AnaKangaanga Raoraou

E butiboorea te atiibu Matt ngke e rianna n oki nakon mweengana. E aki oota iai. Bukin tera ngkai e namakina te nakobuaka?

E moana te airiiri ma raoraona ae Joseph. Ma taraan ae e a rangi ni botu Joseph, ao n tokin te tai e a moantaai n okira mweenga nakon are e a tia nii baireia.

Tao aei kanoan au iango, e iango Matt. E mena ao tao iai nakobuakan ana bong teuae Joseph.

N te bong are imwiina ngke e a roko n te reirei Matt, e a noora Joseph ni kakaraki ma raoraona temangina. E weweteia Matt ao ni kateitea baina. Joseph e taraa te tabo are e mena iai Matt, ma e aki kan kateitea baina. E a manga tannako n taraia raoraona.

E aki kan taraai Joseph, e taetae Matt ibon irouna.

N tain te kiraati ngke e a boo tain te mwakuri n te kurubu, e a nako Matt ni kawara Joseph. “Ko tangiria bwa Nna toaniko?” E titiraki Matt.

Titebo ma e aki ongo Joseph ana taeka. “Tai tabwara, Mike,” e taetae Joseph nakon te ataeinimwaane ae e tekateka irarikina. “Ti a nako ni mwakuri ikekei.”

A nako ataeinimwaane aika uoman. E namakinna Matt bwa kanga e a tinebu birotona. Iai te bwai ae e aki rau nanon iai Joseph. Ma ai tera?

Akea te bwai ae kona n iangoia Matt ae e a tia ni karaoia are e na un iai irouna Joseph. Eng, n tabetai ao a kakaoro aia tiim n tain te takakaro n te baseball n tain te motirawa ae uarereke. Ma aki toki n high five imwiina. Bukin tera ngkai taraan ae Joseph e ririnea bwa e na kaaina te tiim ni kakaitara ni bwaai ni kabane?

Irarikina ao I kona n taetae ma Joseph n tain te motirawa ae uarereke, e iango Mattt.

N tain te motirawa ae uarereke, e birinako Matt n raoniia ataei ake tekorakina n te marae n takakaro.

“Eei, Joseph!” e wewete Matt. “I kona ni marooro teutana ma ngkoe?”

“E nang waaki te takakaro,” e taku Joseph.

“E RAOIROI, N na roko n takakaro irarikim ao ti kona ni marooro,” e taku Matt.

“Ko a rangi n oimwii. Akea te tabo ae mwaawa irarikiu, ” e taku Joseph ao e biri bwa e na raoniia kaain ana tiim.

E tanaki ni mamataku Matt ngke a nang takakaro te koraki. Mai imwaaina ao ngkana e mwaiti te aomataao e aki tabe iai Joseph. A bane ni butimwaeaki aomata ni kabane.

Ma e kakoaua Matt bwa e a aki butimwaeaki iroun Joseph. Bukin tera ngkai e a karaoa aei Joseph? Bukin tera ngkai e a aki kan kairia? Bon akea te kairua ae e a tia ni karaoia Matt!

“Joseph bon ngaia ae karaoa te kairua,” e taku Matt nakoia ana karo n aia tai ni katairiki. “E aki kan taetae nakoiu ao n tuangai te bwai ae e un iai!”

“E bon taraa ni kangaanga,” e taku Tinau.

E namakina kabuebuen ranin matana Matt. “Kanga taraan ae e a toki ni kan riki bwa raoraou, ao I aki ataia bwa tera bukina.”

“I kakatonga iroum ngkai ko kataia n taetae nakoina ibukin anne,” e taku Tamau. “Tao ko kona ni kataia n tuangnga aron am namakin ao ko tangiria ni kan ibuobuoki.”

E katoua angana Matt. Te waaki are e a tia ni karaoia Joseph, e aki koaua raoi Matt ngkana e na kona ni kan ongo Joseph irouna.

E koonaki bain Matt iroun tinana. “Ti na tataro ibukim, ao ibukin Joseph.”

N te tairiki anne ngke e nang nako ni matu Matt, e tabe n iangoa te bwai are a taekinna Tinana ma Tamana. E a tia n tataro ibukiia raoraona mai imwaaina ngke a nanokawaki ke ngkana e nakobuaka aia tai. Ma e bon kaokoro aei, kee? Joseph bon ngaia ae ribuaka nakoina.

Ngaia are bukin tera ngkai ana karo Matt a tataro ibukin Joseph? E riai n tataro naba ngaia ibukin Joseph?

E katorobubua Matt irarikin ana kainiwene. “Tamara are i Karawa, e kangaanga ae N na aki un iroun Joseph,” e tataro Matt. “I kona n ataia bwa e un, ma e aki tuangai bwa tera ae tabeaianga nanona iai.”

E motirawa teutana Matt. “I tangiria bwa N na taetae mangaia, ma I aki koaua raoi bwa e na kona tuangai tera te bwai ae kairua. Taiaoka buokia n te bwai are e tabeaianga iai. Ao ngkana iai te bwai ae riki, taiaoka buokai bwa N na teimatoa n akoi nakoina.”

Ngke e tataro Matt, e a moanna n namakin te rau inanona. E ataia bwa Tamara are i Karawa ao Iesu Kristo bon raoraona aika a tamaroa. A kona ni buokia bwa e na tangira Joseph, n aki tabe ma are e rineia ni kan karaoia Joseph. Ao A na memena irarikina e ngae ngkana Joseph e aki kan riki bwa raoraona.

E moangare Matt. N tokin te tai ao te tataro ibukin Joseph e riki bwa te iango ae tamaroa.

Kamataata n te tamnei iroun Mark Robison