“Ngaia Ko a Tia ni Bwabetitoaki. Ngkai Tera?” Te Rao,, Tianuare 2026, 36–37.

Ngaia Ko a Tia ni Bwabetitoaki. Ngkai Tera?

Ko a kaman tia ni bwabetitoaki? E tamaroa anne! A rangi ni kukurei Tamara are i Karawa ao Iesu Kristo ngkai ko karaoa am babaire bwa ko na Iriiria.

Te bwabetito bon teuana mai buakon moan mwaneka n mwanangam inanon am reitaki n te berita ae tabu ma Tamara are i Karawa ao am Tia Kamaiu. Aikai tabeua bwaai ae ko na teimatoa ni karaoi ke ni moanna ni karaaoi ngkai ko a tia ni bwabetitoaki.

Kakauongo nakon te Tamnei ae Raoiroi

Uringnga ngke ko karekea ana bwaintituaraoi te Tamnei ae Raoiroi imwiin am bwabetito? Ngkai E kona ni memena iroum ngkana ko rinea te eti. E taetae n tainako te Tamnei ae Raoiroi nakoira rinanon ara iango ao ara namakin. Te kakauongo nakon te Tamnei ae Raoiroi e na buokiko ni karaoi rinerine aika a raraoi ao ni kunea te kimwareirei.

Iangoia: Nningai te tai are ko namakina iai te Tamnei ae Raoiroi? E kona n riki bwa te taneiai ae bubura ke teuana ae uarereke!

Raira nanom

Ngke e mate Iesu Kristo ibukin ara bure, E karaoia bwa ti aonga ni kona n rairinanora ni kabane. Te rairannano nanona kararoako man rinerine aika a kairua ao rairaki nakon Tamara are i Karawa ao Iesu Kristo. A rangi ni kukurei ngkana ti rineia bwa ti na rairi nanora ibukina bwa e buokiira ni kaaniira riki Mangaiia.

Iangoia: Tera teuana te bwai ae ko kona ni karaoia are e na kona ni buokiko n rairaki nakon Tamara are i Karawa ao Iesu Kristo?

Anaa te toa

Imwiin am bwabetito, te toa e a rangi ni kakawaki riki. Ngkana ko anaa te toa, ko kabooua am berita are ko karaoia n tain am bwabetito bwa ko na kawakin tuua ao n iriira Iesu Kristo. Ngkana ko aki tau ni kawakin tuua aikai, te toa bon te kauring ni katoa wiiki bwa ibukin Iesu Kristo, ti kona n rairinanora ao ni kabwaraaki ara bure.

Iangoia: Tera teuana te kawai ae ko na kona ni karika te toa bwa e rangi ni kakawaki n te wiiki aei?

Katauraoi ibukin te Tembora

Te tembora bon ana auti te Atua ae tabu. N te ririki are e koro iai 12 am ririki, ko kona n nakon te tembora ao ni buokiia tabeman ma karaoan te bwabetito ibukiia maate. Imwiina, ko kona ni karaoi riki oin am berita aika tabu ma Tamara are i Karawa. Te bwai are ko reiakinna inanon te tembora e na buokiko n rangi ni kaaniaki riki ma Tamara are i Karawa ao Iesu Kristo!

Iangoia: Tera teuana te bwai ae ko kona ni karaoia ngkai bwa ko aonga ni katauraoiko nakon te tembora?