Li k’a’ru rajlal napatz’man

Moko aajel ta ru naq ak xatk’anjelak jo’ aj k’utunel re k’utuk sa’ EnglishConnect. Maare maajun wa xak’ut li Ingles, ut ink’a’ nakanaw b’ar taatikib’. Maak’a’ naxye. Xe’k’uub’aman chi eek’anb’il li tzolok re EnglishConnect rik’ineb’ li na’leb’ re k’utuk aatinob’aal ut li musiq’ejil na’leb’ li tate’xtenq’a chi elk chi uub’ej. Moko tento ta naq tz’aqalaq aawe aawu. Moko tento ta taanaw xsumenkil chixjunileb’ li patz’om. Laa k’anjel a’an xwaklesinkil li tzolok aatinob’aal rik’in xk’eeb’aleb’ xhoonal laj tzolonel chixyalb’al aatinak. Moko tento ta taak’ut li gramatica chi moko taataw ru chixjunil chirix li Ingles. Sa’ xna’aj a’an, jayali aawib’ sa’ xwaklesinkil jun na’ajej b’ar wi’ laj tzolonel ink’a’ te’xutanaaq naq te’aatinaq sa’ Ingles ut b’ar wi’ naru te’tzoloq rik’in li sachk neke’xk’ul.

Li xtzolb’al li Ingles rik’in ka’ajwi’ li Ingles nab’aanuman chiru chixjunil li ruchich’och’. Relik chi yaal, jwal chaab’il a’in xb’aan naq chi jo’kan k’a’jo’ wi’chik naq eb’ laj tzolonel te’rab’i ut te’roksi li Ingles. Chijultiko’q aawe naq tat-aatinaq sa’ Ingles rik’in aatin ut ch’ol aatin moko ch’a’ajeb’ ta. Oksiheb’ li jalam-uuch, eek’asiheb’ laa wuq’ ut laa tib’el re xtenq’ankileb’ laj tzolonel chixtawb’aleb’ ru li ak’ aatin ut eetalil. Naru nakak’ut jun li jalam-uuch, nakayiib’ jun jalam-uuch, malaj nakak’utb’esi jun na’leb’. Naru nakab’eresiheb’ laj tzolonel re te’ril li k’a’ru jaltesinb’il ru sa’ EnglishConnect 1 choq’ reheb’ laj tzolonel malaj EnglishConnect 2 choq’ reheb’ laj tzolonel, malaj naru nakawoksi jun tusleb’aal aatin sa’ internet. A’in tixk’ut ajwi’ chiruheb’ laj tzolonel chan ru naq te’roksiheb’ li k’anjeleb’aal re xtawb’al xsumenkileb’ lix patz’om. Match’olob’an chi naab’al. K’utb’esi b’an chiruheb’ laj tzolonel k’a’ru te’xb’aanu.

Chijultiko’q aawe naq yookex chi tzolok sa’ komonil. B’oqeb’ laj tzolonel chi kok’ aj xsa’ chixsik’b’al li Qaawa’ jo’ xtenq’eb’. Jo’ aj k’utunel, naru nakaweetali li paab’ank ut li yalok q’e. Li aatinak sa’ Ingles rik’ineb’ laj tzolonel a’an jun k’anjel re paab’aal. Li Qaawa’ tatrosob’tesi laa’at jo’eb’ ajwi’ laj tzolonel naq nakayal aaq’e rik’in paab’aal re aatinak sa’ Ingles.

