Dominggo sa Hapon nga Sesyon
Alimahan ang mga Gamot, ug ang mga Sanga Motubo
Mga Kinutlo
Usa sa labing importante nga mga butang nga atong makat-onan niini nga kinabuhi mao ang kalainan tali sa unsa ang mahangtoron ug unsa ang dili. …
…Ang ubang mga kamatuoran maoy kinauyokan, kinahanglanon, sa gamot sa atong hugot nga pagtuo. Ang uban mga sumpay o mga sanga—bililhon, apan makonekta lamang sila sa mga sukaranan. …
Sa laing pagkasulti, si Jesukristo ug ang Iyang maulaong sakripisyo mao ang gamot sa atong pagpamatuod. Ang ubang mga butang mga sanga. …
Kon bahin sa pag-amuma sa atong mga pagpamatuod ni Jesukristo, naghunahuna ko kon usahay masaypan ba nato ang mga sanga sa mga gamot. …
Kinahanglang mangutana kita sa atong kaugalingon: Ang akong pagpamatuod ba gibase sa unsay akong gilaoman nga mahitabo sa akong kinabuhi? Nagdepende ba kini sa mga binuhatan o sa kinaiya sa uban? O lig-on ba kining natukod diha ni Jesukristo, “nakagamot ug nakabarog ug nalig-on diha kaniya” [Mga Taga-Colosas 2:7], bisan pa sa mausabon nga mga sirkumstansiya sa kinabuhi? …
Dili kita angay nga magdahom nga makasabot sa tanan sa dili pa kita molihok. Dili kana pagtuo. … Kon dili kita molihok hangtod nga ang tanan natong mga pangutana matubag, labihan ang atong pagpugong sa maayo nga atong mahimo, ug atong gilimitahan ang gahom sa atong pagtuo. …
Ang pagtuo molahutay sa mga pagsulay ug sa walay kaseguroan sa kinabuhi tungod kay lig-on kini nga nakagamot diha ni Kristo ug sa Iyang doktrina. Si Jesukristo, ug ang atong Amahan sa Langit nga nagpadala Kaniya, silang duha naglangkob sa usa nga walay pagtipas, hingpit nga masaligan nga tumong sa atong pagsalig. …
Maoy akong sinsero nga pag-ampo ug panalangin nga kanunay kita nga moalima sa mga gamot sa atong pagtuo diha sa Manluluwas, diha sa Iyang doktrina, ug sa Iyang Simbahan.