Ron̄jake Jetōb Kwojarjar eo

Chim ekar kōpeļļo̧k mej ko mejen remejki. Kiiō ekar jem̧ļo̧kin juon wiik!

“Iien rūj, ak jenaaj rūm̧wij,” M̧am̧a ekar ikkūr.

Chim ekar kōņaan kiki aitokļo̧k, ak rainin ekar raan in wia eo. Ekar aikuj jipan̄ M̧am̧a wia m̧ōn̄ā n̄an wiik eo. Kōn menin ekar jerkak im m̧ōkaj an kan̄e m̧abun̄ eo an.

M̧am̧a ekar ļap an kōm̧m̧an n̄an Chim im brother ro an. Ekar ļap an boub ilo jerbal, im ekar jab ļap an iien ilo m̧weo. Chim im brother ro an rekar jerbal ippān doon n̄an kadedeļo̧k jerbal ko ilowaan m̧weo. Chim ekar m̧ōņōņō in jipan̄.

Ke Chim im M̧am̧a rekar ro̧o̧ltok jān jikin wia eo, M̧am̧a ekar aikuj etal n̄an jikin jerbal. Ke ekar jako, Chim im brother ro an rej kappojak n̄an raan in Jabōt. Chim ej kepooj juuj ko, aitokne, im jōōt eo enaaj kar kōņake n̄an jar ilju. Ļaddik eo jein, Robin, ekar jipan̄ aene jōōt eo an. Tokālik rej kōm̧m̧an kejota.

Chim ekar karreoki jikin m̧ōn̄ā eo ke M̧am̧a ekar ro̧o̧ltok. Kar loe ke ekar likkuun m̧ōk.

“Eowaj, M̧am̧a.” Chim ekar leļo̧k juon booļ in m̧ōn̄ā emāāneen bwe en kan̄e.

M̧am̧a ekar ettōn̄ dikdik. “Kom̧m̧ool kōn jipan̄ eo am̧ rainin. Enno menin!”

Jibbon̄in raan eo tok juon, Chim ekar m̧ōkaj im jerkak im kepojak n̄an jar. Ekar kijooror in loe ro m̧ōttan ilo Būraimere im ekkatak kōn Jisōs Kraist.

“M̧am̧a?” ekar jidik wōt an ikkūr, kōļaļļaļ ilo kōjem eo. “Kwoj ke itok im jar ippemim rainin?”

“Ijjab maron̄.” M̧am̧a eaar ba. “Ij jerbal in rāelep.”

“Em̧m̧an.” Chim ekar būrom̧ōj jidik. Enan̄in juon iiō in an M̧am̧a kar āliktata itok im jar ippemim. “Kōkm̧anm̧an am̧ ettōr im jeram̧m̧an ilo rainin,” ekar ba n̄ane.

“Pojak n̄an etal?” ļaddik eo jatin, Mattew, ekar kajjitōk.

“Aaet!” Chim ekar kōņak juuj ko an im ettōr nam̧ōjļo̧k ippān brother ro an n̄an uwe ilo bus eo.

Chim ekar em̧ōņōņō ke ekar dreļo̧n̄eļo̧k m̧ōn jar eo. Ekar kajjeon̄ ļōmņak kōn Jisōs Kraist ilo iien kwojkwoj eo. Im ilo Būraimere, ekar likkuun kate n̄an ron̄jake katak eo an Sister Ortega.

“Rainin jekar ekkatak kōn Jetōb Kwojarjar,” Sister Ortega ekar ba. “Jetōb Kwojarjar ej boktok enaan ko n̄an kōj jān Jemedwōj Ilan̄. Āinļo̧k wōt juon radio.”

Chim ekar kalimjōk pijaan radio eo Sister Ortega ekar jibwe n̄an lōn̄.

“Juon radio ej jerbal ilo an bōk juon signal im leļo̧k n̄an ainikien ko jemaron̄ ron̄,” ekar kōmeļeļeiki. “Kwoj aikuj leļo̧k n̄an channel eo ejim̧we n̄an ron̄. N̄an ron̄ ainikien Jetōb Kwojarjar, jej aikuj kajim̧we būruwōd im ļōmņak ko ad n̄an channel eo ejim̧we bar. Ekōjkan ad maron̄ kōm̧m̧ane menin?”

Aolep rekar ļōmņak. Innem Chim ekar ba, “Jān ad ļoor Jisōs Kraist im kejparoke kien ko.”

Sister Ortega ekar mejen ettōn̄dikdik. “Ejim̧we.”

Ālkin jar, Chim ekar bar jipan̄ kōm̧m̧an kejota. Ej en̄jake okmeenen itulowa ilo an jipan̄. Ejeļā bwe jān an jipan̄ baam̧le eo an, ej kajim̧we būruwōn n̄an channel eo ejim̧we n̄an en̄jake Jetōb Kwojarjar.

Ke M̧am̧a ekar tōpar m̧weo, Chim ekar atabo̧kwij e eļap. Innem rekar jar e m̧ōn̄ā eo kijeer im jinoe m̧ōn̄ā.

“Kwojeļā ke ta eo ikar ekkatak ilo jikin jar rainin,” Chim ekar ba. Ekar em̧m̧an ippān jiron̄ M̧am̧a kōn Būraimere.

“Ta?” M̧am̧a eaar kajjitōk.

“Jekar ekkatak kōn Jetōb Kwojarjar,” Chim ekar ba. “Ej āinwōt juon radio. N̄e jej kōjeparok kien ko, jej ukōtļo̧k būruwōd n̄an channel eo ejim̧we n̄an ron̄jake E.”

Jinen ekar em̧ajidjid. “Elukkun em̧m̧an. Kiiō ta juon waanjon̄o̧k in kejparok kien ko?”

Chime ekar mejen ettōn̄dikdik. “Jipan̄ jinōm̧!” Ekar ettōn̄. “Ij iakwe eok, M̧am̧a.”

Kōmeļeļe ko jān Uran Duo