Taatenq’aheb’ chi us laj tzolonel naq nakayal aatinak sa’ Ingles naq nab’aanuman li aatinak sa’ ch’uut. Naru nakab’aanu a’in jo’ jun eetalil. Yal aaq’e chi aatinak ka’ajwi’ sa’ Ingles. Oksiheb’ li aatin moko ch’a’ajeb’ ta ut li ch’ol aatin kok’eb’. Aatinan chi timil ut ka’sutiheb’ li ch’ol aatin chi kok’ aj xsa’. Tz’iib’aheb’ chiru li pizarron li aajel ruhil aatin ut ch’ol aatin. Naru ajwi’ nakawoksi jun jalam-uuch, nakayiib’ jun jalam-uuch, malaj nakak’utb’esi li na’leb’. Match’olob’an chi naab’al ut maajaltesi ru chixjunil li nakaye. Wi tento taawoksi li raatinob’aleb’, patz’ xliceenseb’ xb’een wa ut oksi li aatinob’aal yal b’ayaq ajwi’ toja’ naq tat-ok wi’chik chiroksinkil li Ingles. Waklesi xch’ooleb’ laj tzolonel chiroksinkil li Ingles jo’ k’ihal naru chiruheb’ ut naq me’xk’oxlak wi te’sachq. Tenq’aheb’ chireek’ankil naq chaab’ileb’, ut chak’e xsahileb’ xch’ool xb’aan lix yalb’aleb’ xq’e. Wi eb’ laj tzolonel neke’raj ru xkomon chik lix tenq’, ye reheb’ naq te’rileb’ li k’anjenel hu reheb’ laj tzolonel, b’ar wi’ te’xtaw li k’a’ru natzolman sa’ raatinob’aleb’ a’an. Naq nakasik’ xtenq’ankileb’ laj tzolonel chi tzolok rik’in li te’xb’aanu, ink’a’ tento taawoksi li raatinob’aleb’ naab’al sut.

Li xtzolb’al jun ch’uut jalan jalanqeb’ li raatinob’aaleb’ a’an texxtenq’a chi aatinak sa’ Ingles xb’aan naq chi jo’kan li Ingles a’an li aatinob’aal naru neke’raatina wi’ rib’ chirib’ileb’ rib’. Jo’ aj k’utunel, oksi li k’anjenel hu reheb’ laj tzolonel li tz’iib’anb’il sa’ Ingles. Tenq’aheb’ laj tzolonel chiroksinkil li k’anjenel hu reheb’ laj tzolonel sa’ raatinob’aaleb’ a’an, wi wan, re naq naru te’rileb’ li aatin li jaltesinb’ileb’ ru. Wi naru, k’eheb’ laj tzolonel sa’ kok’ ch’uut re te’aatinaq chirix li na’leb’ re tzolok sa’ raatinob’aaleb’ a’an, a’b’an k’e reetal naq maa’ani nakana xjunes. Wi wan ka’ajwi’ jun aj aatinanel re jun reheb’ li aatinob’aal sa’ li ch’uut, k’e li ch’uut a’an chi aatinak chirix li na’leb’ re tzolok sa’ Ingles re naq chixjunileb’ naru te’tz’aqonq.

Re xtzolb’al li Ingles, eb’ laj tzolonel tento te’xk’e xch’ool chixyalb’al roksinkil wulaj wulaj. Waklesi xch’ooleb’ laj tzolonel chixb’aanunkil a’an rik’in xtawb’al chan ru te’roksi li Ingles sa’ li k’a’ru neke’xb’aanu wulaj wulaj sa’ xyu’ameb’ (chi’ilmanq li raqal “Xyalb’al roksinkil wulaj wulaj”). Qayehaq, eb’ laj tzolonel naru neke’rileb’ li kaxmu malaj neke’rab’i li b’ich sa’ Ingles. Naru nakawaklesi xch’ooleb’ laj tzolonel chiroksinkil li tusulal wankeb’ wi’ li na’leb’ re xchaab’ilob’resinkil li tzolok wulaj wulaj li natawman chirix li “Personal Study Tracker” sa’ xtiklajik li k’anjenel hu reheb’ laj tzolonel. Oksi li tusulal a’in re xtenq’ankileb’ laj tzolonel chixtawb’aleb’ li chaab’il na’leb’ naru neke’xb’aanu re roksinkil li Ingles wulaj wulaj.

