“5 Na Ka Me Nanumi Me Baleta na Taqomaki ni Yago,” iTokani, Sepiteba 2025, 38–39.

5 Na Ka Me Nanumi Me Baleta na Taqomaki ni Yago

Na yagomu sa isolisoli mai vua na Tamada Vakalomalagi. E vinakata o Koya me vukei iko mo taqomaki ka marau. Ke dua e tovolea me vakamavoataki iko ena vosa se ivalavala, e sega ni DONU! Sa dodonu meda yalovinaka ka veidokai vei ira na tani, ka namaka talega me ra na yalovinaka ka dokai keda.

Sa donu tu mo kaya sega, kina dua madaga na uabula. O iko e lewa na yagomu. Kena ibalebale o na vakatulewataka ke dua e rawa ni tarai iko, mokoti iko, se reguci iko. E rawa nio vakatovotovotaka mo kaya “Sega,” “Kakua ni tarai au,” kei na “Biuti au.” Kevaka o tarai se kerei mo cakava e dua na ka o sega ni logavinaka kina, esa donu mo kaya sega ka biubiu ke rawa.
Mo kila na tarai cava e vinaka se sega. Na veitaratara vinaka ena vukei iko mo vakila ni o lomani (me vaka na veimoko se high five) se savasava ka bulabula tiko (me vaka e vukei iko e dua na itubutubu mo sisili se vukei iko na vuniwai ni o tauvimate). Ena so na gauna e rawa ni mosi na veitaratara taqomaki, me vaka na cula, ia e veitaqomaki baleta nio bulabula tiko kina. Na tarai sega ni taqomaki ena vakamosia na yagomu se na lomamu, me vaka na moku, biliraki, se tara na tiki ni yagomu tabu. Na veitaratara mosimosi se sega ni logaloga vinaka e sega ni donu.
Eso na tiki ni yagomu e tu vakatikitiki ka sega ni dodonu me tarai iko e dua tale. Na tiki ni yagomu e okati kina na yagomu ka ubi tu ena dua na isulu ni sisili. E sega ni dodonu vei ira eso mera tara na tiki ni yagomu (e ruku se dela ni nomu isulu) se kerei iko mo tara na nodra. Ke yaco vei iko oqo, veivosaki kei na dua na uabula nuitaki ena gauna totolo duadua.
Nanuma tiko na kedrau duidui na ka vuni kei na ka e veivakurabuitaki. Na veivakurabuitaki e dua na ka marautaki vei keda kece, me vaka na iloloma ni siganisucu. E dua na ka vuni oya ni dua e tukuna vei iko mo kakua ni tukuna vua e dua. Kevaka o kerei mo vunitaka e dua e tarai iko se vakamavoataki iko, e dodonu mo tukuna sara vua e dua o nuitaka. Tukuna tikoga vei ira na uabula nuitaki me yacova ni dua e vukea mo taqomaki.
Kevaka e dua e tarai iko se vakamavoataki iko, e sega ni nomu cala. E dua e vakamavoataki iko ena rairai tovolea me vakadinata vei iko se so tale nio cakava e dua na ka cala, ia o a sega. Na Tamamu Vakalomalagi kei Jisu Karisito sa kilai ka lomani iko vakavinaka sara. Kerea na veivuke ni dua na uabula nuitaki, ka nanuma tiko ni sa rawa talega mo na masuta na Tamada Vakalomalagi me veivuke.