“Bwebwenato ippān Gabby kōn Jerbal ilo Kabun̄ in,” Jera, Jeptōm̧ba 2025, 40–41.
Bwebwenato ippān Gabby kōn Jerbal ilo Kabun̄ in
Gabby ej juon eo 11 an iiō jān Harare, Zimbabwe. Kem kar kajjitōk ippān jet kajjitōk kōn tōl al ilo m̧ōn jar eo.
Kwaļo̧k kajeem make n̄an kōm.
Em̧m̧an ippa kōmat kōm̧aolaļ im m̧ōn̄ā ko renna im kōjan̄jan̄ marimba. Ijeļā al im eb, im n̄aij ekkatak kōjan̄jan̄ flute, xylophone, im piano.
Jiron̄ kōm kōn kūr kāāl eo am̧.
Bisop ear kajjitōk bwe in jipan̄ tōl al ilo iien kweilo̧k in kwojkwoj eo. Iar jab kōtmāne im kar ļōmņak ke enaaj kar kāālet juon eo erūttoļo̧k. Ak iar bar en̄jake iakwe im m̧ōņōņō kōnke em̧m̧an ippa kōjan̄jan̄.
Jet iien ij mijak n̄e enaaj bōd al aō juon al im armej renaaj ron̄. Bōtaab Jetōb Kwojarjar ej jipan̄ eō im̧aan mejan aolep. Kiiō ke imineneļo̧k kake, elukun limo!
Ewi kar wāween ke kwaar tōl al presentation eo an ajri ilo kweilo̧k in kwojkwoj?
Ilo jinoin ekar kamijak. Ak ke kemij ekkatak, jet iien iar meloklok jet iaan naan ko. Innām iar ekkatak al ippān m̧am̧a ilo m̧weo, im menin ekar jipan̄. Ke kem kar ekkatak ilo Būraimere, ekar ļap ainikien aō al n̄an jipan̄ ro rejjab jeļā riit ak jab jeļā naan ko.
Iar m̧ōņōņō ke ej raan in presentation eo. Aolep men rekar aiboojoj. Iar en̄jake aenōm̧m̧an im lur, im naan ko raar itok n̄an n̄a.
Ta eo kwaar ekkatak jān en̄jake in?
Iar ekkatak ke jet iien men ko rejjab jejjet, ak ej em̧m̧an wōt im komaron̄ ekkatak jāni. Tōl al ilo Būraimere ekar bar kōpooj eō n̄an kūr eo aō ekāāl.
Ta kapilōk ko konaaj kar jiron̄ ro jet kōn jerbal ilo jikin jar?
Jet iien emaron̄ pen n̄an jerbal im̧aan mejan bujen armej, ak men in kōn kōj ajri ek bwe jemaron̄ tōl jekdoon iiō eo ad ak ewi jon̄an aetokid. Inaaj kar jiron̄ er ke jekdoon n̄e jet iien mijak ko ad rej lelaļļo̧k kōj, Jetōb Kwojarjar emaron̄ jipan̄ kōj en̄jake aenōm̧m̧an. Aolep iien E enaaj jipan̄ kōj bar walōn̄tak.