Naq ch’utch’uukex, b’oqeb’ laj tzolonel chixtzolb’al ut chixyalb’al roksinkil li Ingles wulaj wulaj, ut patz’ reheb’ chan ru yookeb’ chixb’aanunkil. Naru nakapatz’ re wiib’ oxib’ laj tzolonel naq te’xwotz k’a’ru xe’xb’aanu re roksinkil wulaj wulaj. Naru nakatikib’ junaq ch’uut sa’ internet, maare jun chat, choq’ reheb’ laj tzolonel sa’ li ch’uut. Aatinan rik’ineb’ laa jolominel re xtawb’al chan ru naru nakatenq’a li ch’uut chiraatinankileb’ rib’ chirib’ileb’ rib’ chiru li xamaan rik’in li texto malaj k’a’ruhaq chik. Naru nakatenq’aheb’ laj tzolonel naq neke’xyal xtz’aqob’resinkileb’ ru lix jayalihomeb’, a’b’an chijultiko’q aawe, lix tzolb’aleb’ teneb’anb’il sa’ xb’eeneb’ xjuneseb’ a’an.

K’uub’ aana’leb’ rik’in laj jolominel re li Iglees sa’ li na’ajej wankat wi’ re xk’uub’ankileb’ ut xk’anjelankileb’ li ch’uut re EnglishConnect. Wi naru, te’b’oqe’q wiib’ laj k’utunel li ninqeb’ choq’ re li junjunq chi ch’uut. K’oxla li rajomeb’ ru laj tzolonel ut k’a’ru naru nab’aanuman b’ar wi’ wankex naq nakasik’ ru li na’ajej, li hooril, ut li seeb’alil.

Eb’ li tzolok re EnglishConnect neke’b’ay chalen 60 toj 90 k’asal. Taaqe li na’leb’ chirix jo’ najtil li junjunq chi k’anjel. B’aanu chixjunileb’ li kok’ k’anjel; yal taawoksi li hoonal ka’ch’in wi ka’ch’in xhoonalil li ch’uut, ut taawoksi li hoonal najt roq wi najt roq xhoonalil li ch’uut.

K’e reetal: K’uub’ aana’leb’ rik’ineb’ li neke’jolomin sa’ xb’een li k’anjel, ut k’oxla rajomeb’ ru laj tzolonel ut li naru nab’aanuman b’ar wi’ wankex naq nakasik’ ru chan ru taa’uxq chixjunil.

Eb’ li ch’uut neke’xch’utub’ rib’ jun sut chiru li xamaan. Wi neke’raj, naru neke’xch’utub’ rib’ chi kok’ aj xsa’ chik. Re naq q’axal chaab’ilaqeb’ li ch’utam, tento naq wanq tz’aqal xhoonaleb’ laj tzolonel re xb’aanunkil li raqal “Personal Study” rub’elaj li junjunq chi ch’utam.

Wankeb’ 25 chi tzolok sa’ EnglishConnect 1 jo’ ajwi’ sa’ EnglishConnect 2. Wi eb’ li ch’uut neke’ch’utla jun sut chiru li xamaan, li jun tasal nab’ay waqib’ po. Wi eb’ li ch’uut neke’ch’utla wiib’ sut chiru li xamaan, nab’ay oxib’ po. Wi na’ajman, naru taajache’q li k’anjeleb’aal sa’ kok’ raqal, malaj tasal. Qayehaq, naru nakak’uub’ jun ch’uut li taach’utlaaq jun sut rajlal xamaan chiru oxib’ po re xb’aanunkil li raqal 1 toj 3. Xb’aanunkil a’in naru naxtenq’aheb’ laj tzolonel chixteneb’ankil rib’ chi tz’aqonk.

K’e reetal: Wi taab’aanu jun ch’utam li ink’a’ natikla rik’in li raqal 1, maare us naq xb’een wa li ch’uut taatiklaaq rik’in li tzolok 1. A’in tixtenq’aheb’ laj tzolonel chixnawb’al chan ru te’roksi li k’anjenel hu. K’uub’ aana’leb’ rik’ineb’ li neke’jolomin sa’ xb’een li k’anjel, ut k’oxla rajomeb’ ru laj tzolonel ut li naru nab’aanuman b’ar wi’ wankex naq nakasik’ ru chan ru taa’uxq chixjunil.

