I Aki Rang Kororaoi
E a toki nakoraoin ana bong Adeline!
Te karaki ae koaua mai France.
E kabanea ni korea te kabanea ni bwaoki Adeline iaon ana beeba. Irarikina, e koreia, Karaoan au tataro n te moaningabong ao n te tairiki.
“Tera aio?” E titiraki Maman.
“I karaoa au rinan ni kaetibwai ibukin ningabong,” e taku Adeline. “N na karekea au bong ae kororaoi!”
E katoua ana ari Maman. “Ko koaua raoi?”
E katoutoua atuna Adeline. “N te Moanrinan ti reiakinaki arora ni kororaoi inanon Kristo. N na karaka tamaroau bwa I aonga ni karekei au bong aika a kororaoi.”
“I kukurei ngkai ko tangiria ni karaoi rinerine aika raoiroi,” e taku Maman. “Ma ko ataia, ti iai temanna te aomata iaon te aba ae kororaoi—Iesu Kristo.”
E katiia te ang mai wiina Adeline. “I ataia. Ma I rang kan kataia! I taku bwa I ko kona ni karaoia.”
Ngke e roko te ingabong, e a tauraoi Adeline. E karaoa ana kainiwene ao e karaoa ana tataro.
N te kaingabong, e buoka tarina ae uarereke ni kamwarakea, Sylvia. Ngke e kabwakaa kanana aika peaches Sylvia i aon ana kaintekateka, e anaa ikena ae korakora Adeline. E wareware ni karokoa aua ao e ibuobuoki ni kaitiaki.
N te reirei, e tarataraia aomata aika a kainnanoa te ibuobuoki Adeline. E rairaki waen Lucas, ngaia are neiei e uota ana ture ni katawanou ibukina.
Ngke e kiitana te reirei, E anga moangarena ae te kabanea ni bubura Adeline nakon te aine are e taua mataroan te oo. E aki toki n tataraa ni mamata n un te aine. Ma n te bong aei e moangare naba rikaaki!
Imwiin te reirei, e angan Sylvia ana man ae tantangiria Adeline bwa e na takakaro ma ngaia. Ao imwain ae e matu, e tataro. E kaeti bwaai iaon ana rinan ni karaoan bwaai ao e kauangii inanon ana burangketi. E rang namakina te kakatonga ao te rang ni kua. E a tauraoi nakon te bong ae kororaoi nakon te ingabong!
Ngke e uti Adeline n te bong are imwiina, a bane ni maeanako ana taore i aon te timanti. E taua teuana Sylvia ao n taua ni kamatoa. Tao e bane ni katiki nako!
“Sylvia!” E takarua Adeline. “I a tia n tuangko bwa kona aki ringiia au taore!” E anaa te taore are e taua Sylvia. E tang Sylvia ao e birinako.
E tara ana rinan ni kaetibwai Adeline i aon te mataroa. E namakina te rawawata.
E roko Maman ngke e a namakina ranin matana i aon tabana Adeline.
“Tera ae riki?” E titiraki Maman.
“I mwaninga n tataro. I aki karaoa au kainiwene.” E bwana n tang Adeline. “Ao I ribuaka nakon Sylvia. E a bon toki au bong ae kororaoi!”
E rabwata Adeline Maman. “E bon rang matoatoa te kororaoi ni katoa tai. Ni bon etina, e bon aki kona.”
E mata n un Adeline. “Ma ngkanne N na kanga ni kororaoi iroun Kristo?”
“Bon anne! Ti aki kona ni kororaoi ngkana akea Iesu Kristo,” e taku Maman. “E anga maiuna ibukira ibukina bwa e ataia Tamara are i Karawa bwa ti na kona ni kairua ao ni kainnanoa te ibuobuoki. E anai arora aika a aki kororaoi ao e katamaroai riki.”
E iangoia Adeline. “Ngaia I aki kona ni kororaoi ni katoabong?” e titiraki.
E ioioa atuuna Maman. “E bon aki. Kona bon karekei boong aika aki nakoraoi. Ma kona karekei naba boong aika a nakoraoi.” E kaeta iran Adeline Maman i akuun taningana. “Kataakin karaoan am kabanea ni kona bon ngaia ae kakaawaki riki. E ngae ngke e waaki te bong ma te rinerine ae kairua, ti kona n tainako n tataro bwa ti na rairannano ao ni manga kataia riki. Ma n ana ibuobuoki Iesu Kristo, ko bon tau.”
E namakina te aabue inanona Adeline.
“Ngkai, ibukin am rinan ni karaoan bwaai.” E kotea te rinan ni bwai Maman. “E uara ngkana ti kabanea ara iango iaon te bwai ae ti teuana?”
E taraa ana rinan n bwai Adeline. E raeuaka te mwakoro ni beeba ao e kanimwa are e tiku n te angamaing i aon te mataroa. Te aitem are e teimatoa ikekei e kangai, Tataro n te moaningabong ao n te tairiki.
E moangare Adeline. “Tao e aki kororaoi au bong mai moana, ma I kona n teimatoa ni karaoa au tataro ngkai. Ao n ana ibuobuoki Iesu Kristo, e na bon tau!”
Korotamnei iroun Giovanni Abeille