Sabado sa Hapon nga Sesyon
Welcome sa Simbahan sa Hingpit nga Kalipay
Mga Kinutlo
Tungod sa mahigugmaong plano sa atong Langitnong Amahan alang sa matag usa sa Iyang mga anak, ug tungod sa matubsanon nga kinabuhi ug misyon sa atong Manluluwas, si Jesukristo, kita makahimo—ug kinahanglan—nga mahimong labing malipayon nga mga tawo sa yuta! …
… Ug walay bisan asa nga ang atong hingpit nga kalipay isip usa ka katawhan mas makita kon kita magpundok matag Igpapahulay diha sa atong mga panagtigom alang sa sakramento aron sa pagsimba sa tinubdan sa tanang hingpit nga kalipay! …
Hingpit nga kalipay diha sa balaang pagtahod? “Tinuod ba kana?” tingali mangutana kamo. Oo, tinuod kini! Atong gimahal pag-ayo, gipasidunggan, ug girespeto ang atong Dios, ug ang atong balaan nga pagtahod nagagikan sa kalag nga nagmaya sa abunda nga gugma, kaluoy, ug kaluwasan ni Kristo! …
Kon kita nagpundok agig paghinumdom sa Manluluwas ug sa katubsanan nga Iyang gihimong posible, ang atong mga dagway kinahanglang magpakita sa atong hingpit nga kalipay ug pasalamat! …
… Ang mga kasulatan nag-ingon nga “ang awit sa mga matarong mao ang usa ka pag-ampo ngadto sa [Dios]” [Doktrina ug mga Pakigsaad 25:12] diin makapahimuot sa Iyang kalag. Mao nga manganta kita! Ug modayeg Kaniya!
Kinahanglan natong isentro ang atong mga pagpamulong ug mga pagpamatuod diha sa Langitnong Amahan ug ni Jesukristo ug sa mga bunga sa mapainubsanon nga pagsunod sa Ilang ebanghelyo, mga bunga nga “labing tam-is sa tanang tam-is” [Alma 32:42]. …
… Mopaagas man kita sa mga luha sa kasubo o mga luha sa pasalamat atol sa sakramento, himoa nga kini makapahingangha sa maayong balita sa gasa sa Amahan sa Iyang Anak! …
… Kini usa ka pagdapit sa pagdawat sa gasa sa Manluluwas sa kalinaw, kahayag, ug hingpit nga kalipay—sa paghudyaka niini, sa pagkahibulong niini, ug sa pagmaya niini matag Igpapahulay. …
Welcome sa simbahan sa hingpit nga kalipay!