Te Waaki ae Boou

E nang koro waniua ana ririki Alexandre inanon tabeua riki te bong! E rangi ni kukurei ibukina bwa ngaia ao Tamana a bairea te koronririki ae onoti ibukina bon te kang tinaeki imwiin bwaran ana reirei. Ngke a roko mitinare bwa a na katairiki, a tuangaki iroun Alexandre taekan kabuki tiaokureti aika kangkang ae karaoaki n te burawa are e bon rineia.

“Ti nang kabonganai ngkai waniua ao kaka teuana aia taura te nenea, n onea mwiin teuana te keeke ao waniua te taura te nenea!”

E ngare Unimwaane Lauener. “E taraa ni kakukurei anne. Kawakini tabeua ibukiu!”

Imwiin te katairiki, a anga te reirei mitinare iaon taekan te bwabetito. E taraa Alexandre Unimwaane Doyon. “Ngke ko bwabetitoaki, ko berita bwa ko na iriira Iesu Kristo.” E tuanga Alexandre taekan ana bwabetito ao ni kaota ana koaua. “Te Tamnei ae Raoroi e buokai n namakina te kukurei ae bati ibukina bwa n te bong anne ao I rineia n iriira Iesu Kristo.”

E a bon aki kan tataningaa te bong are e na bwabetitoaki iai Alexandre!

Ma ngke e a nako n ana kainiwene n te tairiki anne, e kunea bwa e a kangaanga reken matuuna. E tangira te iango ni kan kaitiakaki ao ni kaboouaki. Ma e na kanga n teimatoa ni itiaki imwiin bwabetitoana?

N te ingabong are imwiina e rianna nakon te reirei ma Tamana. “Ko rangi n taraa n aki karongoaa n te ingabong aei,” e taku Tamana. “Terana ae riki?”

E ikenrawa Alexandre. “Tera ngke I kona ni bwabetitoaki riki nakon ae ti te taina.”

“Bukin tera?” E titiraki Tamana.

“N na kanga riki n teimatoa n itiaki imwiin bwabetitoau?” e titiraki Alexandre. “l mwamwaninga taekan bwaai n taainako—n aron atongan mauri ao ko rabwa nakoia aika a ikawai ao n taotaona nanou iroun tariu ae uarereke. I ataia N na teimatoa ni karaoa te kairua. Bon ti teuana am tai ni bwabetito, ngaia are N na bon aki kona ni manga itiaki.”

E tei Tamana ao n taraa matan Alexandre. “Auee. Anne e bon kakua teutana aron iangoana. Ko uringnga ngke ti maroroakina taekan karaoan berita aika tabu n te bwabetito?”

E katoutoua atuuna Alexandre. “Kaanga I taku.”

Ngke ko bwabetitoaki, ko karaoi berita aika tabu ma Tamara are i Karawa. Ko berita bwa ko na kawakin Ana tua ao n iriira Iesu Kristo. Imwiin anne, ni katoaa te tai are ko anaa iai te toa, ko kona n uringa Iesu Kristo ao arona ni buokiko n raira nanom.”

A takaneaua matan Alexandre. “N te aro bwa I aonga n namakina te itiaki n aron naba are ngke I bwabetitoaki?”

“E koaua anne,” e taetae Tamana. E ataia Tamara are i Karawa ae ko aki kororaoi, ao n tabetai ko kona ni karaoi rinerine aika a kairua. Ma ngkana ko kairua, ko kona n raira nanom ao ni kataa am kona n iriira Iesu. Ngkoe iroum anne te bwai ae ko kona ni karaoia?”

E moangare Alexandre. “Eng! I taku bwa I kona ni karaoa anne.”

Ngke e a roko ana tai ni koronririki Alexandre, ana utu a katekeraoa ana koronririki ni kang tinaeki imwiin bwaran te reirei. E rang n raoiroi! Ao n ana tai ni bwabetito, e namakina te kukurei ae bati inanona ngke e a otirake man te ran. E berita bwa e na iriira Iesu Kristo, ao anne e karika te kukurei!

N te wiiki anne e kataa ana kabanea n tamaroa Alexandre ni kawakina ana berita ae boou ao n akoi nakon tarina ae uarereke. Ma n te Tabati are imwiina, iai namakinan te nanokawaki teutana irouna. E namakinna ae e na kona riki ni karaoi tabeua rinerine aika a tamaroa n te wiiki anne.

Ngke e a kabutaki te toa, e rukimi baina Alexandre ao e kabaraaka atuuna. E karaurau ni butiia Tamara are i Karawa bwa e na buokia ni karaoa ae tamaroa riki n te wiiki are imwiina. E iangoia bwa mwaitira ana tangira Iesu ibukina ao te aro ae tangiria bwa e aonga n riki n Airona.

Ngke e anaa te mwakoro ni kariki man tureen te toa, e namakina te abuee ao te rau Alexandre. E namakina are e riki naba nakoina n ana tai ni bwabetito! E katokai baina Tamana iaon angan Alexandre ao e moangare nakoina.

Te bong aei bon moan waakin te wiiki ae boou, ao e nang karaoa ana kabanea n tamaroa Alexandre—ma ana ibuobuoki Tamara are i Karawa.

Kamataataan te tamnei iroun Toby Newsome