Te Marooro ma Emily ibukin taekan te Bwabetito

I tatangira te korobanna, korotamnei, kamwaakin kabuki aika a karewe ae taonanimwiin te amwarake, karaoi bwaai man baiu, ao te mwaie ao te anene ma tariu ao mwaaneu. I kan nanako naba nakon ana tabo ni man tibu te unimwaane n totoka iaon te aoti.

N tain te bootaki n utu n te tairiki, a reireinai au karo taekan te onimaki, rairannano, bwabetito, ao te bwaintituaraoi ae te Tamnei ae Raoiroi. I katauraoai naba man warekan booki aika tabu, te tataro, ao ni mataku n te witeo n tamnein Iesu Kristo. I tatangira riki tamnein ana bwabetito te Tia Kamaiu inanon te Karaanga are Ioretan. I tatangira te mwakoro are ngke e kaoti te taobe ae mainaina, are e tei ibukin te Tamnei ae Raoiroi.

Ngai ma tamau ti kataneiaira bwa ti na kanga n tei i nanon te tabo ni bwabetito. I bon maaku n tebo iaan te ran, ma e reireinai tamau bwa N na kanga ni kabwaouai bubuan waeu, ni bonota bwairiu, kamatuui matau, ao ni karaurau ni bwaka iaon baina. E mwaiti ara tai ni kataneiai iaon aei, ao n te bong are I bwabetitoaki iai, e a rangi ni bebete aron karaoana irou.

Aei te bong ae I aki kona ni mwaninga taekana. Tabeman mai buakoia au utu a anga aia marooro, a tataro, ao n tei bwa taan kakoaua. I anenea naba “When I Am Baptized” with the help of our Primary pianist. Imwiin tiau ni bwabetitoaki, I namakinna Tamau are i Karawa ao Natina, Iesu Kristo, a rangi ni kaan ma ngai. I tang ni kukurei.

E bon onoti naba ibukina bwa iai au iango ae N na kaoiia tabeman raoraou ao kaain au utu aika tiaki kaain te Ekaretia bwa a na roko n iira au bwabetito. Temanna raoraou are e roko e iriira ana waaki ni kakukurei te Ekaretia ma ana karo.

I kataia n uring au berita aika tabu n te bwabetito man nanakou n taromauri, butimwaea te toa, ao n ururinga te Tia Kamaiu. N ataakina bwa ngkai E anga Maiuna ibukiu e kakorakora nanou ni kakataiu. I tatataro naba ni katoa bong, wareki booki aika tabu, buokiia tabeman, ao ni kataia n riki bwa te aomata ae raoiroi.

Nakoia raoraou ake a nang bwabetitoaki, au kaantaninga bwa kam kaaniaki riki ma Tamara are i Karawa ao n namakina Ana tangira ae kororaoi!