សំឡេងយុវវ័យ
ចូរទីពឹងដល់ព្រះអម្ចាស់
រចនារូបភាពដោយ ខេតលីន បឺច
នៅពេលដែលពួកអ្នកផ្សព្វផ្សាយសាសនាជាស៊ីស្ទើរបានបង្រៀនគ្រួសាររបស់ខ្ញុំជាលើកដំបូងអំពីផែនការនៃសេចក្ដីសង្គ្រោះ បន្ទាប់ពីឪពុករបស់ខ្ញុំបានស្លាប់ទៅ ពេលខ្លះខ្ញុំបារម្ភ និងមិនដឹងថា តើខ្ញុំជឿលើផែនការនៃសេចក្ដីសង្គ្រោះដែរឬទេ ។ ប៉ុន្តែបងប្រុស និងប្អូនប្រុសរបស់ខ្ញុំមានចិត្តស្ងប់ ហើយបានជួយខ្ញុំឲ្យជឿ និងមិនគិតច្រើនពីរឿងគ្រប់យ៉ាង ។
ពេលខ្លះខ្ញុំមិនមានអារម្មណ៍រឹងមាំទេនៅក្នុងសាសនាចក្រ ។ ប៉ុន្តែប្រសិនបើខ្ញុំមានអ្វីដែលខ្ញុំបារម្ភ ឬបញ្ហាដែលខ្ញុំកំពុងប្រឈមមុខ ខ្ញុំតែងតែព្យាយាមគិតរឿងមួយ ៖ ចូរទីពឹងដល់ព្រះអម្ចាស់ ។ ទ្រង់ដឹកនាំខ្ញុំទៅកន្លែងដែលខ្ញុំគួរទៅ ។
នោះជាមូលហេតុដែលខ្ញុំចង់ទៅបេសកកម្ម—ដើម្បីយល់អំពីទ្រង់កាន់តែច្រើន និងយល់ពីអ្វីដែលទ្រង់សព្វព្រះទ័យឲ្យខ្ញុំធ្វើ ។ នៅពេលដែលខ្ញុំឃើញពួកអ្នកផ្សព្វផ្សាយសាសនា និងវិញ្ញាណដែលពួកគេមាន ខ្ញុំចង់ក្លាយដូចជាពួកគេដែរ ។ ពួកគេគឺជាគំរូដ៏ល្អនៃសិស្សរបស់ព្រះយេស៊ូវគ្រីស្ទ ។ ដោយសារតែគំរូរបស់ពួកគេ ខ្ញុំពិតជារំភើបក្នុងការទៅបម្រើបេសកកម្ម បន្ទាប់ពីខ្ញុំបញ្ចប់ថ្នាក់វិទ្យាល័យ ។ ខ្ញុំចង់ផ្តល់សុភមង្គល និងការចេះដឹងដែលខ្ញុំមានដល់មិត្តភក្តិរបស់ខ្ញុំ និងអ្នកដទៃទៀត ។
ដូរ៉ា ស៊ី អាយុ ១៨ ឆ្នាំ ទីក្រុងវីលនៀស ប្រទេសលីទុយអានី
ចូលចិត្តលេងកីឡាបាល់ក្នុងទឹក និងលេងវីយូឡុង ។