ការប្រើប្រាស់សេចក្តីណែនាំ
ការចែកចាយដំណឹងល្អ …នៅ សួនកម្សាន្ត ?
ថ្មីៗនេះខ្ញុំបានទៅសួនកម្សាន្តមួយជាមួយមិត្តភក្តិមួយចំនួនមកពីព្រះវិហារ ។ ពេលដែលមិត្តរបស់ខ្ញុំ អ៊ីវី និងខ្ញុំបានឈរតម្រង់ជួរចាំជិះ rollercoaster មានយុវជនម្នាក់ឈ្មោះ អេរិក បានចាប់ផ្តើមនិយាយជាមួយយើងអំពីប៉ុស្តិ៍ YouTube របស់គាត់ ។ គាត់និយាយប្រហែលជា ១៥ នាទីអំពីរបៀបដែលមនុស្សមួយចំនួននៅសាលារបស់គាត់ចំអកដាក់គាត់ ហើយប្រាប់គាត់ឲ្យលុប ប៉ុស្តិ៍ YouTube របស់គាត់ ។
នៅព្រះវិហារ ថ្នាក់ដឹកនាំរបស់យើងបានអញ្ជើញយើងឲ្យយកសេចក្តីណែនាំ ដើម្បីកម្លាំងនៃយុវជន ហើយចែកចាយវាជាមួយនរណាម្នាក់ ។ អេរិក ហាក់ដូចជាកំពុងមានបញ្ហាជាមួយមិត្តភក្តិ ដូច្នេះខ្ញុំគិតថា ប្រហែលជាសេចក្តីណែនាំនោះអាចជួយគាត់បាន ។
ខ្ញុំបានដកសេចក្តីណែនាំចេញមក ហើយប្រាប់គាត់ឲ្យទុកវា ។ គាត់បានសួរថាតើវាជាអ្វី ហើយខ្ញុំបានពន្យល់ថា វាមកពីសាសនាចក្ររបស់ខ្ញុំ ហើយវាអាចជួយគាត់ឲ្យធ្វើការសម្រេចចិត្តល្អ និងបង្រៀនគាត់នូវអ្វីល្អៗផ្សេងទៀត ។ ខ្ញុំបានប្រាប់គាត់ថា គាត់គួរតែអានវានៅពេលដែលគាត់មានពេល ។ គាត់បាននិយាយថា យល់ព្រម រួចដាក់វាចូលហោប៉ៅរបស់គាត់ ហើយបន្តនិយាយអំពីប៉ុស្តិ៍ YouTube របស់គាត់ទៀត ។
ខ្ញុំមិនដឹងថាតើគាត់អានសេចក្តីណែនាំនោះឬអត់ទេ ប៉ុន្តែបទពិសោធន៍នេះបានបង្រៀនខ្ញុំថា យើងអាចក្លាយជាអ្នកផ្សព្វផ្សាយសាសនានៅអាយុប៉ុន្មានក៏បាន នៅកន្លែងណាក៏បាន—សូម្បីតែនៅសួនកម្សាន្តក៏ដោយ ។