ເຮົາຈະນຳພາກຸ່ມສົນທະນາແນວໃດ?

ທ່ານຈະໃຊ້ EnglishConnect 1 ສຳລັບຜູ້ຮຽນ ຫລື EnglishConnect 2 ສຳລັບຜູ້ຮຽນ ເພື່ອນຳພາກຸ່ມ. ແຕ່ລະບົດຮຽນມີຮູບແບບດຽວກັນນີ້:

ຍິນດີຕ້ອນຮັບ: ຍິນດີຕ້ອນຮັບຜູ້ຮຽນຢ່າງອົບອຸ່ນ ແລະ ແນະນຳຜູ້ເຂົ້າຮ່ວມໃໝ່. ສ້າງຄວາມຄາດຫວັງວ່າ ທ່ານຈະເວົ້າພາສາອັງກິດ ແລະ ເຊື້ອເຊີນໃຫ້ທຸກຄົນໃຊ້ພາສາອັງກິດໃຫ້ໄດ້ຫລາຍທີ່ສຸດເທົ່າທີ່ຈະສາມາດເຮັດໄດ້. ແນະນຳຫົວຂໍ້ບົດຮຽນສັ້ນໆ.

ການອະທິຖານ: ເຊື້ອເຊີນຜູ້ຮຽນໃຫ້ອະທິຖານອອກສຽງ. ພະຍາຍາມເລືອກຜູ້ຮຽນທີ່ຮູ້ສຶກສະບາຍໃຈທີ່ຈະອະທິຖານເປັນພາສາອັງກິດ. ທ່ານສາມາດເຊື້ອເຊີນບຸກຄົນນັ້ນໃຫ້ກຽມພ້ອມລ່ວງໜ້າໄດ້ໂດຍການສຶກສາ “ການອະທິຖານເປັນພາສາອັງກິດ” ໃນພາກຫ້ອຍທ້າຍຂອງຄູ່ມືຜູ້ຮຽນ.

ຫລັກທຳຂອງການຮຽນຮູ້: ອ່ານ ແລະ ສົນທະນາຫລັກທຳຂອງການຮຽນຮູ້ ທີ່ຢູ່ໃນພາກ “Personal Study” (ການສຶກສາສ່ວນຕົວ) ໃນຄູ່ມືຜູ້ຮຽນ. ເປົ້າໝາຍຂອງຫລັກທຳຂອງການຮຽນຮູ້ ແມ່ນເພື່ອເຊື້ອເຊີນພຣະວິນຍານ ຂະນະທີ່ທ່ານແບ່ງປັນ ແລະ ຮຽນຮູ້ນຳກັນ “ໂດຍການສຶກສາ ແລະ ໂດຍສັດທານຳອີກ” (ຄຳສອນ ແລະ ພັນທະສັນຍາ 88:118).

ສະແດງຕົວຢ່າງວິທີສົນທະນາຫລັກທຳ ໂດຍການແບ່ງປັນສັ້ນໆວ່າ ທ່ານຈະຕອບຄຳຖາມຂອງການສົນທະນາຂໍ້ໃດຂໍ້ໜຶ່ງແນວໃດ. ໃຊ້ຄຳ ແລະ ວະລີງ່າຍໆ.

ເຊື້ອເຊີນໃຫ້ຜູ້ຮຽນແບ່ງປັນຄວາມຄິດ ແລະ ປະສົບການນຳກັນແລະກັນ. ຜູ້ຮຽນສາມາດສົນທະນາໃນພາສາແມ່ຂອງເຂົາເຈົ້າ. ຖ້າຫາກເຂົາເຈົ້າຮູ້ສຶກສະບາຍໃຈ, ຜູ້ຮຽນສາມາດເລືອກໃຊ້ຄຳ ຫລື ວະລີໃນພາສາອັງກິດ ຂະນະທີ່ເຂົາເຈົ້າສົນທະນາ.

