Ena Vuku ni Valetabu

Mai vei Lucy Stevenson Ewell

Ai talanoa dina mai Vanuatu.

Na matana e dua na gonetagane matadredredre ena mata ni dua na mape kei Vanuatu

“Era sa tu oqo na daukaulotu!” E kacivaka mai o Graham. A yaloyalo vei rau na daukaulotu ni rau sa gole yani ki nodrau vale.

A papitaiso tu ena yabaki sa oti o Na, Ta, kei na tuakai Graham, o Nunu. Erau se gone sara o Graham kei Jope na tacina gone me rau papitaiso. Ia erau se taleitaka tikoga na vuli mai vei rau na daukaulotu.

“Nikua keirau vinakata me da veitalanoataka na valetabu,” e kaya o Elder Hale. “Oqo e dua na vale digitaki ka rawa ni o yalayala vata kei na Kalou ka vauci ki na nomu matavuvale. Kena ibalebale oya ni dou sa rawa ni tiko vata me tawamudu!”

“Na kena e voleka duadua e Niu Siladi.” A taura cake o Elder Singh e dua na iyaloyalo ni dua na vale vulavula totoka. “E yawa sara na ilakolako. Ia ena yaga vakalevu na veivakalougatataki.”

“Keitou vinakata me keitou lako,” e kaya o Na.

Erau a tuvanaka na itubutubu nei Graham na nodratou ilakolako ki na valetabu vata kei na dua tale na matavuvale ena lotu. Iratou oqo me imatai ni rua na matavuvale mai Vanuatu me curu ki na valetabu!

Vuka tiko na waqavuka kina dua na valetabu kei na dua na basi e gole tiko kina

Ni oti e vica na vula, sa yaco mai na siga me rautou biubiu kina ena nodrau ilakolako. Oqo na imatai ni gauna me vodo waqavuka kina o Graham, ka sa dua na ka marautaki. E vakaraica tu na o kei na wasawasa e ra. A raitayaloyalotaka na vale vulavula balavu ena nona vakasama. Sa sega tale ni rawa ni waraka me raica!

Ni rautou sa kele yani, ratou vodoka sara na basi. Esa vodo tatavutuvutu, ka sa oca sara o Graham. Ia eratou sa voleka sara ni yaco.

“Raica!” A dusia tani ena katubaleka o Graham. Sai koya ya! Esa totoka cake sara mai na iyaloyalo.

Ena loma ni valetabu, e vakadigagalu ka vakanomodi . Era vakaisulu vulavula taucoko. Ena dua na gauna, eratou a dabe toka o Graham kei iratou na tacina ena rumu ni wawa ka raica na iyaloyalo kei Jisu Karisito.

Sa qai liutaki ratou e dua na liganicakacaka ni valetabu ki na rumu ni veivauci. Erau tekiduru toka na itubutubu nei Graham ena yasa ni dua na icabocabo ni soro ka ubi tu ena isulu malumu. Eratou mata mamarau vakalevu sara!

E tekiduru o Graham kei iratou na tacina e yasadrau o Na kei Ta. Eratou raica na iloilo lelevu ka balavu ena lalaga. E toso tikoga na kedratou iyaloyalo.

“Na iloilo esa vakananumi iko ni rawa ni dou na tiko vata me tawamudu,” e kaya na liganicakacaka ni valetabu.

Sa marau vakalevu sara o Graham. Sa vaka e mokoti koya vakataucoko tu na iVakabula.

Sa voleka sara na gauna ni lesu i vale. Ena basi kei na waqavuka, e vakasamataka tikoga o Graham na veika talei a vakila ena valetabu.

Ni oti e vica na siga, a yaco mai e dua na cagi levu. Na vuni niu e vaka me ra kamusu rua!

Sa rere o Graham. “Tou na vinaka beka?”

“Io!” a kaya o Ta. “Ia e kaukauwa sara na cagi oqo. Erau kaya na daukaulotu me rau soqoni vata ena valenilotu me yacova ni sa oti na cava.”

Matavuvale era dabe toka ena idabedabe ka raica tu mai katubaleka na veivunikau vukataki

A vukei Na o Graham me kauta eso na kakana kei na itutuvi ki valenilotu. Sa liwa kaukauwa sara na cagi!

E loma, e vinaka cake vakalailai o Graham. Era a tiko kece e kea na nodratou itokani mai lotu. Ia e se rogoca tikoga na tagi ni cagi.

“Vakacava na neitou vale?” E taroga o Graham.

“Eda na waraka me oti na cava meda na qai raica.” A mokoti koya voleka o Na. “Na ka bibi duadua oya ni sa taqomaki vinaka tiko na nodatou matavuvale. O nanuma tiko na veika o vakila ena valetabu?”

E deguvacu o Graham. “Au vakila niu katakata ka taqomaki.”

A matadredredre o Ta. “Ena vuku i Jisu Karisito kei na nodatou vauci ena valetabu, sa rawa kina vei kedatou me tiko vata me tawamudu.”

A vakasamataka o Graham na yalo katakata, ka vakacegu a vakila ena valetabu. E dina o Ta Ena vuku i Jisu Karisito kei na veiyalayalati ni valetabu, sa rawa kina vei ratou me dua na matavuvale tawamudu. Baleta ni kila o koya, ena vinaka na veika kece.