Pagpangita og mga Tubag sa Espirituhanong mga Pangutana

Ang mga pagpangutana ug pagpangita og kahulogan usa ka natural ug normal nga bahin sa atong mortal nga kasinatian. … Ang plano sa Dios maluluy-on ngadto sa mga limitasyon sa atong pagkatawhanon; naghatag kanato sa atong Manluluwas, si Jesukristo, aron mahimo natong Maayong Magbalantay; ug nagdasig kanato sa paggamit sa atong kabubut-on sa pagpili Kaniya. …

Ang paagi sa Dios nga Amahan ug sa Iyang Anak sa paghatag sa Ilang kaalam ngari kanato nag-una sa pagdapit sa gahom sa Espiritu Santo nga mahimo natong personal nga magtutudlo samtang atong isentro si Jesukristo sa atong kinabuhi ug sa atong matinud-anong pagpangita sa Ilang mga tubag ug sa Ilang kahulogan. …

…Ang Ginoo nagsulti kanato nga pinaagi sa atong pagkamasulundon ug kakugi kita mahimo nga makaangkon og kahibalo ug salabotan. Ang mga balaod ug mga sugo sa Dios wala gidisenyo nga mahimong babag sa atong kinabuhi apan usa ka gamhanang ganghaan ngadto sa personal nga pagpadayag ug espirituhanong edukasyon. …

…Bulahan kita nga si Jesukristo maoy atong Batid nga Mananambal. Ang atong pagkamasulundon sa mga balaod ug mga sugo sa Dios makaabli sa dalan alang sa atong Manluluwas sa paghatag og panabot ug pagkaayo nga Iyang nahibaloan nga atong gikinahanglan, sumala sa Iyang gilatid nga plano sa pagtambal alang kanato.

Minahal nga mga higala, mopamatuod ko nga ang atong kinasingkasing nga mga pangutana sa ebanghelyo makahatag sa Langitnong Amahan ug ni Jesukristo og mga oportunidad sa pagtabang kanato nga molambo. … Mopamatuod ko nga ang pagbutang sa inyong pagsalig diha sa Langitnong Amahan ug sa Iyang mga propeta nga Iyang gipadala makatabang ninyo nga motubo sa espirituhanong paagi ug modala kaninyo ngadto sa lapad nga kahibalo ug kasinatian sa Dios.