Bwaeoniia n Aba Nako
Teutana Kaanga Aron Karawa
“Ko aki kan roko n taromauri?” E titiraki ai Tamau Reza.
Te karaki ae koaua mai India ao Canada.
E rukuma te kabanea ni kabaraaki Tahira ao e karinna n ana tutikeeti. E katauraoi ibukin te mwananga ni kabanea te tiamwa ma ai tinana ao ai tamana i Canada. E ingainga nanona ao teutana te nakonnano. E rangi n raroanako Canada man mweengana i India.
“A bane n reke am bwai?” E titiraki Tinana.
“Kaanga I taku.” E kaina ana tutikeeti Tahira.
“E na bon nakoraoi mwanangam. Koa angan Uncle Reza ao Aunt Misu au inga ae bubura,” e taku Tinana.
Ngke e ruo man te wanikiba Tahira i Canada, e angan Uncle Reza ao Aunt Misu te inga ae bubura. “Aio mairoun tinau,” e taku.
E kabanea tabeua te bong are imwiina n neweaba te kaawa ao tabo aika uakaan. E moan roko n te tabo ni kamaangang ae kamimi n noora te Niagara Falls. E bon rang kaunga!
Ni bwakantaain te Kaonobong, e ibuobuoki Tahira ni karaoa te moa makhani ibukin te katairiki. Imwiin amwarakeia, e titirakinna ai tamana ae Reza.
“Ko kan iriira n nako n taromauri ningabong?” e titiraki. “Ti na nako n taromauri n te Ekaretia ni Kiritian. Ti reiakina rongorongon Iesu Kristo ao Ana euangkerio ikekei.”
“Ngaia,” e taku Tahira. A kakoaua te aro teuana Tamana ma Tinana, ma Tahira e nakon te reirei ni Kiritian ae a maeka n te kaawa n reirei i India. Kaean te ekaretia teuana e aki rang karika te kaokoro.
Te bong are imwiina, e karina te kunnikai Tahira are e anganna ai tinana bwa e na bwainna. Ngke a roko n te autinibootaki ao a rinnako, a bane n anene aomata. E tei Tahira ao e taraia ni kabane aomata. Iai tina ao karo aika a tekateka ma natiia. A bane n tara ni kukurei. E rang tamaroa te anene.
Aio kanga ai bon namakinan karawa, e iango Tahira.
E tekataka Tahira i aon te tabo n tekateka teuana ma ai tinana Misu ao ai tamana ae Reza. E mamataku ngke e bwatinaki te turee ni kariki ao te ran. E ongora irouia taan maroro n marooroakina taekan Iesu Kristo. Ao e ongora riki n taian anene. Te kabanea ni kuna bon taekaia utu ake a ikotaki n akea tokina. E tangira te namakin are e roko man taekan te kuna.
Imwiin te kabanea n tataro, e rairaki Tahira nakon ai tamana are Reza. “Tera ae nanonaki n te ikotaki n akea tokina?”
E matangare Uncle Reza. “Ti kakoaua bwa ngkana ti iriira Iesu Kristo ao ni karaoi ao ni kawakin berita ma te Atua, ti kona ni maeka i karawa ma ara utu n te bong teuana—n ikotaki ni kabane.”
E namakina te aabue Tahira inanona mai atuuna nakon tabon waena. E tangira te iango are e ikotaki ma ana utu n akea tokina.
Imwiin te taromauri, e teimatoa n iangoa te katangitang ae rang tamaroa Tahira. E tangiria n ata riki rongorongon Iesu Kristo ao te utu ae akea tokina. E baireia bwa e na kaitibo ma mitinare. E nako te wiiki teuana ma teuana, e rikirake n ataia Tahira bwa e koaua te euangkerio.
E tareboniia ana karo Tahira ni kaongoia te bwai are e reiakinna. Imwiina e titirakiniia te titiraki ae moan te kakaawaki. “I kona ni bwabetitoaki?” A taku eng!
N te bong are e bwabetito iai, Tahira, Uncle Reza, ao Aunt Misu a anenea “Ngai natin te Atua.” Uncle Reza e a tia n rairia bwa aonga ni kona n aneneia n Hindi. Hindi bon te taetae are e kabongaa ni mweengana i India.
Ngke e anene Tahira, e namakina te aabue inanona. Kanga titebo ma namakinan karawa. Ao e ataia Tahira bwa ibukin Iesu Kristo, ngkana e kawakina ana berita nakon Tamana arei Karawa, e kona ni maeka ma ngaiia ni kauoman n te bong teuana.
Kamatata n te tamnei iroun Ekata Mandal