O Batan-on nga Bililhon

Bililhon nga Katungod sa pagkatawo! … Kini usa ka makapaaghat nga pulong. Apan unsa man gayod ang ipasabot niini? …

… Naghisgot kita mahitungod sa kabilin nga inyong madawat isip usa ka hiniusang manununod uban ni Kristo tungod sa relasyon sa pakigsaad nga inyong gipili nga sudlan uban Kaniya ug sa inyong Amahan sa Langit. …

Hunahunaa kana! Ang Dios mosalig kaninyo—sa tanang katawhan sa yuta, ang Dios misalig kaninyo, ang mga anak sa pakigsaad—ang Iyang mga sakop nga tripulante—sa pagtabang sa Iyang buhat sa pagdala sa tanan Niyang mga anak nga luwas nga makapauli ngadto Kaniya. …

… Kamo kabatan-onan nga may bililhon nga katungod sa pagkatawo. Ang inyong relasyon sa pakigsaad ngadto sa Dios ug ni Jesukristo usa ka relasyon sa pagsalig diin kamo adunay mas dakong dalan ngadto sa Ilang mas dakong grasya—sa ilang balaanong tabang, pagtuga sa kalig-on, ug sa makapalihok nga gahom. Kana nga gahom dili lang pangandoy sa hunahuna, usa ka pangpaswerte, o katumanan sa kaugalingon nga panagna. Kini tinuod.

Kon inyong tumanon ang inyong mga responsibilidad sa bililhon nga katungod sa pagkatawo, dili gayod kamo mag-inusara. … Kamo makigtambayayong uban ni Jesukristo. Sa matag bag-ong pakigsaad—ug samtang ang inyong relasyon Kaniya magkalawom—ang inyong paggunitay magkahugot ug magkahugot hangtod kamo lig-on nga mahugpong sa usag usa. Diha nianang sagrado nga simbolo sa Iyang grasya, inyong makaplagan ang tinguha ug kalig-on sa pagpuyo gayod kon sa unsang paagi ang Manluluwas nagpuyo nga lahi gikan sa kalibotan. Makahimo kamo niini tungod kay si Jesukristo nagpaluyo kaninyo! …

… Ayaw tugoti ang kalibotan nga mousab kaninyo kon kamo natawo aron sa pag-usab sa kalibotan.