Ndisaŋa ke Ebuana Ediomi ye Christ

Eti ufan mi Ilan ama owut mi esen afang kiet ke Idut Isreal. Enye ɔdɔhɔ ete “Ekot enye Afaŋ Jesus, “koro enye edi usuŋ emi ɔtɔŋɔde ke Nazareth ekesim Capernaum emi ediwak owo enimde ete ke Jesus ama saŋa do. Ami mma mbiere ndo-ndo oro ndisaŋa ke usung oro, ke ntre ami mma ntɔŋɔ ndinam uduak ndinam isaŋ nka obio Isreal.

Urua itiokiet mbemiso ami nka isaŋ oro, ami mma buŋ ɔkpɔ itɔŋ ukot mi. Ebe mi ama afina abaŋa unan oro; nkpon-nkan mfina mi ekedi nte ami ndikemede ndisaŋa ke Usuŋ Jesus ke ɔfiɔŋ kiet ke iso. Ke obot ami ndi owo nsɔŋ-ibuot, ke ntre ami nkibiatke nwed uduk ubom-ofim mfep.

Ami mmeti nte ami nkesobode ye adausuŋ nyin otode Isreal ke ediye usenubɔk oro ke ɔfiɔng itiokiet. Ami makpɔk nwɔrɔ ke nkpɔ-isang nyuŋ nkama eto isaŋ ye nkpɔ edori erɔŋ esaŋa isaŋ. Ada usuŋ nyin, Mya, ama osuk enyin ese nte ami nsaŋade, ndien ɔdɔhɔ ete, “uh, ami nkereke ke afo eyekeme ndisaŋa ke afaŋ emi nte afo etiede emi.”

Ami mma nyime nte, “Ihn-ihn” “Edi iduhe se ikpande mi ndidomo ukeme.” Enye ama otop ibuot esisit, ndien nyin ima itɔŋɔ isaŋ. Ami mamma enye ke oro, ke ndinim ke ami mekeme ndisaŋa ke afang oro ye mbuŋɔ ukot.

ke ayan ini ami masaŋa mbe idiɔk isɔŋ ye mme ebedeŋ ke idem mi. Ndien, nte Mya okutde eti nsinifik mi, enye ada ekpri uduk ɔbɔp ke nkpɔ nkamade nsaŋa-isaŋ onyuŋ ɔtɔŋɔ ndiduri. Enye oduri mi ɔdɔk obot, asaŋa ke mme inwaŋ osokoro, ye ke mben Inyaŋ Gililee. Kini isaŋ okurede, ami mma nnɔ ekom mbaŋa eti adausuŋ mi, emi akawamde mi ndinam nkpɔ emi ami mekpikeme ndinam ke idem mi.

Kini Jehovah okokotde Enoch ndisaŋa ke obio nyuŋ nting ikɔntiense mbaŋa Imo, Enoch ama eyik.¹ Enye ekedi akparawa, inyuŋ ikemeke nditim ntiŋ ikɔ. Didie ke enye edisaŋa ke usuŋ oro ke ndaha esie? Se kibunghɔde ke idem esie ama ekim enye eyin. Ibɔrɔ Jehovah ɔkɔnɔde abaŋa se ikidide ubiɔŋɔ ekedi mmem-mmem ye ndo-ndo oro : “Saŋa ye ami.”² Nte Enɔch ana nyin iti ete ke Enye emi emiade onyuŋ okopde ubiak ke ntak nyin³ eyeyak uwem isɔŋ anam utom esie ke idem nyin, edi enye idiyakke nyin ibiom mfina oro ikpɔŋ.⁴ Ifinake nte mbiomo nyin odobide, mme usuŋ emi nyin isaŋade mfin emi, Enye eyekoot nyin ete idisaŋa ye Enye.⁵

Kere baŋa akparawa kiet emi okodude ke itie mfina emi okosobode ye Jehovah ke ebiet kiet ke wilderness. Jacob ama anam isaŋ ɔkpɔŋ ufɔkidung esie aka ata ayan. Ke ekim okoneyo, enye ama adaba-ndap emi enye okokutde eberi kpɔt edi onyuŋ enyenede akwa enwɔŋɔ ediomi, esinede se ami mmade ndikot ete enwɔŋɔ eke nnuen-ibɔk ition.⁶ Ke okoneyo oro Jehovah ama ada ke nkaŋ Jacob, etiŋ ete ke Imɔ idi Abasi ete Jacob, ndien ɔwɔŋɔ ete:

• Ami ndu ye afo.

• Nyeyuŋ kpeme fi

• Nyeyuŋ nda fi nyɔŋ ufɔk

• Ami ndikpoŋke fi.

