Chan ru tinb’eresi li aatinak sa’ chuut?

Taawoksi EnglishConnect 1 choq’ reheb’ laj tzolonel malaj EnglishConnect 2 choq’ reheb’ laj tzolonel re xb’eresinkil li ch’uut. Li junjunq chi tzolok nak’eeman chi jo’ka’in:

K’ehok chaab’il k’ulunik: K’e xchaab’il k’ulunikeb’ laj tzolonel ut k’eheb’ chixnaw aniheb’ li ak’. K’eheb’ chixnaw naq laa’at tat-aatinaq sa’ Ingles ut b’oqeb’ chixjunil chiroksinkil ajwi’ li Ingles jo’ k’ihal naru chiruheb’. K’eheb’ chixnaw sa’ junpaat k’a’ru teetzol.

Tijok: Patz’ re jun aj tzolonel naq taatijoq chi kaw xyaab’ xkux. Sik’ ru jun aj tzolonel li ink’a’ naxxuwa xyaab’asinkil jun tij sa’ Ingles. Naru nakapatz’ re li kristiaan naq tixkawresi rib’ chi rub’elaj rik’in rilb’al “Li tijok sa’ Ingles” sa’ xtiqb’al li aatin sa’eb’ li k’anjenel hu reheb’ laj tzolonel.

Na’leb’ re tzolok: Ilomaq ut tz’ilomaq rix li na’leb’ re tzolok li wan sa’ li raqal “Personal Study” ( Tzolok sa’ junesal ) sa’eb’ li k’anjenel hu reheb’ laj tzolonel. Li rajom li na’leb’ re tzolok a’an xb’oqb’al li Musiq’ej naq nekexwotzok ut nekextzolok sa’ komonil “rik’in li tzolok jo’ ajwi’ rik’in li paab’aal” (Tzol’leb’ ut Sumwank 88:118).

K’utb’esi chan ru te’aatinaq chirix li na’leb’ rik’in xwotzb’al sa’ junpaat chan raj ru taasume jun reheb’ li patz’om. Oksiheb’ li aatin ut ch’ol aatin moko ch’a’ajeb’ ta.

B’oqeb’ laj tzolonel chixwotzb’al lix k’oxlahomeb’ ut lix numsihomeb’ chirib’ileb’ rib’. Eb’ laj tzolonel naru neke’raatina rib’ sa’ raatinob’aaleb’ a’an. Wi neke’raj, laj tzolonel naru neke’roksiheb’ li aatin malaj ch’ol aatin sa’ Ingles naq yookeb’ chi aatinak.

K’anjel 1: B’eresiheb’ laj tzolonel sa’eb’ li kok’ k’anjel wankeb’ sa’ li raqal “Conversation Group” (Aatinak sa’ ch’uut) sa’eb’ li k’anjenel hu reheb’ laj tzolonel. Li junjunq chi k’anjel naxkawresiheb’ laj tzolonel choq’ re li k’anjel jun chik. Eb’ li kok’ k’anjel neke’xtenq’aheb’ laj tzolonel re naq ink’a’ yal te’xye li xe’xtzol, te’ok b’an chixyeeb’al xkomon chik li k’oxlanb’il tz’aqal xb’aaneb’.

Sa’ li k’anjel 1, tenq’aheb’ laj tzolonel chixtz’ilb’aleb’ rix li aatin ut eetalil sa’ li raqal “Tzolok sa’ junesal” sa’ li k’anjenel hu reheb’ laj tzolonel. Li ajom a’an xkawresinkileb’ laj tzolonel choq’ re li k’anjel 2 ut 3 rik’in xtenq’ankileb’ chixtawb’al ru wiib’ oxib’ li xnimal ru aatin ut chixyeeb’aleb’ li eetalil.

K’anjel 2: Sa’ li k’anjel 2, eb’ laj tzolonel neke’roksiheb’ li aatin ut li eetalil re xyalb’al patz’ok ut sumenk rik’in jun ochb’een ut li na’leb’ k’eeb’il reheb’. Li ajom a’an naq te’xye jo’ k’ihal li ch’ol aatin sa’ Ingles naru chiruheb’.

