Genesis 12–17; Abraham 1–2

“Kpukpru nnyin inyene odudu ito edu eke ufɔkemana nnyin [ye] eke ido nnyin,” Elder Neil L. Andersen ekekpep, “ndien edi ami mmenim ke odu itie kiet ke esit idem nnyin emi nnyin ikarade inyuŋ ibotde isio-isio nte ke owo kiet-kiet. … Ke akpatre, enɔ mme udɔŋ esit idem nnyin uwem enyuŋ ekut mmɔ ke mbumek ye ke edinam nnyin” (“Elder Andersen Eteme-ete, Ekara Udɔŋ Mbufo,” ChurchofJesusChrist.org Kere-baŋa nte Abraham 1:1–19 emende ŋkpɔ se Elder Andersen ekpepde owut. Mbume ntem ekeme ndiŋwam:

• Nso ikidi udɔŋ Abraham? Didie ke udɔŋ esie okowut ke edinam esie? Didie ke Abasi akaŋwam udɔŋ esie?

• Nso idi udɔŋ fo? Didie ke mmɔ ewut-idem ke edinam fo? Didie ke Abasi aŋwam fi?

• Ewe etop ke ufaŋ-ŋwed emi enyene ɔnɔ mme owo emi mbon ufɔkemana mmɔ miyomke edinen-ido?

Kiet kotu mme akwa udɔŋ eke Abraham ye Sarah ekedi—ndinyene eyen—ikwɔrɔke isu ke ediwak isua (se Genesis 15:1–6). Nso ŋkpɔ ke mbufo ekpep oto Mme Hebrew 1:18–19 abaŋade nte Abraham ye Sarah ekeyɔde idomo emi? Didie ke Andinyaŋa aŋwam fi “ndinyime” mme eŋwɔŋɔ Esie kpa edieke eŋwɔŋɔ oro “midige kaŋa”?

Se ŋko “Ubɔhɔ eke Abraham” (ndise-vidio), Gospel Library.

1:38

Nsidi ntak oro edide akpan-ŋkpɔ ɔnɔ fi ndidiɔŋɔ mbaŋa ediomi emi Abasi akanamde ye Abraham? Koro Abasi oyom ndinam ukem ediomi oro ye mbufo. Enye ɔŋwɔŋɔ ete ke ediomi emi eyeka iso ye ubon Abraham, mme ke “nditɔ,” ndien ke “ nte ewakde nte mme andibɔ Gospel emi edidide … emi edibatde nte nditɔ fo” (se Abraham 2:10–11). Ke ikɔ efen, ediomi emi ke akaka iso ye mbufo—ini emi mbufo ekeduɔkde fi mmɔŋ ye ata ofuri-ofuri kini mbufo akanamde ediomi ke temple (se Ŋwed Mbon Galatia 3:26–29; Doctrine ye Covenants 132:30–32).

Ke ntak oro, mbufo emekeme ndiyom man okot Abraham 2:6–11 onyuŋ anam ibat ŋkpɔ, ukem-ukem nte, emi Abasi ɔkɔŋwɔŋɔŋde ndinɔ Abraham ye Sarah (se ŋko Genesis 12:1–3; 13:15–16; 15:1–6; 17:1–8, 15–22). Didie ke mme edidiɔŋ emi ekeme ndinam ufɔn nnɔ fi?

Ubak mme eŋwɔŋɔ emi enyene nsinsi mbiet. Didie ke mme eŋwɔŋɔ ebiet isɔŋ emi enyenede mme akamba ubon emi ɔwɔrɔde -osu ke nsinsi? (se Doctrine ye Covenants 131:1–4; 132:20–24, 28–32).

Kesioho mme edidiɔŋ emi ekenwɔŋɔde ndinɔ, Abasi ɔdɔhɔ Abraham ete “edi edidiɔŋ” (Genesis 12:2; eyire etiŋ). Nso ŋkpɔ ke mbufo ekere se oro ɔwɔrɔde? Didie ke mbufo edi edidiɔŋ? (se Abraham 2:11).

Man ekpep kabaŋa ediomi, Elder Dale G. Renlund eketiŋ abaŋa mbufut-mmɔŋ ke Inyaŋ Amazon, ndien President Emily Belle Freeman etiŋ kabaŋa edisaŋa ke usuŋ itiat ke ɔbuŋɔ itɔŋ-ukot (se “Accessing God’s Power through Covenants,” Liahona, May 2023, 35–37; “Walking in Covenant Relationship with Christ,” Liahona, Nov. 2023, 76–79). Duŋɔre kiet mme etop mbiba emi yom mme ikɔ emi aŋwamde ndibɔrɔ mbume nte: “Nsidi ntak emi Abasi oyomde mi ndinam ediomi ye Enye?”

Se ŋko Ibuot-ikɔ ye Mbume, “Ediomi eke Abraham,” Gospel Library; “Mme Ekikere Ndinim ke Esit: Ediomi,” ke ŋwed ukpep-ŋkpɔ emi.