ກິດຈະກຳທີ 1: ນຳພາຜູ້ຮຽນຜ່ານທາງກິດຈະກຳໃນພາກ “Conversation Group” (ກຸ່ມສົນທະນາ) ຂອງຄູ່ມືຜູ້ຮຽນ. ກິດຈະກຳແຕ່ລະຢ່າງກະກຽມຜູ້ຮຽນສຳລັບກິດຈະກຳຄັ້ງຕໍ່ໄປ. ກິດຈະກຳນີ້ຊ່ວຍໃຫ້ຜູ້ຮຽນກ້າວໜ້າຈາກການຝຶກຝົນຊ້ຳໄປຈົນເຖິງການສ້າງບົດສົນທະນາຂອງຕົນເອງ.

ໃນກິດຈະກຳທີ 1, ຊ່ວຍຜູ້ຮຽນທົບທວນຄຳສັບ ແລະ ແບບແຜນໃນພາກ “ການສຶກສາສ່ວນຕົວ” ຂອງຄູ່ມືຜູ້ຮຽນ. ເປົ້າໝາຍຄືເພື່ອກະກຽມຜູ້ຮຽນສຳລັບກິດຈະກຳທີ 2 ແລະ ທີ 3 ໂດຍການຊ່ວຍໃຫ້ເຂົາເຈົ້າເຂົ້າໃຈຄຳສຳຄັນຂອງສາມຄຳ ແລະ ເວົ້າແບບແຜນ.

ກິດຈະກຳທີ 2: ໃນກິດຈະກຳທີ 2, ຜູ້ຮຽນໃຊ້ຄຳສັບ ແລະ ແບບແຜນເພື່ອຝຶກການຖາມ ແລະ ການຕອບຄຳຖາມກັບຄູ່ ໂດຍການໃຊ້ຂໍ້ມູນທີ່ຈັດໃຫ້. ເປົ້າໝາຍແມ່ນເພື່ອໃຫ້ຜູ້ຮຽນສ້າງຫລາຍໆປະໂຫຍກໃນພາສາອັງກິດ ເທົ່າທີ່ເຂົາເຈົ້າສາມາດ.

ຊຸກຍູ້ຜູ້ຮຽນໃຫ້ປ່ຽນຄູ່ ເພື່ອເພີ່ມໂອກາດຝຶກຝົນ. ຂະນະທີ່ທ່ານໂຕ້ຕອບກັບຜູ້ຮຽນ, ພະຍາຍາມຊອກຫາຜູ້ທີ່ຕ້ອງການສະໜັບສະໜູນເພີ່ມເຕີມ. ໃຫ້ກຳລັງໃຈ ແລະ ຍົກລະດັບ.

ກິດຈະກຳທີ 3: ໃນກິດຈະກຳທີ 3, ຜູ້ຮຽນມີໂອກາດທີ່ຈະໃຊ້ຄຳສັບ ແລະ ແບບແຜນ ເພື່ອຈະມີການສົນທະນາແບບສົມບູນໃນສະຖານະການຊີວິດຈິງ. ເປົ້າໝາຍແມ່ນເພື່ອໃຫ້ຜູ້ຮຽນມີການສົນທະນາທີ່ມີຄວາມໝາຍໃນພາສາອັງກິດ.

