Te Ekaretia ae Boou iroun Jamesi
E namakina te kaokoro ikai Jamesi nakon are e namakinna n ekaretia tabeua.
Te karaki ae koaua mai Biti.
E otinako Jamesi nakon te oo ae ooaki are a kawakina iai aia beeki ana utu. “Aio ami bwai, beekii.” E kareia n amwarake tabeua, ao beeki a ubunna ma te kukurei.
Imwiina e uoti bwatoro n ran Jamesi nakon te taebu i tinaniku. Te ran ae mwaitoro e bwaro inanon bwatoro ngkai e kauka te taebu. Te kamwarake beeki ao kanoaan te ran ibukiia ana utu bon anne arona n ibuobuoki ni katoa bong.
“Jamesi!” E wewete Tinana. “Tauraoi nakon te taromauri?”
E kaina mwiin te ran Jamesi ao e uota te kabanea ni bwatoro ni karinna. “I a tauraoi ngkai.”
Ni katoa Tabati ana utu Jamesi a nanakoko n taromauri n aia Aro ni Kiritian n aia taun. E tatangiria n reiakina rongorongon Iesu Kristo.
E aki maan imwiina, a rianna Jamesi ma mwanena aika uarereke ma nikiraia kain aia utu nakon te taromauri. Tabeman mooa a ririaki i aon te kawai.
Ma ngke a roko ikekei a in mataroa. “I mwaninga are e in te umwantabu n te wiiki aei ao te wiiki ae e na roko imwiin nakon te mitinare,” e taku Tamana.
“Iai riki te taromauri ae ti kona ni kaea?” e titiraki Jamesi. E na rang n nanokawaki ngkana e aki taromauri n te wiiki aei.
E iango tabeua te tai Tamana. “Eng!” e taku. “I taku bwa iai ae I ataia”
Jamesi ao ana utu a rimwiin Tamana n oki nakon aia auti. A bane n toka i aon aia booti te kai ae uarereke i mataniwiin te karaanga. E tekateka Tamana mai buki ni kamaiua te intin.
E rurunga te booti iaon te karaanga. E taratarai mannikiba Jamesi i aon aroka aika kiriin aika a ririeta. Imwiin tao 15 te miniti, a noora autin te aro. Iai te kanikina iaona ae kangai, “Ana Ekaretia Iesu Kristo ibukia Aika Itiaki ni Boong aika Kaitira.”
“Aio te ekaretia ae I iangoia,” e taku Tamana. E kabuta te booti nako mataniwiin te aba, ao a bane n ruo te koraki. A kona n ongo te anene man te tabo n taromauri.
Inanona, a tekateka Jamesi ma ana karo ao mwanena. A ongora irouia taan taetae ao taian anene. E namakina te aabue inanona Jamesi, n namakina te kukurei.
Ngke e bwara te bootaki, e roko n taetae ma ngaiia te aine ae tikiraoi. “Iai ara kiraati ae onoti ibukiia ataei,” e taku. “E aranaki bwa te Moanrinan. Kam tangiria n iria?”
E taraia mwanena Jamesi. E namakina te nakonnano teutana n ira te kiraati ae akea ae kina iai! E kakaawaki bwa a kona n iri naba mwanena. Tao e na bon kaunga.
“Ngaia,” e taku Jamesi.
“Ti a nako!” E tara ni kukurei Marama.
A rimwiin te aine arei Jamesi ma mwanena aika uarereke nakon te umwanreirei. A rang mwaiti ataei aika a tekateka i aon kaintekateka aika a uarereke, n taetae ao ni ngarengare. Ngke e tekateka, a moangare nakoina. A rangi n raoiroi aomata nako!
A anenei kuuna, ao ataei ake tabeman a buoka Jamesi ma mwanenea n reiakini taeka. Imwiina a reirei taekan Iesu Kristo. E namakina te kaokoro ikai Jamesi nakon are e namakinna n ekaretia tabeua. Bon te bitaki ae tamaroa.
Ngke e bwara te taromauri, a toka n te booti ana utu Jamesi n oki nakon mweengaia. E a manga tara riki te kanikina are i tinanikun te kateitei n te tabo n taromauri. Iai aran Iesu Kristo i aona. Tao bon bae n ana Ekaretia Iesu Kristo! E tangiria Jamesi n iriira Iesu.
“Ti kona ni manga oki n nakomai n te wiiki ae e na roko?” E titiraki Jamesi.
A wingare Tinana ao Tamana. “Ti iangoa naba anne,” e taku Tinana.
“Ieei!” E kukurei Unaisi.
E wiingare Jamesi. E ataia bwa iai te bwai a kunea ae okoro. E e aki kona n tataninga n reiakinaki riki.
Tamnei ni kamatata iroun Bethany Stancliffe