Kere ke mbufo ekesian Melchizedek ɔnɔ owo kiet eke midiɔŋɔke enye. Nso ŋkpɔ ke mbufo ekpetiŋ? Se yom ifiɔk ke Joseph Smith Translation, Genesis 14:26–27, 33–38 (ewetde edian ke Bible); Alma 13:13–19; Doctrine ye Covenants 107:1–4. Ewe ido edibiet Christ ke afo okut ke edimen Melchizedek ŋwut emi? Didie ke mbufo ndikot kabaŋa uwem eke Melchizedek aŋwam ke usuŋ nte mbufo esede Itie-oku Melchizedek?

Nso ŋkpɔ ke mbufo ekpep ebaŋa edu-uwem eke Abraham kabaŋa inyene ke Genesis 14:18–24 ye Joseph Smith Translation, Genesis 14:36–40 (ewetde edian ke Bible)? Nte uwutŋkpɔ, fiɔk ibɔrɔ emi enye ɔnɔde edidem Sodom ke Genesis 14:13. Didie ke ndinim mbet mbak-duop aŋwam ke nte mbufo esede okuk?

Nte mbufo ekotde Genesis 16, mbufo emekeme ndikere kabaŋa ini emi mbufo ekopde nte enamde ŋkpɔ ke idiɔk usuŋ, nte Hagar akanamde. Fiɔk ke “Ishmael” ɔwɔrɔ “Abasi esikop.” Didie ke Jehovah owut fi ete ke Enye edikop ɔnɔ fi?

Se ŋko “Ndedibe Akam,” Ikwɔ, no. 144.

• Nte mbufo ye nditɔ mbufo ekotde Abraham 1:18 ye 2:8, mbufo emekeme ndidɔhɔ mmɔ ete ekpaŋ-utɔŋ enɔ ubak idem mmɔ emi esiakde ke ufaŋ-ŋwed mbiba oro. Ekeme ndidi mbufo emekeme edibre mbre kiet emi eyenɔŋwɔŋ obɔpde enyin mmɔ ndien mbufo omum eyeɔŋwɔŋ oro ke ubɔk aka ebiet kiet. Ekem mbufo emekeme ndineme kabaŋa nte oro edide ke edinyene Jesus Christ edida nnyin usuŋ ke ubɔk mme edikpeme nnyin.

• Nditɔ mbufo ekeme edidara ndinam ŋwut mbuk eketode Genesis 13:5–12, edomode ndi-di Abraham, Lot, ye mme ekpeme-enaŋ. Didie ke nnyin ikeme editiene uwutŋkpɔ Abraham ke edidi anam-emem ye ufɔkemana mme ye ufan nnyin? Edomo ndinam ibɔrɔ mmɔ ŋwut.

• Kere-baŋa ndiwut nditɔ mbufo iduo emi edɔŋde ntan, ntanta-ɔfiɔŋ ke okoneyo ke ikpa-enyɔŋ, mme ndise emi odude ke utit ŋwed emi. Emi ekeme ediŋwam mmɔ ndifiɔk eŋwɔŋɔ Abasi ke Genesis 13:16; 15:1–6. Eneme ebaŋa nte mbufo ekekpepde ndibuɔt-idem ke eŋwɔŋɔ Abasi, kpa kini mmɔ ebietde nte idiwɔrɔke isu.

• Man ekpep nditɔ mbufo kabaŋa ediomi, dɔhɔ mmɔ ete etiŋ enɔ fi kabaŋa ini emi mmɔ ekenamde eŋwɔŋɔ mme owo akanamde eŋwɔŋɔ ɔnɔ mmɔ, Edieke oro aŋwamde, buana ubak uwutŋkpɔ eke fo esinede ediomi emi mbufo akanamde ye Abasi ke itie uduɔk-mmɔŋ mme ke temple. Didie ke ediomi fo ediŋwam ebuana fo ye Abasi? Emek esisit udim-ikɔ otode Genesis 15:1–6; 17:1–8; Abraham 2:9–11 ndibuana ubak edidiɔŋ emi Abasi ɔkɔŋwɔŋɔde ɔnɔ Abraham ye Sarah.

• Man aŋwam nditɔ mbufo ebeŋeidem ndinam ediomi ye Abasi kini mmɔ ebɔde uduɔk-mmɔŋ, mbufo emekeme edida ubak ifiɔk edinam emi esiakde ke appedix A mme appendix B.

• Ini emi uwem Abraham okodude ke afanikɔŋ, enye ama okot Abasi. Ini emi Hagar odude ikpɔŋ ke wilderness, enye edikpep ke Abasi okop akam esie. Kere-baŋa edibuana mbuk iba emi ye nditɔ mbufo: “Abraham ye Sarah” ye “Hagar” ke Mbuk Akani Testament, 28–31, 32–33. Nso ŋkpɔ ke nnyin ikpep kabaŋa Abasi ito ke mme mbuk emi? Ekem mbufo emekeme edibuana ye kiet eken mme ifiɔk-ukpep efenkini mbufo okopde ke Abasi okop akam fo. Ikwɔ nte “Akam Eyenɔwɔŋ” (Children’s Songbook, 12–13) ekeme edinɔ ukpep-ŋkpɔ emi odudu.

2:20

1:23