Kʼaʼru lix kʼanjel laj kʼutunel?

Waklesi xch’ooleb’ laj tzolonel chixsik’b’al ut chixk’eeb’al reetal lix tenq’ li Qaawa’ naq neke’xtzol li Ingles. Waklesi xch’ooleb’ chixyu’aminkileb’ li na’leb’ re tzolok “rik’in li tzolok jo’ ajwi’ rik’in li paab’aal” (Tzol’leb’ ut li Sumwank 88:118). Tenq’aheb’ laj tzolonel chixk’eeb’al reetal lix rahom, lix wankil, ut li ruxtaan li Qaawa’ sa’ lix yu’ameb’. Patz’ reheb’ naq te’xwotz li k’a’ru xe’xk’ul li xkawresi lix paab’aaleb’. Wotz chan ru naq xak’ul lix tenq’ li Qaawa’. (Chi’ilmanq li raqal “Xtenq’ankileb’ li komon chi chalk rik’in li Kristo” li wan sa’ Li K’utuk jo’ li Kolonel [2022].)

B’oq li Musiq’ej rik’in xtenq’ankileb’ laj tzolonel chixraab’aleb’ ut chixtenq’ankileb’ rib’ chirib’ileb’ rib’. Tenq’aheb’ chireek’ankil lix rahom li Dios. Waklesi jun na’ajej re k’ulub’aak b’ar wi’ chixjunileb’ te’reek’a naq k’ulb’ileb’. Naweb’ ru laj tzolonel ut tenq’aheb’ chixnawb’aleb’ ru chirib’ileb’ rib’. Tenq’aheb’ chixnimob’resinkil xkawilal xch’ooleb’ naq neke’xyal roksinkil li Ingles, naq neke’sach, ut naq neke’chaab’ilo’ sa’ komonil. (Chi’ilmanq li raqal “Xraab’aleb’ li tzolbʼilebʼ aabʼaan” li wan sa’ Li K’utuk jo’ li Kolonel [2022].)

Tenq’aheb’ laj tzolonel chiroksinkil li paab’aal re aatinak sa’ Ingles ut re chaab’ilo’k. Wankeb’ laj tzolonel li maare neke’wiib’an xch’ool chirix xwankilaleb’ re xtzolb’al li Ingles. Naru nakatenq’aheb’. Naq nakawaatinaheb’ sa’ Ingles, nakak’ut laa paab’aal naq li Dios naru naxtenq’aheb’ chi tzolok. Waklesi xch’ooleb’ laj tzolonel chi aatinak sa’ Ingles. K’e xsahileb’ xch’ool xb’aan lix yalb’aleb’ xq’e. Tenq’aheb’ laj tzolonel chixjultikankil k’a’ut naq yookeb’ chixtzolb’al li Ingles. Waklesi xch’ooleb’ chixxaqab’ankileb’ xjayalihomeb’ ut chiroksinkil li Ingles wulaj wulaj. (Chi’ilmanq li raqal “Xbʼoqbʼalebʼ re teʼxyal xqʼe chi tzolok” li wan sa’ Li K’utuk jo’ li Kolonel [2022].)