Chan ru tinkawresi wib’ choq’ re li aatinak sa’ chuut?

Li aatinak sa’ ch’uut a’an jun raqal tz’aqal aajel ru sa’ EnglishConnect. Naq neke’aatinak sa’ ch’uut, eb’ laj tzolonel neke’ru chixyalb’al roksinkil ch’ol aatin wankeb’ xyaalal. Naq neke’ch’utla laj tzolonel, neke’kawu xch’ooleb’, neke’tzolok rik’in li Musiq’ej, ut neke’xtenq’a rib’ chirib’ileb’ rib’.

Li aatinak sa’ Ingles naxtenq’aheb’ laj tzolonel chi xik chi uub’ej ut aajel ru sa’ xsik’b’al li maatan re li jalanil aatinobʼaal. Naru nakab’eresi li aatinak sa’ ch’uut rik’in roksinkil li Ingles li moko ch’a’aj ta. Wi na’ajman ru, eb’ laj tzolonel naru neke’ril li aatin li jaltesinb’il ru toj sa’ raatinob’aaleb’ a’an sa’eb’ li k’anjenel hu re EnglishConnect choq’ reheb’ laj tzolonel. Jaltesinb’ileb’ ru li ajom, li na’leb’ re tzolok, li ak’ aatin, ut li ch’olob’ank.

Rub’elaj naq teech’utub’ eerib’ re aatinak, tz’il rix li junjunq chi raqal sa’eb’ li k’anjenel hu re EnglishConnect choq’ reheb’ laj tzolonel. Eb’ li na’leb’ a’in naru tate’xtenq’a chixkawresinkil aawib’:

1. Li tijok ut xsik’b’al xtenq’ li Dios.

2. Xk’oxlankil chan ru taawaklesi li paab’ank, li k’ulub’ank, ut li k’iik sa’ li ch’uut.

   1. Chan ru naru tinb’oq li Musiq’ej?

   2. Chan ru naru tintenq’aheb’ laj tzolonel chixsik’b’al ut chixk’eeb’al reetal lix tenq’ li Qaawa’?

   3. Chan ru naru tintenq’aheb’ laj tzolonel chixraab’aleb’ ut chixtenq’ankileb’ rib’ chirib’ileb’ rib’?

   4. Chan ru naru tintenq’aheb’ laj tzolonel chi aatinak sa’ Ingles ut chi chaab’ilo’k?

3. Xtzolb’al li na’leb’ re tzolok.

   1. Chan ru naq innumsihom li na’leb’ a’in?

   2. Chan ru naru tintenq’aheb’ laj tzolonel chixyu’aminkil li na’leb’ a’in?

   3. Chan ru naru nawoksi li na’leb’ naq nink’utuk?

4. Xtz’ilb’aleb’ rix li aatin ut li eetalil.

   1. Ma naru nawoksi chi chaab’il eb’ li aatin ut eetalil naq nin’aatinak?

5. Rilb’aleb’ li kok’ k’anjel 1–3.

   1. Chan ru tink’utb’esiheb’ li kok’ k’anjel?

   2. Chan ru tink’eheb’ laj tzolonel sa’ ka’kab’il re te’xyal aatinak?

   3. Chan ru tintenq’aheb’ laj tzolonel naq neke’xyal aatinak?

6. Xtz’ilb’al rix li raqal “Tz’ilok-ix.”

   1. Chan ru tintenq’aheb’ laj tzolonel chireek’ankil naq yookeb’ chi elk chi uub’ej?

   2. Chan ru tintenq’aheb’ laj tzolonel chiroksinkil li “Tusleb’aal re xtz’ilb’al rix laa tzolb’al” sa’ li k’anjenel hu reheb’ laj tzolonel.

7. Xtz’ilb’al rix li raqal “K’anjela laa paab’aal re roksinkil li Ingles wulaj wulaj.”

   1. Chan ru tinwaklesi xch’ooleb’ laj tzolonel re te’xb’aanu li raqal “Tzolok sa’ junesal” rub’elaj naq te’xch’utub’ rib’, ut re te’xyal roksinkil li Ingles wulaj wulaj?

