ដំណឹងល្អនៃព្រះយេស៊ូវគ្រីស្ទ ៖ សំឡេងអបអរសាទរ

ដោយអែលឌើរ ហ្គែរី អ៊ី ស្ទីវ៉ែនសុន

ក្នុងកូរ៉ុមនៃពួកសាវកដប់ពីរនាក់

ដំណឹងល្អដែលបានស្តារឡើងវិញនាំមកនូវគោលបំណង និងសេចក្តីអំណរដល់ក្មួយៗ នៅលើដំណើររបស់ក្មួយៗឆ្ពោះទៅរកជីវិតដ៏នៅអស់កល្បជានិច្ច ។

ពេលបម្រើជាអ្នកដឹកនាំបេសកកម្មនៅប្រទេសជប៉ុនកាលពីប៉ុន្មានឆ្នាំមុន ខ្ញុំបានធ្វើបទសម្ភាសជាមួយបុរសម្នាក់ដែលបានចូលរួមក្នុងសាសនាចក្រកាលពីមួយឆ្នាំមុន ហើយកំពុងព្យាយាមទទួលបានប័ណ្ណចូលព្រះវិហារបរិសុទ្ធ ។

ក្នុងអំឡុងការសន្ទនារបស់យើង សមាជិកថ្មីនេះបានរៀបរាប់អំពីការដឹងគុណយ៉ាងជ្រាលជ្រៅចំពោះពរជ័យដែលគាត់បានទទួលនៅក្នុងឆ្នាំនោះតាំងពីបុណ្យជ្រមុជទឹករបស់គាត់ ។ ចំពោះខ្ញុំ គាត់បានបង្ហាញទំនុកចិត្តនៃសេចក្ដីសញ្ញា ដែលបណ្តាលមកពីការយល់ដឹងអំពីដំណឹងល្អរបស់គាត់ ដែលបានចាក់ឫសយ៉ាងជ្រៅនៅក្នុងគាត់ ។ គាត់ជាសិស្សដែលបានប្រែចិត្តជឿរបស់ព្រះយេស៊ូវគ្រីស្ទ ដែលបានដកពិសោធន៍នូវការផ្លាស់ប្ដូរយ៉ាងធំនៅក្នុងចិត្ត ( សូមមើល ម៉ូសាយ ៥:២ ) ។

បន្ទាប់ពី បទសម្ភាសនោះ ខ្ញុំបានប្រាប់ប្រធានមណ្ឌលថា ខ្ញុំមានការស្ងើចសរសើរយ៉ាងខ្លាំងចំពោះពួកអ្នកផ្សព្វផ្សាយសាសនា និងសមាជិកដែលបានរកឃើញ និងចិញ្ចឹមបីបាច់ខាងវិញ្ញាណដល់បុរសដ៏ឆ្នើមម្នាក់ដែលមានសក្តានុពលបែបនេះ ។

ខ្ញុំភ្ញាក់ផ្អើលណាស់នៅពេលដឹងថា នៅពេលដែលបុរសនេះចាប់ផ្តើមជួបជាមួយពួកអ្នកផ្សព្វផ្សាយសាសនា និងចូលរួមព្រះវិហារ គាត់គ្មានផ្ទះសម្បែងទេ ហើយស្ថិតនៅក្នុងកាលៈទេសៈស្ទើរតែគ្មានសង្ឃឹមសោះ ។ ការសិក្សារបស់បងប្រុសនេះអំពីដំណឹងល្អ និងការប្រែចិត្តជឿរបស់គាត់ក្នុងរយៈពេលប៉ុន្មានខែបាននាំឲ្យគាត់មាននូវការផ្លាស់ប្តូរដ៏អព្ភូតហេតុ ដែលដាក់គាត់ឲ្យនៅលើផ្លូវនៃភាពខ្លួនទីពឹងខ្លួនខាងវិញ្ញាណ និងខាងសាច់ឈាម ព្រមទាំងសេចក្តីអំណរផងដែរ ។

ដំណឹងល្អបានផ្តល់ដល់បងប្រុសរូបនេះនូវរូបភាពច្បាស់លាស់អំពីគោលបំណងនៃជីវិតរបស់គាត់ ។ សេចក្ដីពិតនៃដំណឹងល្អដ៏ច្បាស់ និងពិសេសៗ បានផ្ដល់ចម្លើយដល់សំណួរសំខាន់ៗរបស់គាត់អំពីជីវិតរមែងស្លាប់នេះ ។ ក្មួយៗ និងបុត្រទាំងអស់របស់ព្រះអាចមានពរជ័យបែបនេះបានដូចគ្នា តាមរយៈដំណឹងល្អនៃព្រះយេស៊ូវគ្រីស្ទ ។

គោលបំណងនៃជីវិត

ដំណឹងល្អនៃព្រះយេស៊ូវគ្រីស្ទត្រូវបានស្តារឡើងវិញតាមរយៈព្យាការី យ៉ូសែប ស្ម៊ីធ ។ នៅក្នុងទីបន្ទាល់ចុងក្រោយរបស់លោកអំពីសាសនាចក្រ ប្រធាន អិម រ័សុល បាឡឺដ ( ឆ្នាំ១៩២៨–២០២៣ ) ដែលពេលនោះ–ជាប្រធានស្តីទីនៃកូរ៉ុមនៃពួកសាវកដប់ពីរនាក់បានមានប្រសាសន៍ ៖