Wi neke’raj, li ch’uut naru neke’xtzol wiib’ oxib’ li tzolok naq neke’ch’utla. Re naq q’axal chaab’ileb’ li ch’utam, tento naq wanq tz’aqal xhoonaleb’ laj tzolonel rub’elaj li junjunq chi ch’utam re xb’aanunkil li raqal “Personal Study” choq’ re li junjunq chi tzolok.

Chi’ilmanq “Jarub’ sut tento tixch’utub’ rib’ lin ch’uut?” re xtawb’al xkomon chik li na’leb’ chirix li hooril ut seeb’alil.

Re ok sa’ EnglishConnect 1, na’ajman naq jun kristiaan naxnaw ilok ru hu sa’ raatinob’aal ut naru naril li alfabeto ut eb’ li aatin moko ch’a’ajeb’ ta sa’ Ingles. EnglishConnect 2 a’an choq’ reheb’ li kristiaan li naru neke’xyaab’asi ch’ol aatin moko ch’a’ajeb’ ta ut naru neke’xsumeheb’ li patz’om moko ch’a’ajeb’ ta sa’ Ingles. Re xsik’b’al ru ma taa’ok jun kristiaan sa’ EnglishConnect 1 malaj EnglishConnect 2, naru nakawoksi li tz’ilok-ix chirix li seeb’al chi aatinak li wan sa’ xtiqb’al li aatin B.

EnglishConnect 3 a’an xyi li tzolok li naxtenq’aheb’ li kristiaan chixtawb’al xkomon chik xseeb’aleb’ re tzolok rik’in li Ingles. Re okenk sa’ EnglishConnect 3, li kristiaan tento te’xtz’iib’a rib’ ut te’elq chi uub’ej sa’ jun yalb’a-ix. Li kristiaan naru te’xtz’iib’a rib’ sa’ englishconnect.org/join.

Wankeb’ oxib’ lix tasalil EnglishConnect re xtenq’ankileb’ laj tzolonel chi xik chi uub’ej. EnglishConnect 1 ut 2 neke’xtenq’aheb’ laj tzolonel chixtawb’al xseeb’aleb’ rik’in li Ingles. EnglishConnect 3 naxtenq’aheb’ laj tzolonel chixtawb’al xkomon chik xseeb’aleb’ re tzolok rik’in li Ingles. Naxtenq’aheb’ laj tzolonel chixkawresinkil rib’ choq’ re BYU–Pathway Worldwide. (Tzol xkomon chik li na’leb’ chirix BYU–Pathway Worldwide sa’ byupathway.org.)

EnglishConnect 3 a’an jun k’anjel moko terto ta xtz’aq sa’ internet, rik’in li ch’utlaak re aatinak sa’ internet malaj sa’ jun ch’utleb’aal kab’l. Sa’ EnglishConnect 3 wankeb’ li k’anjeleb’aal re tzolok sa’ internet ut nak’ehe’ xna’leb’ laj tzolonel sa’ li ab’ink, aatinak, ilok ru hu, ut tz’iib’ak. Eb’ laj tzolonel neke’ru chi xik chi uub’ej sa’ li k’anjel chi timil malaj chi seeb’ jo’ te’raj. Eb’ laj tzolonel naru neke’xb’aanu EnglishConnect 3 jo’ k’ihal sut te’raj re xtz’aqob’resinkileb’ ru lix jayalihom. Wi te’xtz’aqob’resi ru EnglishConnect 3, eb’ laj tzolonel ink’a’ tento te’xb’aanu li tz’ilok-ix re Ingles naq neke’xtz’iib’a rib’ sa’ BYU–Pathway Worldwide.

Re xkawresinkileb’ rib’ choq’ re EnglishConnect 3, eb’ laj tzolonel tento te’xtz’aqob’resi ru EnglishConnect 1 ut 2—jo’eb’ ajwi’ li kok’ k’anjel sa’ li hu re tzolok, tz’aqaleb’ li k’anjel re ilok ru hu ut tz’iib’ak. Waklesi xch’ooleb’ laj tzolonel sa’ EnglishConnect 2 naq te’xtz’iib’a rib’ sa’ EnglishConnect 3 sa’ englishconnect.org/join.