• Ami nyenam se ntiŋde ye afo.⁷

Jacob ama eyene mbumek ndimek. Enye ekeme ndikmek ndidu uwem esie nyuŋ ɔfiɔk abaŋa Abasi ete esie, enye nko onyuŋ ekeme ndidu uwem nnɔ ebuana ediomi ye Enye. Ke ediwak isua ebede Jacob ama etiŋ ikɔ ntiense abaŋa uwem edude ke enwɔŋɔ ediomi Jehovah ete: “ Abasi… ama ɔbɔrɔ mi ke usen nnan-enyin mi okoyuŋ odude ye ami ke usuŋ emi ami nasŋade.”⁸ Kpa nte enye akanamde ɔnɔ Jacob, Jehovah eyebɔrɔ nyin kiet-kiet ke usen nnan-enyin nyin edieke nyin inyimede ndibup uwem nyin ndian ye Esie. Enye ɔnwɔŋɔ ndisaŋa ye nyin ke usuŋ .

Nyin ikoot isaŋ emi usuŋ ediomi—usuŋ emi ɔtɔngɔde ye ediomi una-baptism onyung osuhɔre ntɔtuŋɔ-ntɔtuŋɔ aka mme ediomi emi nyin inamde ke temple. Ekeme ndidi nte afo okopde mme ikɔ emi afo ekere ete ke oro ɔwɔrɔ ndinim idiɔŋɔ ke mme mkpri ekebe. Ekeme ndidi kpukpru se afo okutde edi usuŋ emi enimde se anade nte enam. Editim nse ayarade se ikponde ikan oro. Ediomi ibaŋake ndinam unyime kpot, okposukedi oro edide akpan. Enye abaŋa ndiyene ebuana. President Russell M. Nelson ama ekpep ete, “Usuŋ ediomi eneghede abaŋa ebuana nyin ye Abasi.”⁹

Kere baŋa ediomi eke ndɔ Usen unam ndɔ edi akpan, edi se idide akpan nko edi ebuana emi edidude oto ke ndidu uwem otokiet ke iso. Ukem oro edi akpaniko abaŋa ebuana ediomi ye Abasi. Ema enim mme adaha, ndien se eyomde ete enam odu ke usuŋ emi. Edi enye okoot nyin kiet kiet ete idi nte ukeme nyin edide, ye ofuri udɔŋ-esit, inyung “isin ifik ikaiso“¹⁰ ye Enye ke nkaŋ nyin, inyuŋ inyene idotenyin ete ke mme edidiɔŋ emi ekewɔŋɔde eyedi. Nwedabasi eti nyin ete ke mme edidiɔŋ oro edidi kini ye ke usuŋ Esie: ekpededi ke isua edip ye efuteta.¹¹ mme isua duopeba.¹² mme ndo-ndo oro.¹³ Nte usuŋ fo ediyomde, enye enyewam nyin.¹⁴

Utom Esie edi utom nsuhɔre-ndi. Jesus Christ enye osobo ye nyin ke ebiet emi nyin idude ye nte nyin idude. Emi edi ntak inwaŋ, ntak cross, ye ntak udi. Ekedɔng Andiyanga edi man anwam nyin ndikan.¹⁵ Edi ndida ke ebiet emi nyin idude idinɔgɔ nyin ufak emi nyin inyomde. Kpa nte Enye mikikpɔŋke Jacob ke ndek, Obɔŋ inyomke ndikpɔŋ nyin ndomokiet ke ebiet emi nyin idude.

Utom Esie nko edi utom edimenere. Enye eyenam utom ke idem nyin¹⁶ ndimenere nyin ke enyɔŋ nkesim ebiet emi Enye odude, ke ndinam oro anwam nyin ndikabare ntie nte Enye. Jesus Christ ekedi man emenere nyin ke enyɔŋ.¹⁷ Enye onyom ndiwam nyin ndikabare ndi. Emi edi ntak temple.

Ana nyin iti ete: ke idighe se inamde kpɔt edinɔ nyin edimenere, edi nsaŋa––Andiyaŋa nyin. Emi onyuŋ edi ntak ebuana ediomi.

Kini ami nkedude ke Isreal ami mmakese Ibibene Usoputin. Eke mbon Jew, emi edi nsana-nkan ebiet ke Isreal. Enye edi kpukpru se isuhɔde ibaŋa temple mmɔ. Ndusuk mmɔ esine nyie-nkan ɔfɔŋ mmɔ kini mmɔ ekade edisana ebiet emi; nte mmɔ esinede ɔfɔŋ adaɔnɔ nsin-idem mmɔ kabaŋa ediomi ebuana mmɔ ye Abasi. Mmɔ eka ibibene emi ndikot nwedabasi, ndituak ibuot, nyuŋ mbɔŋ akam. Nkpeubɔk ebeŋe ndiyene temple ke ufɔt mmɔ adia kpukpru usen mmɔ, enye edi kpukpru akam mmɔ, udɔŋ mmɔ ndiyene ufɔk ediomi. Ami mmema nsin idem mmɔ.

