“K’a’ru naxb’aanu laj tzolonel?,” EnglishConnect choq’ reheb’ laj k’utunel (2023)
“K’a’ru naxb’aanu laj tzolonel?,” EnglishConnect choq’ reheb’ laj k’utunel
K’a’ru naxb’aanu laj tzolonel?
Jo’ aj k’utunel re EnglishConnect, tento taataw ru k’a’ru neke’xb’aanu laj tzolonel re naq tatruuq chixtenq’ankileb’ chi elk chi uub’ej. Eb’ laj tzolonel te’elq chi uub’ej naq neke’xb’aanuheb’ li kok’ k’anjel sa’ li tzolok sa’ junesal, naq neke’tz’aqon sa’ li aatinak sa’ ch’uut, ut naq neke’ok chiroksinkil li Ingles wulaj wulaj. Wan wiib’ xjachal li junjunq chi tzolok sa’ EnglishConnect 1 choq’ reheb’ laj tzolonel ut EnglishConnect 2 choq’ reheb’ laj tzolonel: “Personal Study” (Tzolok sa’ junesal) ut “Conversation Group” (Aatinak sa’ ch’uut). Tz’il rix li “Xch’olob’ankil” sa’eb’ li k’anjenel hu re EnglishConnect choq’ reheb’ laj tzolonel re naq taataw ru k’a’ru neke’xk’ul laj tzolonel.
Xsikʼbʼal xkʼulbʼal li nawom rikʼin li tzolok ut rikʼin ajwiʼ li paabʼaal
Lix k’ub’elal li EnglishConnect a’an xtenq’ankileb’ laj tzolonel “chixsikʼbʼal xkʼulbʼal lix nawomeb’, rikʼin li tzolok ut rikʼin ajwiʼ li paabʼaal” (Tzol’leb’ ut Sumwank 88:118). Li junjunq chi tzolok re EnglishConnect jayalinb’il rik’in jun na’leb’ re tzolok. A’aneb’ musiq’ejil na’leb’ li nokohe’xtenq’a chixkanab’ankil naq li Qaawa’ tixnimob’resi li qawankilal chi tzolok ut chi k’utuk. Eb’ li na’leb’ re tzolok naru nokohe’xtenq’a chixtawb’al ru li tz’aqal qawankilal ut lix seeb’al li Kolonel re qatenq’ankil. Junjunq reheb’ li na’leb’ re tzolok li taqatzol ut taqayu’ami sa’ EnglishConnect a’aneb’ a’in:
Laa’at jun ralal li Dios
Laa’in jun ralal li Dios ut wan lin junelikil wankilal ut ajom.
(Chi’ilmanq Romanos 8:16–17; “Li Junkab’al: Jun Jek’inb’il Aatin choq’ re li Ruchich’och’.”)
Xk’anjelankil li paabʼaal chirix li Jesukristo
Li Jesukristo naru nikinixtenq’a chixb’aanunkil chixjunil naq nink’anjela lin paab’aal chirix a’an
(Chi’ilmanq Filipenses 4:13; Eter 12:27; Moroni 7:33.)
Xk’ulb’al li teneb’aak
Wan xtaql inch’ool, ut teneb’anb’il sa’ inb’een laa’in li k’a’ru tintzol.
(Chi’ilmanq 2 Nefi 2:14, 16; Tzol’leb’ ut Sumwank 58:27–28.)
Xraab’al ut xtzolb’al qib’ chiqib’il qib’
Naru nintaw inna’leb’ rik’in li Musiq’ej naq ninrahok, nink’utuk, ut nintzolok wochb’eeneb’ li was wiitz’in.
(Chi’ilmanq Jwan 13:34–35; Jwan 14:26–27; Tzol’leb’ ut Sumwank 84:106; 88:77, 122–23.)
Xik chi uub’ej
Chi tenq’anb’ilin xb’aan li Dios, naru ninxik chi uub’ej us ta wankeb’ li ch’a’ajkilal.
