົ້າຮຽນພາສາອັງກິດ.

ທ່ານສາມາດຊອກຫາແນວຄິດເພີ່ມເຕີມໄດ້ໃນຄຳນຳຂອງຄູ່ມື ຈົ່ງສິດສອນພຣະກິດຕິຄຸນຂອງເຮົາ; ເບິ່ງພາກ “ການໃຊ້ ຈົ່ງສິດສອນພຣະກິດຕິຄຸນຂອງເຮົາ ໂດຍສະມາຊິກຂອງສາດສະໜາຈັກ.”

ການເຮັດວຽກກັບຊາວໜຸ່ມ

EnglishConnect ສາມາດເປັນພອນໃຫ້ແກ່ຊີວິດຂອງຊາວໜຸ່ມ. ສະເຕກ, ຫວອດ, ແລະ ເຂດເຜີຍແຜ່ສາມາດຈັດກຸ່ມສະເພາະແຕ່ຊາວໜຸ່ມເທົ່ານັ້ນ. ຖ້າຫາກກຸ່ມຊາວໜຸ່ມ ແລະ ກຸ່ມຜູ້ໃຫຍ່ລວມເຂົ້າກັນ, ໃຫ້ພິຈາລະນາທີ່ຈະລວມກຸ່ມຊາວໜຸ່ມເຂົ້າກັນເພື່ອເຮັດກິດຈະກຳຝຶກຝົນ.

ຈົ່ງຈື່ຈຳໃຫ້ປະຕິບັດຕາມ ນະໂຍບາຍຂອງສາດສະໜາຈັກໃນການປົກປ້ອງຊາວໜຸ່ມ. ຜູ້ເຍົາ (ອາຍຸ 18 ປີຫລື ຕ່ຳກວ່າ ແລະ ອາໄສຢູ່ທີ່ບ້ານ) ຈະຕ້ອງມີໃບຟອມທີ່ຍິນຍອມຈາກພໍ່ແມ່ ກ່ອນທີ່ຈະເຂົ້າຮ່ວມກຸ່ມ. ໃບຟອມມີໃຫ້ໃນຫລາຍພາສາທາງອອນລາຍທີ່ englishconnect.org/resources/leader. ນອກເໜືອຈາກນີ້ແລ້ວ, ຫລັກສູດ EnglishConnect ຈະຕ້ອງປະຕິບັດຕາມນະໂຍບາຍຂອງສາດສະໜາຈັກ ທີ່ວ່າຜູ້ໃຫຍ່ທີ່ຮັບຜິດຊອບຢ່າງໜ້ອຍສອງຄົນຈະເຂົ້າຮ່ວມການປະຊຸມກຸ່ມສະເໝີ. ທ່ານຕ້ອງປະຕິບັດຕາມນະໂຍບາຍເຫລົ່ານີ້ ເຖິງແມ່ນວ່າກຸ່ມຈະປະຊຸມທາງອອນລາຍກໍຕາມ.