« យើងដឹងថា ព្រះជានរណា យើងដឹងថា ព្រះអង្គសង្គ្រោះជានរណា ព្រោះយើងមាន យ៉ូសែប ។ …

« … យើងមានពរជ័យយ៉ាងណា ដោយដឹងអ្វីដែលយើងដឹងអំពីគោលបំណងរបស់យើងក្នុងជីវិតនេះ ហេតុអ្វីយើងនៅទីនេះ អ្វីដែលយើងគួរតែព្យាយាមធ្វើ និងសម្រេចឲ្យបាននៅក្នុងជីវិតប្រចាំថ្ងៃរបស់យើង » ។

សម្រាប់សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ចំណេះដឹងនោះរួមមានការយល់ដឹងអំពី « ផែនការដ៏ឥតខ្ចោះ » នៃសេចក្ដីសង្គ្រោះរបស់ព្រះ ត្រូវបានស្គាល់ផងដែរថាជា « ផែនការនៃសុភមង្គលដ៏មហិមា » « ផែនការនៃសេចក្ដីប្រោសលោះ » និង « ផែនការនៃសេចក្ដីមេត្តាករុណា » ( អាលម៉ា ៤២:៨, ១១, ១៥ ) ។ ផែនការរបស់ព្រះ « ដកអាថ៌កំបាំងចេញពីជីវិត និងភាពមិនច្បាស់លាស់ចេញពីអនាគតរបស់យើង » ។ ភាពចាំបាច់ និងជាស្នូលចំពោះផែនការនោះ និងគោលបំណងនៃជីវិតគឺ « គោលលទ្ធិនៃព្រះគ្រីស្ទ » ។

តាមរយៈដំណឹងល្អយើងដឹងថា យើងជាបុត្ររបស់ព្រះ ដែលបានបញ្ជូនមកផែនដីដើម្បីទទួលការសាកល្បង និងរៀបចំដើម្បីបានរស់ឡើងវិញ ( សូមមើល គោលលទ្ធិ និងសេចក្ដីសញ្ញា ៧៦:៣៩ ) ។ យើងដឹងពីព្រះបញ្ញត្តិ ហើយត្រូវបានបង្រៀនឲ្យ « ដឹងខុស និងត្រូវ » ( នីហ្វៃទី២ ២:៥ ) ។ យើងដឹងថា យើងនៅទីនេះដើម្បីស្រឡាញ់ និងបម្រើ ហើយថាព្រះអង្គសង្គ្រោះបានហៅយើងឲ្យយកឈ្នះលោកិយ និងដើម្បីជួយអ្នកដទៃឲ្យធ្វើដូចគ្នាដែរ ( សូមមើល យ៉ូហាន ១៦:៣៣ ) ។

អ្វីដែល យ៉ូសែប ស្ម៊ីធ បានហៅថា « សំឡេងអបអរសាទរនៃដំណឹងល្អរបស់ព្រះអម្ចាស់ព្រះយេស៊ូវគ្រីស្ទរបស់យើង » នឹងពង្រឹងយើងក្នុងអំឡុងថ្ងៃដ៏លំបាក និងនាំមកនូវអត្ថន័យ និងគោលបំណងដល់យើង និងអ្នកដទៃទៀត ។

ការគោរពប្រតិបត្តិ និងពរជ័យទាំងឡាយ

ព្រះបានប្រទានដល់យើងនូវសិទ្ធិជ្រើសរើសខាងសីលធម៌ ដើម្បីយើងអាចទទួលខុសត្រូវចំពោះជម្រើសរបស់យើង ( សូមមើល គោលលទ្ធិ និងសេចក្ដីសញ្ញា ១០១:៧៨; សូមមើលផងដែរ នីហ្វៃទី២ ២:១៦ ) ។ ជាផ្នែកនៃ « ការផ្ទុយចំពោះរឿងសព្វសារពើ » ( នីហ្វៃទី២ ២:១១ ) សាតាំងត្រូវបានអនុញ្ញាតឲ្យល្បួងយើងឲ្យប្រើប្រាស់សិទ្ធិជ្រើសរើសរបស់យើងខុស ។

នៅក្នុងជំនាន់របស់យើង ព្រះអម្ចាស់ព្រះយេស៊ូវគ្រីស្ទបានហៅព្យាការី យ៉ូសែប ស្ម៊ីធ ហើយ « បាននិយាយមកកាន់លោកពីលើស្ថានសួគ៌ ហើយបានប្រទានព្រះបញ្ញត្តិទាំងឡាយដល់លោក » ( គោលលទ្ធិ និងសេចក្តីសញ្ញា ១:១៧ ) ។ ព្រះអម្ចាស់បន្តបើកសម្ដែងព្រះបញ្ញត្តិ និងឆន្ទៈរបស់ទ្រង់ដល់ព្យាការីរបស់ទ្រង់នៅសព្វថ្ងៃនេះ ព្រោះទ្រង់មានព្រះរាជបំណងនាំយើងទៅកាន់សុភមង្គលក្នុងជីវិតនេះ និងទៅកាន់សិរីល្អនៃសេឡេស្ទាលក្នុងជីវិតបន្ទាប់ទៀត ។