EnglishConnect 3 a’an k’eeb’il xb’aan BYU–Pathway Worldwide chi tenq’anb’il xb’aaneb’ laj jolominel ut eb’ li misioneer aj tenq’anel sa’ li Iglees. Eb’ laj jolominel li te’raj naru te’tenq’anq rik’ineb’ li gerente de bienestar y autosuficiencia sa’ xna’ajeb’ re xk’eeb’al EnglishConnect 3 b’ar wi’ wankeb’.

K’uub’anb’ileb’ li tzolok re naq eb’ li ak’ aj tzolonel naru neke’ok sa’ jun ch’uut re EnglishConnect yalaq jo’q’e. Wi eb’ laj tzolonel neke’raj ok sa’ li ch’uut chirix naq xtikla, k’e xchaab’il k’ulunikeb’, k’e reheb’ li hu EnglishConnect 1 choq’ reheb’ laj tzolonel malaj EnglishConnect 2 choq’ reheb’ laj tzolonel (malaj k’ut chiruheb’ chan ru te’xtaweb’ sa’ li Biblioteca del Evangelio), ut tenq’aheb’ chi tz’aqonk. Laa’at malaj jun reheb’ laj tzolonel naru naxtenq’aheb’ li ak’ aj tzolonel chi okenk rik’in li ch’uut rik’in xk’utb’al chiruheb’ chan ru te’xkawresi rib’ choq’ re li tzolok chal re. Jo’kan ajwi’, eb’ laj tzolonel naru neke’xb’aanu wi’chik jun tasal wi neke’raj ru xkomon chik xtzolb’aleb’.

Wan naq ch’a’aj chiruheb’ laj tzolonel wulak sa’ li ch’uut, ut maare ink’a’ te’raj sutq’iik xb’aan li xutaan malaj li xiw. Maare te’xk’oxla naq jwal xe’kana chi ixb’ej ut ink’a’ te’xtaw lix komoneb’. Aatinan rik’ineb’ laj tzolonel a’an ut b’oqeb’ chi chalk sa’ li tzolok chal re, us ta naab’al sut ink’a’ xe’wulak. Yeechi’i laa tenq’ ut waklesi xch’ooleb’. Ye reheb’ naq xk’uub’aman EnglishConnect re naq eb’ laj tzolonel te’ruuq chi okenk wi’chik yalaq jo’q’e. Eb’ laj tzolonel naru te’xtikib’ wi’chik rik’in wulak sa’ li ch’uut ut xkawresinkileb’ rib’ choq’ re li tzolok chal re. K’oxla xpatz’b’al re jun malaj xkomon chik aj tzolonel sa’ li ch’uut naq te’raatina li ani ink’a’ xwulak ut naq te’xk’e xsahil xch’ool.

K’e reetal: Maawotz li na’leb’ chirix jun kristiaan wi moko ak k’eeb’il ta xliceens chi tz’iib’anb’il.

Wankeb’ laj tzolonel li neke’raj xkomon chik li hoonal re xtawb’al ru ut aatinak sa’ jun aatinob’aal. Eb’ laj tzolonel a’in q’axal te’usaaq wi te’xb’aanu li raqal “Personal Study” rub’elaj naq te’tz’aqonq sa’ li ch’uut re aatinak. Patz’ reheb’ naq te’xyal roksinkileb’ li aatin ut ch’ol aatin rub’elaj naq taach’utlaaq li ch’uut. Sa’ li tzolok, k’eheb’ laj tzolonel a’in chi k’anjelak rochb’eeneb’ laj tzolonel li naru neke’xwaklesi xch’ooleb’ ut neke’xtenq’aheb’. Waklesi xch’ooleb’ laj tzolonel chixb’aanunkil li jo’ k’ihal naru chiruheb’ ut naq te’xk’e reetal naq li sachk a’an xcha’al li tzolok. Naru ajwi’ nakasik’ ru xtz’ilb’aleb’ rix ut xk’iilasutinkileb’ li kok’ k’anjel. Jultika reheb’ laj tzolonel naq xb’aanunkil li raqal “Personal Study” rub’elaj li tz’aqonk sa’ li aatinak sa’ ch’uut chal re aajel ru re te’elq chi uub’ej.

