“Mme Ekikere Ndinim ke Esit: Ediomi” Edi, Etiene Mi—Eke Ufɔkiduŋ ye Ufɔk Abasi: Akani Testament 2026 (2026)
“Ediomi,” Edi, Etiene Mi: 2026
Mme Ekikere Ndinim ke Esit
Ediomi
Ke ofuri Akani Testament, mbufo eyewak ndikot ikɔ oro ediomi. Mfin emi nnyin imiwak edikere mbaŋa ediomi nte nsasana eŋwɔŋɔ ye Abasi, edi ke ererimbot eset, ediomi ŋko ekedi akpan ubak-ŋkpɔ eke mme owo edineme-nneme ye kiet eken. Ke ntak ifure ye ubɔh mmɔ, mbonowo enyene ndibuɔtidem ye kiet eken, ndien ediomi ekedi usuŋ kiet ndinyene mbuɔtidem oro.
Ntem kini Abasi eketiŋde-ikɔ ɔnɔ Enoch, Noah, Moses, ye mbon efen kabaŋa ediomi, Enye ekekot mmɔ ete esin ke ebuana mbuɔtidem ye Enye. Nnyin ikoot ediomi emi obufa te nsinsi ediomi mme ediomi eke Abraham—nditiŋ ntuuk ediomi emi Abasi akanamde ye Abraham ye Sarah ndien edikem afiak-anam ye ubon Isaac ye Jacob (ŋko ekotde Israel). Ke Akani Testament, ekenehede ediɔŋɔ nte “ediomi.” Mbufo eyekut ete ke Akani Testament edi ata-akpan mbuk eke mbonowo emi ekutde idem mmɔ nte mme andinyene ediomi emi—mbon ediomi.
Ediomi eke Abraham osuk akaka-iso edidi akpan-ŋkpɔ ke mfin emi, akpan-akpan ɔnɔ Mme Ndisana Owo ke Ukperedem Usen. Ke ewe ntak? Koro nnyin ŋko idi mbon ediomi, ekpedi mme idighe nnyin idi ata mme ubon Abraham, Isaac, ye Jacob. Ke ntak emi, ɔfɔn ndifiɔk ŋkpɔ se ediomi eke Abraham edide ye nte oro anamde ŋkpɔ ɔnɔ nnyin mfin emi.
Nso ŋkpɔ idi Ediomi eke Abraham?
Abraham okoyom “ndidi akamba anditiene edinen-ido” (Abraham 1:2), ke ntre Abasi okot enye esin ke ebuana ediomi. Abraham ikidighe akpa owo emi ekenyenede udɔŋ emi, ndien enye ikidighe akpa owo emi ɔbɔde ediomi. Oro ekedi, ke ofuri ŋkpɔ okurede, nsinsi ediomi kiet. Abraham okoyom ndibɔ “edidiɔŋ eke mme ete” (Abraham 1:2)—edidiɔŋ emi ekenɔde Adam ye Eve eto ke ediomi ndien ke oro ebede enɔ mbonowo emi ekemnehede eyom mme edidiɔŋ oro.
Ediomi eke Abasi ye Abraham ama ɔŋwɔŋɔ nti edidiɔŋ: inyene eke isɔŋ, ediwak nditɔ ke ini-iso, usuŋ ndinyene mme edinam itie-oku, ye enyiŋ emi edikponode ke mme emana emi edidide. Edi akpan-ŋkpɔ ke ediomi emi ikinehede ikɔŋɔ ke edidiɔŋ emi Abraham ye ufɔkemana esie kpɔt edi bɔde edi ɔkɔŋɔ ŋko ke edidiɔŋ emi mmɔ edi dide inɔ ofuri nditɔ Abasi. “Mbufo edi-di edidiɔŋ,” Abasi ɔkɔdɔhɔ, “ndien oto fi kpukpru oruk ererimbot eyekut mfɔn” (Genesis 12:2–3).
Nte ediomi emi ɔnɔ Abraham, Sarah, ye ubon mmɔ eti ndaha ke otu nditɔ Abasi? Edi ke ndaha emi kpɔt ke oro edi ufɔn ndidiɔŋ mbon efen. Ubon Abraham ekena nte “ekama utom emi ye Itie-oku ke ibuot ofuri mme idut,” man edeme “edidiɔŋ Gospel, emi edide mme edidiɔŋ erinyaŋa, kpa eke uwem nsinsi” (Abraham 2:9, 11). Ndidi mbon ediomi Abasi ikiwɔrɔke ke mmɔ ema efɔn ekan mbon eken; ɔkɔwɔrɔ ke mmɔ enyene ubiɔŋ ndiŋwam mbon efen ndifɔn.