ការគោរពប្រតិបត្តិតាមព្រះបញ្ញត្តិរបស់ព្រះគួរតែចេញមកពីការលះបង់ និងសេចក្តីស្រឡាញ់របស់យើងចំពោះទ្រង់ ។ ព្រះអម្ចាស់ព្រះយេស៊ូវគ្រីស្ទបានប្រកាសថា « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តរបស់ខ្ញុំចុះ » ( យ៉ូហាន ១៤:១៥ ) ។ លទ្ធផលដ៏ខ្ពង់ខ្ពស់បំផុតនៃការបង្ហាញសេចក្តីស្រឡាញ់របស់យើងចំពោះព្រះអម្ចាស់ ដោយការរក្សាព្រះបញ្ញត្តិរបស់ទ្រង់ គឺជាពរជ័យដែលនាំមកនូវសុភមង្គល និងសេចក្តីអំណរ ( សូមមើល គោលលទ្ធិ និងសេចក្ដីសញ្ញា ១៣០:២០–២១ ) ។

ជាមួយនឹងទស្សនវិស័យច្បាស់លាស់នៃប្រភព និងជោគវាសនាដ៏ទេវភាពរបស់យើង យើងដឹងថា « អ្វីៗដែលនឹងធ្វើឲ្យជីវិត រមែងស្លាប់ [ របស់យើង ] បានប្រសើរបំផុត វា អាចជារឿង ដូចគ្នា ដែលនឹងធ្វើឲ្យជីវិតនៅ ភាពអស់កល្បជានិច្ច [ របស់យើង ] បានប្រសើរបំផុតតាមដែល ផែនការនេះ អាចធ្វើបាន ! »

សេចក្តីអំណរនៅក្នុងការធ្វើដំណើររបស់អ្នក

អ្នកប្រែចិត្តជឿថ្មីដែលពោរពេញដោយអំណរដែលខ្ញុំបានជួបនៅប្រទេសជប៉ុនជាច្រើនឆ្នាំកន្លងមក បានរកឃើញដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទតាមរយៈភាពឧស្សាហ៍ព្យាយាមរបស់គាត់ និងរបស់ពួកអ្នកផ្សព្វផ្សាយសាសនា និងសមាជិក ។ គាត់បានរកឃើញគោលបំណងរបស់គាត់ និងពង្រីកចក្ខុវិស័យរបស់គាត់អំពីផែនការនៃសុភមង្គលដ៏មហិមា ដែលនាំមកនូវពរជ័យ និងសេចក្តីអំណរដែលលើកស្ទួយគាត់ទាំងខាងសាច់ឈាម និងខាងវិញ្ញាណ ។

អែលឌើរ ផាទ្រីក ខៀរ៉ុន នៃកូរ៉ុមនៃពួកសាវកដប់ពីរនាក់បានបង្រៀន ៖

« ដោយសារផែនការពេញដោយក្តីស្រឡាញ់របស់ព្រះវរបិតាសួគ៌របស់យើងសម្រាប់បុត្រាបុត្រីរបស់ទ្រង់ម្នាក់ៗ ហើយដោយសារព្រះជន្មដ៏ប្រោសលោះ និងបេសកកម្មរបស់ព្រះអង្គសង្គ្រោះរបស់យើង គឺព្រះយេស៊ូវគ្រីស្ទ នោះយើងអាច—និងគួរតែ—ជាមនុស្សរីករាយបំផុតនៅលើផែនដី ! ទោះបីជាព្យុះជីវិតនៅក្នុងពិភពលោកដែលមានបញ្ហាជាញឹកញាប់ បានបក់បោកមកលើយើងក្តី ក៏យើងអាចបណ្ដុះនូវអារម្មណ៍នៃអំណរ និងសេចក្តីសុខសាន្តខាងក្នុងដែលមានភាពរីកចម្រើន និងស្ថិតស្ថេរ ដោយសារក្ដីសង្ឃឹមរបស់យើងលើព្រះគ្រីស្ទ និងការយល់ដឹងរបស់យើងអំពីកន្លែងរបស់យើងនៅក្នុងផែនការនៃសុភមង្គលដ៏ស្រស់ស្អាត » ។

ខ្ញុំសូមថ្លែងការដឹងគុណ និងទីបន្ទាល់របស់ខ្ញុំអំពីដំណឹងល្អដែលបានស្តារឡើងវិញរបស់ព្រះយេស៊ូវគ្រីស្ទ និងផែនការនៃសុភមង្គលដ៏មហិមា ។ ខ្ញុំសូមអញ្ជើញក្មួយៗឲ្យទទួលទានផ្លែផ្កានៃដំណឹងល្អ និងមានអារម្មណ៍នៃអំណរបន្ថែមទៀតនៅលើដំណើរឆ្ពោះទៅរកជីវិតអស់កល្បជានិច្ច ។