   2. Chan ru tinwaklesi xch’ooleb’ laj tzolonel chixkanab’ankil rib’ sa’ ruq’ li Qaawa’?

Xtz’ilb’al rix li raqal “Eb’ li k’anjeleb’aal choq’ re li ch’uut” sa’ li hu a’in. (Neke’tawman ajwi’ li k’anjeleb’aal a’in sa’eb’ li k’anjenel hu re EnglishConnect choq’ reheb’ laj tzolonel.) K’uub’ chan ru taawoksiheb’ li k’anjeleb’aal a’in. Sa’ li raqal “Ch’ol aatin choq’ re li aatinak sa’ ch’uut” wankeb’ li ch’ol aatin moko ch’a’ajeb’ ta naru neke’oksiman re xtenq’ankileb’ laj tzolonel chi aatinak sa’ Ingles. Sa’ “Li tijok sa’ Ingles” wankeb’ li eetalil re xtenq’ankileb’ laj tzolonel chi tijok sa’ Ingles. Naru nakab’oqeb’ laj tzolonel chixtz’ilb’al rix li raqal a’in re xkawresinkileb’ rib’ re tijok sa’ xtiklajik malaj xraqik li ch’utam.

Wankeb’ xkomon chik li k’anjeleb’aal re k’utuk ut eetalil sa’ li Biblioteca del Evangelio ut sa’ englishconnect.org/teacher.

Eb’ li amiiw re jalan jalanq paab’aal

Jalan li EnglishConnect xb’aan naq li tzolok jayalinb’il ajwi’ rik’in li paab’ank. Naru nakatenq’aheb’ li kristiaan re jalan jalanq paab’aal chireek’ankil naq kulb’ileb’ rik’in xtenq’ankileb’ chixk’oxlankil chan ru naq li na’leb’ re tzolok nak’anjelak sa’ xyu’ameb’. Naru nakawoksi li “Tusleb’aal reheb’ li na’leb’ re tzolok” li natawman sa’eb’ li k’anjenel hu re EnglishConnect choq’ reheb’ laj tzolonel re xtenq’ankileb’ chixtawb’aleb’ ru li aatin re li evangelio. Jo’ b’eresinb’ilat xb’aan li Musiq’ej, naru nakab’oqeb’ chixwotzb’al k’a’ru yookeb’ chixtzolb’al naq nekex’aatinak chirix li na’leb’ re tzolok. Junelik taawoxloq’i lix paab’aaleb’ laj tzolonel naq yooqat chixwotzb’al laa paab’aal naq li Dios naru tixtenq’aheb’ chixtzolb’al li Ingles.

Naru nakataw xkomon chik li na’leb’ sa’ xtikljik li hu Predicad Mi Evangelio; chi’ilmanq li raqal “Uso de Predicad Mi Evangelio por parte de los miembros de la Iglesia.”

Li k’anjelak rik’ineb’ li saaj

EnglishConnect naru narosob’tesi xyu’ameb’ li saaj. Eb’ li oqech, teep, ut mision naru neke’xk’uub’eb’ li ch’uut choq’ reheb’ ka’ajwi’ li saaj. Wi junajinb’ileb’ li ninq ut li saaj, k’oxla xk’eeb’aleb’ li saaj sa’ ka’kab’il naq yookeb’ chixyalb’al roksinkil li Ingles.

Tento taataaqe lix chaq’rab’il li Iglees re xkolb’aleb’ rix li saaj. Eb’ li saaj (18 chihab’ xyu’am malaj maji’ neke’xket a’an ut wankeb’ sa’ rochoch xna’ xyuwa’) tento naq te’xk’am jun xjuch’b’il hu k’eeb’il wi’ xliceens xb’aan xna’ xyuwa’ rub’elaj naq te’tz’aqonq sa’ li ch’uut. Naru neke’tawman li hu sa’ naab’al li aatinob’aal sa’ englishconnect.org/resources/leader. Jo’kan ajwi’, eb’ li ch’uut re EnglishConnect tento te’xtaaqe lix chaq’rab’il li Iglees naq junelik wankeb’ wiib’ li kristiaan ninq naq neke’ch’utla li ch’uut. Tento taataaqeheb’ li chaq’rab’ink a’in us ta li ch’uut nach’utla sa’ internet.