“Chan ru naru tinkawresi wib’ jo’ aj k’utunel?,” EnglishConnect choq’ reheb’ laj k’utunel (2023)
“Chan ru naru tinkawresi wib’ jo’ aj k’utunel?,” EnglishConnect choq’ reheb’ laj k’utunel
Chan ru naru tinkawresi wib’ jo’ aj k’utunel?
Jo’ chanru naq neke’chaab’ilo’ laj tzolonel rik’in xnumik li hoonal, taanimanq xkawilal laa ch’ool ut tatchaab’ilo’q rik’in xnumik li hoonal. Li Qaawa’ tatxtenq’a naq nakatk’anjelak ut nakatenq’aheb’ laj tzolonel sa’ laa ch’uut. A’an tatxtzol “chi junjunqil li raqal, chi junjunqil li naʼlebʼ” (2 Nefi 28:30). Paab’ naq laa Choxahil Yuwa’ tatxtenq’a naq yooqat chixsik’b’al li Musiq’ej ut chixyalb’al aaq’e chi chaab’ilo’k.
Li na’leb’ re xk’utb’al jun li aatinob’aal
Arin wankeb’ junjunq li na’leb’ naru neke’oksiman re xk’utb’al li Ingles. Wankeb’ li tzoleb’aal re aatinob’aal li neke’xjayali rib’ rik’in xk’utb’al li gramatica, xtzolb’aleb’ li aatin, malaj xyaab’asinkileb’ li aatin, a’b’an eb’ li ch’uut re aatinak re EnglishConnect jayalinb’ileb’ rik’in xtenq’ankileb’ laj tzolonel chiroksinkil li aatinob’aal re xb’aanunkil li k’a’ru nim xwankil. Naq taawoksiheb’ li na’leb’ a’in, taanimanq aaseeb’al chixtenq’ankileb’ laj tzolonel.
Li aatinak sa’ Ingles
Li aatinak sa’ Ingles naxtenq’aheb’ laj tzolonel chi xik chi uub’ej ut aajel ru sa’ xsik’b’al li maatan re li jalanil aatinobʼaal. Yal aaq’e chi aatinak ka’ajwi’ sa’ Ingles ut b’oqeb’ laj tzolonel chixb’aanunkil ajwi’ a’an. Oksiheb’ li aatin moko ch’a’ajeb’ ta ut ch’ol aatin moko ninqeb’ ta. Aatinan chi timil ut ka’sutiheb’ li aatin ut ch’ol aatin jo’ na’ajman ru. Chirix xyeeb’al jun patz’om, k’e xhoonaleb’ laj tzolonel chi k’oxlak ut chi sumenk. Oksiheb’ li aatin ut li eetalil yookeb’ chixtzolb’al laj tzolonel. Naq nakab’eresiheb’ li kok’ k’anjel, naru nakawoksi xch’olob’ankileb’ li kok’ k’anjel li jaltesinb’il ru li wan sa’eb’ li k’anjenel hu re EnglishConenct reheb’ laj tzolonel.
Xk’utb’esinkileb’ li kok’ k’anjel
Xk’utb’esinkil chiruheb’ laj tzolonel li k’a’ru te’xb’aanu a’an jwal chaab’il chiru yal xyeeb’al reheb’ k’a’ru te’xb’aanu. Oksiheb’ li eetalil sa’ xtiklajikeb’ li kok’ k’anjel re xk’utb’esinkil k’a’ru te’xb’aanu laj tzolonel naq neke’xyal roksinkil li aatinob’aal. Naru nakat-aatinak jo’ ruuchil xkab’ichaleb’ laj aatinanel sa’ li eetalil, malaj naru nakapatz’ reheb’ laj tzolonel naq tate’xtenq’a chixk’utb’esinkil.