Naq yookat chi k’anjelak rik’ineb’ laj tzolonel, maare taak’e reetal naq wankeb’ laj tzolonel li neke’xtaw ru chixjunil ut li neke’xb’aanuheb’ chi chaab’il li kok’ k’anjel. K’oxla xpatz’b’al reheb’ laj tzolonel a’in naq te’xchamob’resi lix tzolb’aleb’ rik’in xyeeb’al xkomon chik li aatin malaj xb’aanunkil li k’anjel a’an rik’in jalan chik na’leb’. Qayehaq, naq eb’ laj tzolonel neke’xyal raatinankil rib’ jo’ chanru naq yookeb’ chixnawb’al rib’ xb’een sut, patz’ reheb’ naq te’xyal xnawb’al ru jun ak’ amiiw malaj jefe. Eb’ laj tzolonel a’in naru neke’xkawob’resi xnawomeb’ chirix li Ingles rik’in xtenq’ankileb’ laj tzolonel li timil yookeb’ chi tzolok. Chixjunileb’ laj tzolonel naru te’usaaq rik’in xtzolb’aleb’ li rech aj tzolonel ut xtenq’ankileb’ li jun siir chik chixyalb’al roksinkileb’ li aatin ut eetalil sa’ Ingles.

Ak re naq te’wanq laj tzolonel jalan jalanq xseeb’aleb’ chi aatinak sa’ Ingles ut rik’in a’an naru te’xtenq’a rib’ chirib’ileb’ rib’. Li tenq’ank-ib’ naru tixk’eheb’ chixk’ulub’ankileb’ rib’ chirib’ileb’ rib’ ut chi k’iik. Chixjunjunqaleb’ naru neke’tenq’an. Qayehaq, wankeb’ laj tzolonel maare neke’ru chixkawob’resinkil xch’ooleb’ li ras riitz’in xb’aan naq te’xyal xq’e us ta te’sachq chi jo’q’ehaq. K’eheb’ laj tzolonel sa’ kok’ ch’uut jalan jalanqeb’. Naru nakak’eheb’ laj tzolonel chi k’anjelak rik’in anihaq li juntaq’eet xseeb’al re naq te’xtenq’a rib’ chirib’ileb’ rib’ chi chaab’ilo’k. Malaj naru nakak’eheb’ laj tzolonel chi k’anjelak rik’in anihaq jalan xseeb’al. Laj tzolonel li ka’ch’in xseeb’al taatenq’aaq rik’in li na’leb’ ut li tenq’ k’eeb’ilaq re. Laj tzolonel li wan xseeb’al taa’usaaq rik’in xtzolb’al li jun chik ut xch’olob’ankil li na’leb’ sa’ Ingles. Chijultiko’q aawe naq ak re naq te’wanq laj tzolonel jalan jalanqeb’ xna’leb’ sa’ laa ch’uut ut a’anaq raj jun chaab’ilal b’ar wi’ te’usaaq laj tzolonel rik’in xtenq’ankil rib’ chirib’ileb’ rib’.

Sa’ xna’aj xch’olob’ankil chi numtajenaq li gramatica malaj aatinak chi naab’al chirixeb’ li regla, b’eresiheb’ laj tzolonel rik’ineb’ li eetalil. Eb’ laj tzolonel ink’a’ te’sachq k’iila sut wi te’xtaaqeheb’ li eetalil. Jwal chaab’il wi’chik li tzolok rik’in xyalb’al roksinkil li aatinob’aal chiru aatinak chirix li aatinob’aal. Wi taach’olob’ li gramatica, ch’olob’ chi saqen, sa’ junpaat, ut rik’in na’leb’ naru te’roksi. Wi taak’ut jun na’leb’, k’e reheb’ li ch’ol aatin ut patz’ reheb’ laj tzolonel naq te’xyal xk’anjelankil li na’leb’ rik’ineb’ a’an. Eb’ laj tzolonel jwal te’usaaq rik’in rab’inkil ut roksinkil li Ingles.

