“Tauraoi n Nakonako ma Iesu,” Te Rao, Tianuare 2026, 4–5.

Tauraoi n Nakonako ma Iesu

Ataeinnaine aika a bweebwe a taua kaobiin rongorongon te Bwabetito ao te Kamatoaaki n te Rao maekatiin

Mauri!

Ngaira bon Hailey ao Violet, taari aine aika a bweebwe mai Arizona, USA. Ti tangiria ni kan iriira ana banna ni katooto te Tia Kamaiu, ngaia are ti a katauraoira bwa ti na bwabetitoaki!

Ataeinnaine aika a tei inanon te karaanga ma tinaia ao tamaia

Ti tangiria n nakonako irarikin te karaanga ae uakaan ma mweengara. Ngke ti bwabetitoaki, ti a moanna n nakonako n te maiu n tamnei ma Iesu! E na raoraoniira te Tamnei ae Raoiroi ngkana ti kataia n iriira te Tia Kamaiu n te bong koraki.

Ataeinnaine ngke a rikorokoi taian buuroo irarikin te karaanga

N tabetai ti rikorikoi buuroo aika a uarereke aika a mainaina irarikin te karaanga. A kauringiira te bwai are e berita iai te Tia Kamaiu: “Ngkana tao ai aroni kunnikai aika uraura ami bure, ao a na riki ni mainaina n ai aron te tino”.‘(Itaia 1:18). Ibukin Iesu Kristo, ti kona n rairi nanora ao ni manga kaitiakaki imwiin karaoakin te rinerine ae kaairua. Ti kunnikainiira n te mainaina n ara bong ni bwabetito bwa ti aonga n ururinga naba aio.

A tanaki ataeinnaine ni karekare n taian atiibu ao a tebetebe iaon te karaanga ao bon raoia tamaia

E rangi ni bakuaku tamara ni katebetebea te atiibu iaon te karaanga! E reireiniira bwa ti na kanga ni karaoia, ao iai te nakoraoi teutana ni katoa tai ngkana ti kakataia. Bon aio raoi aron Iesu Kristo ngkai bon ngaia te Tia reirei ae kororaoi. E tangiria ni kan buokiira n reiakinaki ao n rikirake.

Ataeinnaine ngke a nakonako inanon te karaanga ao n taubaima tinaia

A maranran taian atiibu inanon te karaanga, ao e rangi n ibuobuoki ngkai ti tautaua bain tinara. E tatauraoi Iesu ibukira n taainako ngkana ti kainnanoa buokara. Ao ngkana ti bwabetitoaki, ti berita bwa ti na buokiia tabeman n aron are E karaoia!

Ti tatangiria n nakonako irarikin te karaanga ma ara utu. Ngkana ti bwabetitoaki, ti mena n kawain te berita are e kaira kawaira n oki nakon mweengara i karawa. Ti kona n maeka ma ara Utu n akea tokina!

I kukurei ngkai N nang bwabetitoaki ibukina bwa I kan iriira ana banna ni katooto Iesu. I kona ni kaotia nakon Tamau are i Karawa bwa I tangiria ni kan kawakin ana tua.

Violet W., ana ririki 7, Arizona, USA

I kan iriira Iesu Kristo. Imwiin bwabetitoau, I kona ni karekea te Tamnei ae Raoiroi, ao e kona ni buokai te Tamnei ae Raoiroi n ninikoria.

Hailey P., ana ririki 7, Arizona, USA