Ediomi emi ekedi edidiɔŋ emi Abraham okoyomde. Ke ama ɔkɔbɔ ediomi oro, Abraham ɔdɔhɔ ke esit esie etet, “Owo fo ama enehede oyom fi; idahaemi ami mmokut fi” (Abraham 2:12).
Oro ekedi ke ediwak tɔsin isua emi ekebede, edi ema efiak-emen ediomi emi edi ke eyo nnyin emi. Ndien ediomi emi ke ɔwɔwɔrɔ osu ke uwem ikɔt Abasi idahaemi. Ediomi emi ediwɔrɔ-nsu ke okpokpon ndaha ke ukperedem usen emi nte utom Abasi ɔkɔride, ɔdiɔŋ mme ufɔkemana ke ofuri ererimbot. Ndien owo ekededi, nte Abraham, emimoyomde ndidi akamba anditiene edinen-ido—owo ekededi emi enehede oyom Jehovah—ekeme edinyene udeme ke ediomi oro.
Nso Ŋkpɔ ke Ediomi eke Abraham Ɔwɔrɔ ɔnɔ Mi?
Afo edi eyen ediomi. Mbufo ekanam ediomi ye Abasi kini enimde fi baptism ye kini mbufo ediade udia-ɔbɔŋ. Ndien mbufo edibɔ ɔyɔhɔ ediomi ye mme nsasana edinam eke temple.
Otode ke mme ediomi ye edinam emi, nnyin ikabare idi ikɔt Abasi. Nnyin ididiana ye Enye “ke nsinsi ebuana.” “Inikiet emi nnyin inamde ediomi ye Abasi,” President Russell M. Nelson ekekpep ke, “nnyin imikpɔŋ ŋkpɔ ererimbot ke nsinsi. Abasi idikpɔŋke ebuana Esie ye mbon emi ekebɔpde oruk ebuana oro ye Enye. Ke akpanikɔ, kpukpru mbon emi ekenamde ediomi ye Abasi enyene usuŋ ndikibɔ asaŋa-asaŋa oruk ima ye mbɔm. … Otode ke ntak ediomi nnyin ye Abasi, Enye idikpaha mba ke ukeme Esie ke ndiŋwam nnyin, ndien ime mbɔm Esie ye nnyin idikureke.” Mbufo eyekut emi ke mbuk eke mbon ediomi Abasi ke Akani Testament, mbufo eyekut ediomi oro ke uwem fo nte kiet kotu nditɔ ediomi Esie.
Kufehe Ndik, otode Dan Wilson
Emi edi ɔsɔŋurua mbufiɔk emi ekenɔde nnyin otode ke ediomi eke Abraham emi Ekefiakde-emen-edi oto ke Prophet Joseph Smith. ntem kini mbufo okotde abaŋa ediomi ke Akani Testament, ekukere kpɔt kabaŋa ebuana Abasi ye Abraham, Isaac, ye Jacob. Ekere ŋko ebaŋa ebuana Esie ye mbufo. Ini emi mbufo ekotde abaŋa eŋwɔŋɔ eke anana-ibat ubon, ekukere kpɔt kabaŋa million ibat owo emi ekotde Abraham ete mmɔ ke mfin emi. Ekere ŋko ebaŋa eŋwɔŋɔ emi Abasi akanamde ɔnɔ mbufo eke nsinsi ufɔkemana ye nsinsi ŋkɔri. Ini emi mbufo ektde ebaŋa eŋwɔŋɔ eke inyene isɔŋ, ekukere kpɔt kabaŋa isɔŋ emi ekeŋwɔŋɔde enɔ Abraham. Ekere ŋko kabaŋa akaŋa celestial eke isɔŋ ke idemesie—inyene emi ekeŋwɔde enɔ mme andinyene “ifure-ifure ido” emi “edade ebet Jehovah” (Matthew 5:5; Psalm 37:9, 11). Ndien kini mbufo okotde kabaŋa eŋwɔŋɔ ke mbon ediomi Abasi eyediɔŋ “kpukpru oruk ke isɔŋ” (Abraham 2:11), ekukere kpɔt kabaŋa utom Abraham mme eke mme prophet emi ekewɔrɔde eto enye. Ekere ŋko ebaŋa ŋkpɔ se mbufo ekemede ndinam—nte owo anditiene ediomi Jesus Christ—ndidi edidiɔŋ nnɔ mme ufɔkemana emi ekperede fi.