Maawoksi naab’al hoonal chixyeeb’al resil lix majaleleb’ chi yaab’asink aatin. Jultika reheb’ laj tzolonel naq li tawe’k-u jwal nim wi’chik xwankil chiru li yaab’asink chi tz’aqal re ru. Waklesi xch’ooleb’ laj tzolonel chixyalb’al xyaab’asinkileb’ li aatin naq neke’tzolok sa’ junesal re naq naru te’xb’aanu chi timil malaj chi seeb’ jo’ neke’raj. Chijultiko’q aawe naq wi eb’ laj tzolonel yookeb’ xk’a’uxl chirix xyaab’asinkileb’ li aatin chi tz’aqal re ru, maare te’wiib’anq xch’ool chirix li aatinak sa’ ch’uut. Waklesi xch’ooleb’ laj tzolonel chiroksinkileb’ li k’anjeleb’aal re yaab’asink aatin sa’ internet sa’ englishconnect.org/learner/resources.

Oksi li k’anjeleb’aal QuickReg (quickreg.englishconnect.org) re xtz’iib’ankil ut xk’anjelankil laa ch’uut re EnglishConnect. QuickReg a’an jun k’anjeleb’aal re xtz’iib’ankileb’ li ch’uut li k’ulub’anb’il xb’aan Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Naru nakawoksi QuickReg re:

• Xk’uub’ankil jun ch’uut: Sik’ ru li kutan, li hooril, ut li na’ajej choq’ re laa ch’uut.

• Xk’anjelankil jun ch’uut: Il li na’leb’ chirixeb’ li te’tz’aqonq ut ak’ob’resi li na’leb’ chirix li ch’uut.

• Xb’oqb’aleb’ li kristiaan chi tz’aqonk: Tz’iib’anb’ilaq laa ch’uut sa’ internet sa’ englishconnect.org/join. Naru nakawotz jun li enlace re xb’oqb’aleb’ li kristiaan chixtz’iib’ankileb’ rib’ sa’ laa ch’uut.

• Xk’eeb’aleb’ li certificado: Sa’ xraqik laa ch’uut, naru nakataweb’ ut nakawisiheb’ chi huhil li certificado.

EnglishConnect 1 ut 2: Sa’ xraqik li ch’uut, eb’ laj tzolonel naru neke’xk’ul li certificado re tz’aqonk. Eb’ laj jolominel, laj especialista, malaj laj k’utunel naru neke’xjek’iheb’ li certificado. Wankeb’ li tenamit b’ar wi’ moko naru ta neke’jek’iman li certificado re EnglishConnect. Tz’ileb’ rix lix chaq’rab’il laa tenamit rub’elaj naq taajek’iheb’ li certificado (chi’ilmanq englishconnect.org/leader/approved-locations).

K’e reetal: Re xtawb’al ut xjek’inkileb’ li certificado, tento naq xb’een wa tz’iib’anb’ilaq laa ch’uut sa’ li k’anjeleb’aal QuickReg sa’ quickreg.englishconnect.org. (Chi’ilmanq “Chan ru tintz’iib’a ut tink’anjela lin ch’uut re EnglishConnect?” sa’ li raqal a’in re li k’a’ru rajlal napatz’man.)

EnglishConnect 3: Eb’ laj tzolonel naru te’xk’ul li certificado naq te’xtz’aqob’resiheb’ ru li tasal aajeleb’ ru sa’ li ch’uut. Wi te’xtz’aqob’resi ru EnglishConnect 3, eb’ laj tzolonel ink’a’ tento te’xb’aanu li tz’ilok-ix re Ingles naq neke’xtz’iib’a rib’ sa’ BYU–Pathway Worldwide.