Kini ami nkpɔŋde Idut Isreal fiak nyɔŋ ufɔk, ami mmatim nkop mme nneme ke nkan nkuk mi abaŋade ediomi. Ami nkop nte mme owo ebupde ete, nso ntak ke ana nte ami nsanŋ ke usuŋ ediomi? Ndi ana nte ami nduk ke ufɔk kiet man nnam ediomi? Nso ntak ke ami nsine edisana ɔfɔŋidem? Ndi ana nte ami nsin ifik ke ndinam ebuana ediomi ye Obɔŋ? Ibɔrɔ kpukpru nti ye mme akpan mbume emi edi mmem-mmem: enye ɔkɔŋɔ ke utɔ ebuana emi afo onyomde ndiyene ye Jesus Christ.¹⁸ Nyin kiet kiet ana inyom ibɔrɔ nyin kabaŋa mme ntutuŋɔ mbume ekeidem oro.

Ami nsaŋa ke usuŋ emi nte “edima eyen-anwan eke ete ye eka eke heaven,”¹⁹ emi mmɔ etimdeefiok²⁰ enyuŋ etimde enim ke akpanikɔ.²¹ Nte eyen ediomi, ami mmodot ndibɔ mme edidiɔŋ emi²² ekewɔŋɔde. Ami memek²³ ndisaŋa ye Obɔŋ. Ema ekot mi²⁴ ndida nte ntiense Christ. Kini usuŋ emi etiede nte eyekak mi, ami mbɔ odudu²⁵ nto ukeme mfɔn. Kpukpru ini emi Ami mbede nduk Ufɔk Esie, Ami nkop ntɔtuŋɔ ebuana ediomi ye Enye. Ema enam mi nsana²⁶ oto ke Edisana Spirit Esie, ema enɔ mi²⁷ odudu Esie, enyuŋ esio me enim²⁸ ndibɔp obio ubɔŋ Esie. Oto ke ndutim ukabade esit kpukpru usen ye ndidia udia ɔbɔŋ kpukpru urua, ami ke mkpeb edinyene nsɔŋɔnda²⁸ ndiyuŋ nsaŋa nnam se ifɔnde³⁰ Ami nsaŋa ke usuŋ emi ye Jesus Christ, nse iso nyom usen enwɔŋɔ emi Enye edifiakde idi. Ndien eye dian mi nte Esiemɔŋ³¹ enyuŋ emenere mi ke enyɔŋ nte edisana³² eyen anwan Abasi.

Ntak emi amam mi nsaŋa ke usuŋ ediomi.

Ntak emi amam mi mmum mme enwɔgɔ ediomi nkama.

Ntak emi anam mi nduk ufɔk ediomi Esie.

Ntak emi anam mi nsine edisana ɔfɔŋidem nte nkpɔ editi.

Koro ami nyom ndidu uwem ke nsin ifik ebuana ediomi ye Enye.

Ekeme ndidi afo nko omoyom ndinam ntre. Tɔŋɔ ke ebiet emi afo odude.³³ Kuyak ndaha fo akpan fi. Ti ete, ukotisaŋ mme ebiet emi afo odude ke usuŋ emi idighe akpan nte nkori.³⁴ Bup owo emi afo enimde ke akpanikɔ emi odude ke usuŋ ediomi emi, ete ada fi owut Andiyaŋa emi mmɔ ema ekefiɔk. Kpeb ediwak baŋa Enye. Sin idem ke ebuana ke ndiduk ediomi ye Enye. Enye ibeheke isua emana mme ndaha fo. Afo emekeme ndisaŋa ye Enye.

Kini nyin ikurede isaŋ ke Afang Jesus, Mya ikisiogho aba uduk esie. Enye ama ayak enye ɔbɔbɔ ke nkpɔ udori-erɔŋ mi Ke mme esisit usen ke iso, nditɔ enyeneka mi ye mme ufan mmɔ ema eduri mi esaŋa ke mme efak Jerusalem.³⁵ Mmɔ ema ekut ete ke ami nkitabake mme mbuk Jesus. Emi ama eti mi abaŋa odudu eke mbon obufa emana. Nyin imekeme ndikpeb nto mbufo. Mbufo emeyene eti udɔŋ ndifiɔk adausuŋ, Jesus Christ. Afo emeyene idotenyin ke odudu uduk emi ɔbɔbde nyin adian ye Enye. Mbufo emesiwak ndiyene enɔ nditaŋ mbon efen mbine Enye.³⁶

Ke esit ekom, nyin isaŋa ke usuŋ emi ɔtɔkiet, isɔŋɔ kiet eken idem ke usuŋ isaŋ emi ³⁷ Nte nnyin ibuanade se nyin ikutde ke Christ, nnyin iyesɔngɔ nsin-idem. K’emi ke ami ntiŋ-ikɔ ntiense ke enyiŋ Jesus Christ, amen.