“Kōn Wōt Tampeļ eo,” Jera, Jeptōm̧ba 2025, 30–31.
Paineer ro ilo Aolep Āne
Kōn Wōt Tampeļ eo
Juon bwebwenato em̧ool jān Vanuatu.
“Mijenede ro re!” Graham ekar ekkūrļo̧k. Ear jaaļeļo̧k mijenede ro ke rej etetalļo̧k n̄an m̧weo.
M̧am̧a, Baba, im Nunu, ļaddik eo jein Graham, raar peptaij iiō eo ļo̧k. Graham im ļaddik eo jatū, Job, raar dik wōt n̄an peptaij. Ak ekar em̧m̧an wōt ippaer ekkatak ippān mijenede ro.
“Rainin kem kōņaan kōnono kōn tampeļ eo,” Elder Hale ear ba. “Ej juon em̧ ejenolo̧k ijo komaron̄ kōm̧m̧an kallim̧ur ippān Anij im liāp ippān baam̧le eo am̧. Meļeļein bwe kom maron̄ ippān doon n̄an indeeo.”
“Eo epaaktata ej pād ilo New Zealand.” Elder Singh ekar jibwe lōn̄tak juon pija in juon em̧ mouj eaiboojoj. “Iaļ eo etoļo̧k. Ak kōjeraam̧m̧an ko renaaj ļap.”
M̧am̧a ear ba “Kem kōņaan etal.”
Ro jinen im jemān Graham raar karōk tūreep in tampeļ eo aer ippān bar juon baam̧le jān m̧ōn jar eo. Naaj er baam̧le ko ruo m̧oktata jān Vanuatu n̄an etal lowaan tampeļ eo!
Jejjo allōn̄ tokālik, raan eo ekar itaatktok n̄an tureep eo aer. Kar jinointata in an Graham uwe lo baluun, im ekar limo. Ear kalimjōkļo̧k kōdo ko im lojet eo ium̧ier. Ear ememļo̧kjen kōn juon em̧ mouj eaiboojoj. Ear kijooror in lo e!
Ke rej jok, raar uwe lo juon baj. Ekar ekkajkaj iaļ eoļo̧k, im Graham ar m̧ōk. Ak m̧ōttan jidik retōpar.
“Lale!” Graham ear jitōn̄ļo̧k wūntō eo. En̄in! Ear aiboojojļo̧k jān pija ko.
Ilowaan tampeļ eo, ekar lur im aenōm̧m̧an. Aolep raar nuknuk mouj. Ilo jidik iien, Graham im būratōr ro an raar jijōt ilo ruum̧ in kōttar eo im kalimjōk pija ko pijaan Jisōs Kraist.
Innām juon rijerbal in tampeļ ar tōl er n̄an ruum̧ in liāp eo. Jinen im jemān Graham raar juubkwe turin juon lo̧katok em̧ōj kōbare kōn m̧ōttan eo emeoeo. Raar m̧ōņōņō!
Graham im būratōr ro an raar juubkwe turin M̧am̧a im Baba. Raar kalimjōk kūlaaj eo ekilep im aetok dipin m̧weo. Annan̄ier ar etal wōt im jab jem̧ļo̧k.
“Kūlaaj ko rej kakeememej kom̧ ke kom̧ maron̄ ippān doon n̄an indeeo,” rijerbal in tampeļ eo ar ba.
Graham ar en̄jake m̧ōņōņō im ineem̧m̧an. Kar āinwōt n̄e Rilo̧mo̧o̧r ej atkbwoje.
Im ekar iien rool n̄an m̧weo. Ioon baj eo ļo̧k n̄an baluun eo, Graham eļakkar ļōmņak kōn en̄jake eo ejenolo̧k me ekar en̄jake ilo tampeļ.
Jejjo raan tokelik, juon ļan̄ in kōto ekar itok. Wōjke palm ko āinwōt n̄e raar tōn būlo̧k n̄an jimettan!
Graham ear mijak. “Jenaaj ke pād ilo kōjparok?”
“Aaet,” Baba ear ba. “Ak elukun kajoor kōto kein. Mijenede ro raar ba aindoon ilo m̧ōn jar eo m̧ae ejako kōto eo.”
Graham ar jipan̄ M̧am̧a ineek jet m̧ōn̄ā im kooj n̄an m̧ōn jar eo. Elukun kar ļap an ekkōtoto!
Lowaan m̧weeo, ekar em̧m̧anļo̧k an Graham en̄jake. Aolep ro m̧ōttaer jān mōn jar eo repād ijo. Ak eļakkar ron̄ ainikien kōto.
“Ak m̧weeo m̧ōd?” Graham ear kajjitōk.
“Jej aiku kōttar an jako ļan̄ n̄an lale.” Eaar atbokwoje tok. “Ta eo eaorōtata ej bwe baam̧le in ad epād ilo kōjparok. Keememej en̄jake eo am̧ kar ilo tampeļ?”
Graham ar emajidjid. “Iar en̄jake m̧āņāāņ im ineem̧m̧an.”
Jemān ekar ettōn̄dikdik. “Im kōnke kōn Jisōs Kraist im liāp ilo tampeļ, jemaron̄ ippān doon n̄an indeeo.”
Graham ar ļōmņak kōn en̄jake in m̧ān̄āāņ im aenōm̧m̧an eo ear en̄jake ilo tampeļ. Ejim̧we Baba. Kōn wōt Jisōs Kraist im bujen ko an tampeļ, remaron̄ baam̧le n̄an indeeo. Im kōnke ear jeļā, aolep men renaaj em̧m̧an.
Kōmeļeļe ko jān Eduardo Marticorena