ຊຸກຍູ້ຜູ້ຮຽນໃຫ້ປ່ຽນຄູ່ເລື້ອຍໆ ເພື່ອໃຫ້ເຂົາເຈົ້າມີໂອກາດຝຶກຝົນຫລາຍຂຶ້ນ. ໃນທ້າຍກິດຈະກຳທີ 3, ຕາມຫລັກການແລ້ວ ຜູ້ຮຽນທຸກຄົນຈະເວົ້າພາສາອັງກິດໂດຍທີ່ບໍ່ຕ້ອງໃຊ້ຄູ່ມືຂອງເຂົາເຈົ້າ. ກຸ່ມຄວນມີພະລັງ ແລະ ການເຄື່ອນໄຫວ ຂະນະທີ່ຜູ້ຮຽນປະຕິສຳພັນ ແລະ ຝຶກຝົນນຳກັນ. ຂະນະທີ່ທ່ານມີສ່ວນຮ່ວມກັບຜູ້ຮຽນ, ທ່ານອາດສັງເກດເຫັນວ່າ ບາງຄົນເຂົ້າໃຈດີ ແລະ ເກັ່ງໃນກິດຈະກຳນີ້. ໃຫ້ພິຈາລະນາທີ່ຈະທ້າທາຍຜູ້ຮຽນເຫລົ່ານີ້ໃຫ້ຮຽນຮູ້ຢ່າງເລິກເຊິ່ງ ໂດຍການໃສ່ລາຍລະອຽດເພີ່ມເຕີມ ຫລື ເຮັດກິດຈະກຳດຽວກັນໃນບໍລິບົດທີ່ແຕກຕ່າງ. ຍົກຕົວຢ່າງ, ເມື່ອຜູ້ຮຽນກຳລັງຝຶກຊ້ອມການພົບປະບາງຄົນ, ຂໍໃຫ້ເຂົາເຈົ້າຝຶກຊ້ອມສະຖານະການທີ່ແຕກຕ່າງ ເຊັ່ນ ການພົບກັບເພື່ອນໃໝ່ ຫລື ເຈົ້ານາຍໃໝ່.

ສຳລັບແຕ່ລະກິດຈະກຳ:

ສາທິດວິທີເຮັດກິດຈະກຳ.
ຈັດຜູ້ຮຽນເປັນຄູ່ ຫລື ກຸ່ມນ້ອຍໆເພື່ອຝຶກຝົນ.
ສັງເກດເບິ່ງແຕ່ລະກຸ່ມ ແລະ ໃຫ້ການສະໜັນສະໜູນ.

ປະເມີນ: ຊ່ວຍໃຫ້ຜູ້ຮຽນປະເມີນຄວາມກ້າວໜ້າ ແລະ ຄວາມພະຍາຍາມຂອງຕົນ. ຊ່ວຍໃຫ້ເຂົາເຈົ້າຮູ້ສຶກປະສົບຄວາມສຳເລັດ ໂດຍການຊີ້ໃຫ້ເຫັນສິ່ງທີ່ເຂົາເຈົ້າສາມາດເຮັດໄດ້ເພື່ອປັບປຸງ. ຊ່ວຍໃຫ້ຜູ້ຮຽນໃຊ້ “Personal Study Tracker” (ບົດຕິດຕາມການສຶກສາສ່ວນຕົວ) ເພື່ອຕັ້ງເປົ້າໝາຍສຳລັບການສຶກສາທຸກວັນ.

ກະທຳດ້ວຍສັດທາເພື່ອຝຶກຝົນພາສາອັງກິດທຸກວັນ: ອ່ານຂໍ້ຄວາມອອກສຽງກັບກຸ່ມຂອງທ່ານ. ສະແດງສັດທາຂອງທ່ານວ່າ ພຣະຜູ້ເປັນເຈົ້າສາມາດຊ່ວຍເຂົາເຈົ້າຮຽນພາສາອັງກິດ. ເຊື້ອເຊີນໃຫ້ເຂົາເຈົ້າຝຶກພາສາອັງກິດທຸກວັນ ແລະ ກະກຽມສຳລັບບົດຮຽນຕໍ່ໄປ ໂດຍການເຮັດກິດຈະກຳ “Personal Study” (ການສຶກສາສ່ວນຕົວ) ໃຫ້ສຳເລັດ.

ການອະທິຖານ: ເຊື້ອເຊີນໃຫ້ຜູ້ຮຽນກ່າວຄຳອະທິຖານປິດເປັນພາສາອັງກິດ. ເລືອກຜູ້ຮຽນທີ່ຮູ້ສຶກໝັ້ນໃຈ ຫລື ຄົນທີ່ທ່ານເຊື້ອເຊີນໄວ້ລ່ວງໜ້າ.