(Chi’ilmanq 2 Nefi 31:20; 32:9; Tzol’leb’ ut Sumwank 50:41–42.)
Aatinak rik’in li Qaawa’
Ninchaab’ilob’resi lin tzolb’al naq nin’aatinak rik’in li Dios wulaj wulaj chirix li ninb’aanu.
(Chi’ilmanq Proverbios 3:5–6; Mateo 7:7–8; Alma 37:37.)
Tzolok sa’ junesal
Rub’elaj li aatinak sa’ ch’uut, laj tzolonel neke’xb’aanu li raqal “Personal Study” (Tzolok sa’ junesal) wankeb’ sa’ li k’anjenel hu reheb’ laj tzolonel. Sa’ li raqal a’an, neke’xtzol jun na’leb’ re tzolok, neke’xjultikaheb’ li ak’ aatin, ut neke’xyal roksinkileb’ li ch’ol aatin.
Xjultikankileb’ li ak’ aatin ut xyalb’al roksinkileb’ li ch’ol aatin a’an jun chaab’il k’anjel re xb’aanunkil sa’ junesal. A’in naxtenq’aheb’ laj tzolonel chixtzolb’aleb’ li na’leb’ chi seeb’ malaj chi timil jo’ neke’raj.
Aatinak sa’ ch’uut
Sa’ li aatinak sa’ ch’uut, eb’ laj tzolonel neke’xb’aanuheb’ li kok’ k’anjel re “Conversation Group” (Aatinak sa’ ch’uut) wankeb’ sa’ li k’anjenel hu reheb’ laj tzolonel. Sa’ kok’ ch’uut malaj sa’ ka’kab’il, neke’aatinak chirix jun na’leb’ re tzolok, neke’xtz’ileb’ rix li aatin ut ch’ol aatin, ut neke’xyal aatinak. Li junjunq chi k’anjel naxkawresiheb’ choq’ re li k’anjel jun chik. Sa’ xraqik li aatinak sa’ ch’uut, eb’ laj tzolonel neke’xk’e reetal lix k’iijikeb’ ut neke’xxaqab’ xjayalihom re roksinkil li Ingles wulaj wulaj.
Xyalb’al roksinkil wulaj wulaj
Re xtzolb’al li Ingles chi us, eb’ laj tzolonel tento te’xk’e xch’ooleb’ chixyalb’al roksinkil wulaj wulaj. Re xb’aanunkil a’in, eb’ laj tzolonel tento te’xtaw chan ru te’ruuq chiroksinkil li Ingles sa’ li k’a’ru neke’xb’aanu wulaj wulaj. Qayehaq, naq neke’rab’i li b’ich, naru neke’rab’i sa’ Ingles. Naru ajwi’ neke’aatinak sa’ Ingles sa’ ochoch, sa’ trab’aaj, malaj sa’ iglees. (Wankeb’ xkomon chik li na’leb’ sa’ li raqal “Na’leb’ re tzolok” sa’eb’ li k’anjenel hu re EnglishConnect choq’ reheb’ laj tzolonel.) Re naq te’xyal roksinkil li Ingles wulaj wulaj, tento taatenq’aheb’ chixk’eeb’al reetal chan ru naru neke’roksi sa’ li k’a’ru neke’xb’aanu wulaj wulaj.
Jo’ xcha’al xyalb’al roksinkil li Ingles wulaj wulaj, eb’ laj tzolonel naru neke’xb’aanu li raqal “Personal Study” (Tzolok sa’ junesal) sa’ li k’anjenel hu reheb’ laj tzolonel. Naru ajwi’ neke’xb’aanu li junjunq chi k’anjel ut tz’ilok-ix sa’ internet sa’ englishconnect.org/learner/resources ut sa’ li Hu re tzolok re EnglishConnect 1 ut Hu re tzolok re EnglishConnect 2.