Waklesi xch’ooleb’ laj tzolonel chixjalb’aleb’ li rochb’een re te’rab’i ut te’xye jalan chik li aatin. Naq yookat chi k’anjelak rik’ineb’ laj tzolonel, k’e reetal ani naraj xkomon chik lix tenq’. Waklesi xch’ooleb’ ut xmusiq’eb’.

K’anjel 3: Sa’ li k’anjel 3, eb’ laj tzolonel te’roksiheb’ li aatin ut eetalil re aatinak tz’aqal jo’ chanru te’xb’aanu raj sa’ xyu’ameb’. Li ajom a’an naq tenq’anb’ilaqeb’ chi aatinak rik’in seeb’al sa’ Ingles.

Waklesi xch’ooleb’ laj tzolonel chixjalb’aleb’ li rochb’een chi kok’ aj xsa’ re te’rab’i ut te’xye jalan chik li aatin. Sa’ xraqik li k’anjel 3, chixjunileb’ laj tzolonel yooqeb’ raj chi aatinak sa’ Ingles chi ink’a’ neke’rileb’ lix k’anjenel hu. Us li eek’asink-ib’ sa’ li ch’uut naq eb’ laj tzolonel neke’raatina rib’. Naq yooqat chi k’anjelak rik’ineb’ laj tzolonel, maare taak’e reetal naq wankeb’ li neke’xtaw ru chi us ut yookeb’ chi elk chi uub’ej sa’ li k’anjel. Naru nakak’e xb’oqb’aleb’ laj tzolonel a’in chixchamob’resinkil lix tzolb’aleb’ rik’in xyeeb’al xkomon chik li aatin malaj xb’aanunkil li k’anjel a’an rik’in jalan chik na’leb’. Qayehaq, naq eb’ laj tzolonel neke’xyal raatinankil rib’ jo’ chanru naq yookeb’ chixnawb’al rib’ xb’een sut, patz’ reheb’ naq te’xyal a’an rik’in jalan chik na’leb’, jo’ xnawb’al ru jun ak’ amiiw malaj jefe.

Tz’ilok-ix: Tenq’aheb’ laj tzolonel chixtz’ilb’al rix lix kiijikeb’ ut lix yalb’aleb’ xq’e. Tenq’aheb’ chireek’ankil naq chaab’ileb’ rik’in xk’utb’al chiruheb’ k’a’ru naru te’xchaab’ilob’resi. Tenq’aheb’ laj tzolonel chiroksinkil li “Personal Study Tracker” (Tusleb’aal re xtz’ilb’al rix laa tzolb’al) re te’xxaqab’ lix jayalihom re roksinkil li Ingles wulaj wulaj.

K’anjela li paab’aal re roksinkil li Ingles wulaj wulaj: Yaab’asi li aatin chiru laa ch’uut. Wotz laa paab’aal naq li Qaawa’ naru tixtenq’aheb’ chixtzolb’al li Ingles. B’oqeb’ chiroksinkil li Ingles wulaj wulaj ut chixkawresinkileb’ rib’ choq’ re li tzolok jun chik rik’in xb’aanunkileb’ li kok’ k’anjel sa’ “Personal Study” (Tzolok sa’ junesal).

Tijok: Patz’ re jun aj tzolonel naq taatijoq sa’ Ingles sa’ xraqik. Sik’ ru jun aj tzolonel li kaw xch’ool malaj jun li xab’oq rub’elaj li ch’utam.

K’uub’anb’ileb’ li tzolok re EnglishConnect rik’ineb’ li na’leb’ ak yalb’ileb’ rix chirix li tzolok aatinob’aal. Tat-elq chi uub’ej wi taataaqe li k’uub’anb’il tzolok ut wi taawaklesi jun na’ajej re paab’ank, k’ulub’ank, ut k’iik.