ບົດຮຽນ EnglishConnect ຖືກອອກແບບໂດຍການໃຊ້ຫລັກທຳຂອງການຮຽນພາສາທີ່ພິສູດແລ້ວ. ທ່ານຈະປະສົບຄວາມສຳເລັດເມື່ອທ່ານເຮັດຕາມບົດຮຽນ ແລະ ສ້າງສະພາບແວດລ້ອມແຫ່ງສັດທາ, ການຜູກມິດ, ແລະ ການເຕີບໂຕ.

ກຸ່ມອອນລາຍ

ຖ້າຈຳເປັນ, ກຸ່ມສາມາດປະຊຸມທາງອອນລາຍ ໂດຍການໃຊ້ຖານການປະຊຸມໄລຍະໄກ. ໃຫ້ຈື່ໄວ້ວ່າ EnglishConnect ຈະປະສົບຄວາມສຳເລັດຫລາຍທີ່ສຸດ ເມື່ອຜູ້ຮຽນທຸກຄົນໂຕ້ຕອບ ແລະ ຝຶກຝົນການສົນທະນາ. ໃຫ້ແນ່ໃຈວ່າມີການປະຕິສຳພັນຕະຫລອດທົ່ວປະສົບການ. ວິທີທີ່ດີທີ່ສຸດໃນການອຳນວຍຄວາມສະດວກໃນການປະຕິສຳພັນຄືແຍກຜູ້ຮຽນເປັນຄູ່ໆ ຫລື ເປັນກຸ່ມນ້ອຍໆ. ໃຊ້ຫ້ອງກຸ່ມຍ່ອຍ ແລະ ເຄື່ອງມືອື່ນໆ ເພື່ອຊ່ວຍໃຫ້ຜູ້ຮຽນເວົ້າລົມກັນໃຫ້ຫລາຍທີ່ສຸດ. ຍົກຕົວຢ່າງ, ແທນທີ່ຈະໃຫ້ຜູ້ຮຽນເວົ້າຂະນະທີ່ທັງກຸ່ມຟັງ, ໃຫ້ແຍກຜູ້ຮຽນອອກເປັນກຸ່ມໆ ສອງຄົນ ຫລື ຫລາຍກວ່ານັ້ນ ເພື່ອສົນທະນາ. ແລ້ວໃຫ້ເຕົ້າໂຮມກຸ່ມສຳລັບກິດຈະກຳຕໍ່ໄປ. ຊຸກຍູ້ໃຫ້ແຕ່ລະຄົນໃຊ້ວິດີໂອຖ້າເປັນໄປໄດ້.

ໃຊ້ “ຄຳແນະນຳໃນການເປັນຜູ້ນຳກຸ່ມອອນລາຍ” ຂະນະທີ່ທ່ານກະກຽມ ແລະ ນຳພາກຸ່ມ EnglishConnect ອອນລາຍ.

ແບ່ງປັນ “ຄູ່ມືຜູ້ເຂົ້າຮ່ວມກຸ່ມອອນລາຍ” ກັບຜູ້ຮຽນຂອງທ່ານ ໂດຍການໃສ່ລິ້ງໃນແຊັດ ລະຫວ່າງການປະຊຸມຂອງທ່ານ. ອ້າງອີງເຖິງມັນເມື່ອຈຳເປັນ.

ໃຊ້ “ການນຳສະເໜີກຸ່ມສົນທະນາ” ໃນ EnglishConnect 1 ແລະ 2 ທີ່ຖືກອະນຸມັດ ທີ່ englishconnect.org/resources/teaching-materials. ທ່ານສາມາດສະແດງການນຳສະເໜີເພື່ອຊ່ວຍນຳພາຜູ້ຮຽນຕະຫລອດທົ່ວກິດຈະກຳໃນແຕ່ລະບົດຮຽນ.