Xwaklesinkil xch’ooleb’ chi aatinak
Taanimanq xkawilal xch’ooleb’ laj tzolonel ut te’tzoloq chi seeb’ wi’chik naq te’xyal roksinkil li aatinob’aal. Maak’oxla naq tento taatuqub’ chixjunileb’ li sachk; ka’ajwi’ taatenq’aheb’ laj tzolonel chixyalb’aleb’ xq’e chi aatinak. K’e reetal li hoonal re naq lix k’ihal lix hoonalil li ch’utam na’oksiman re aatinank-ib’.
K’e chi uxk li k’iilasutink
Li k’iilasutink taatenq’anq chixnimob’resinkil xkawilal xch’ooleb’ ut xseeb’aleb’ chi aatinak. Waklesi xch’ooleb’ laj tzolonel chixjalb’al k’iila sut li rochb’eeneb’ sa’ li aatinank-ib’. Wi te’xjal rochb’eeneb’, laj tzolonel te’ruuq chirab’inkileb’ ut chixyeeb’aleb’ ak’ na’leb’. Naq eb’ laj tzolonel neke’roksi li k’a’ru neke’xnaw rik’in jalan jalanq kristiaan, a’an naxtenq’aheb’ chixkawob’resinkil li k’a’ru yookeb’ chixtzolb’al. A’an naxk’e ajwi’ chi nimank lix kawilal xch’ooleb’ ut li ramiiwuleb’ rib’.
Xwaklesinkil xch’ooleb’ laj tzolonel
Eb’ laj tzolonel neke’raj ru reek’ankil laa rahom ut laa tenq’. Tenq’aheb’ laj tzolonel chi numtaak sa’ xb’een xxiweb’ rik’in saho’k chirix chixjunil lix yalb’aleb’ xq’e chi aatinak sa’ Ingles. K’e reetal ut k’anjelan rik’in li junjunq chi ch’uut ut ab’iheb’ laj tzolonel naq neke’raatina rib’. Nimaheb’ ru chi kok’ aj xsa’. Tz’aqon sa’ li aatinak rik’ineb’ ut tenq’aheb’ chireek’ankil naq yookeb’ chi chaab’ilo’k. Ye reheb’ chan ru naq yookeb’ chi tzolok ut chi chaab’ilo’k. Naq nakaraheb’ ut nakawaklesi xch’ooleb’ laj tzolonel, nakawaklesi jun na’ajej re paab’ank, k’ulub’ank, ut k’iik.
Xkawresinkil aawibʼ joʼ jun aj kʼutunel jo’ li Kristo
Jo’ jun aj k’utunel re EnglishConnect, osob’esinb’ilat chi k’anjelak chiruheb’ laa was aawiitz’in. Li na’leb’ chirix li k’utuk jo’ li Kristo nak’anjelak sa’ laa yu’am. Naru nakatzol ut nakak’anjela li na’leb’ li natawman sa’ Li K’utuk jo’ li Kolonel (2022). Chi b’eresinb’il xb’aan laj jolominel sa’ li tijonelil li wan sa’ aab’een, naru nakatwulak sa’eb’ li ch’uut reheb’ laj k’utunel. Naru ajwi’ nakatz’il aawix chi jo’q’ehaq ut nakak’e reetal chan ru tatchaab’ilo’q rik’in “Xchaab’ilob’resinkil aawib’ jo’ aj k’utunel jo’ li Kristo—Jun tz’ilok-ix” (Li K’utuk jo’ li Kolonel, 37). K’e reetaleb’ laa chaab’ilal. K’e reetal chan ru nakawaj chaab’ilo’k ut k’uub’ chan ru taak’anjela li yookat chixtzolb’al.
Chijultiko’q aawe, li k’a’ru jwal aajel ru naru nakab’aanu, a’an xraab’aleb’ laj tzolonel ut xsik’b’al laa b’eresinkil xb’aan li Musiq’ej naq nakawaklesi li paab’ank, li k’ulub’ank, ut li k’iik.