Sabado sa Buntag nga Sesyon
Pagsunod kang Kristo
Mga Kinutlo
Ang pagsunod kang Kristo dili usa ka kaswal o panalagsa nga buluhaton. Usa kini ka padayon nga pasalig ug pagkinabuhi nga kinahanglang mogiya kanato sa tanang higayon ug sa tanang lugar. Ang Iyang mga pagtulun-an ug ang Iyang ehemplo nagtino sa dalan alang sa matag disipulo ni Jesukristo. …
Ang mga sugo sa Dios nagsangkap sa giya ug makanunayong tabang sa atong mga kinabuhi. …
Ang laing mga pagtulun-an sa atong Manluluwas daw nagkinahanglan nga hatagan og gibug-aton pag-usab sa mga sirkumstansiya sa atong panahon karon.
Mao kini ang panahon sa daghang mapintas ug sakit nga mga pulong sa atong mga komunikasyon sa publiko ug usahay bisan sa atong mga pamilya. …
Unsay kinahanglang itudlo ug buhaton sa sumusunod ni Kristo niining makadaot nga mga komunikasyon? Unsa ang Iyang mga pagtulun-an ug mga ehemplo? …
… Kinahanglan kitang mohigugma ug mobuhat og maayo sa tanan. Kinahanglan natong likayan ang panagbingkil ug mopasiugda og kalinaw sa tanan natong komunikasyon. Wala kini magpasabot nga ibaliwala ang atong mga baroganan ug mga prayoridad apan sa paghunong sa mapintas nga pag-atake ngadto sa uban sa ilang mga baroganan. Kana mao ang gibuhat sa atong Hingpit nga Panig-ingnan sa Iyang pagpangalagad. Mao kana ang ehemplo nga Iyang gitakda kanato samtang gidapit kita Niya sa pagsunod Kaniya. …
Isip mga sumusunod ni Kristo, motudlo ug mopamatuod kita ni Jesukristo, ang atong Hingpit nga Panig-ingnan. Mao nga sundon nato Siya pinaagi sa pagwagtang sa panagbingkil. Samtang nagpasiugda kita sa mga politikanhong mga programa nga atong gitinguha, kinahanglang sarang kita sa Iyang mga panalangin pinaagi sa paggamit sa pinulongan ug mga pamaagi sa pagpasiugda og kalinaw. Sa atong mga pamilya ug ubang personal nga mga relasyon atong likayan ang unsay mapintas ug madumtanon.