Al n̄an Kajako Kamijak ko

“Iien kiki,” Mamá ekar ba ilo an ettōn̄ dikdik.

Logan ekar deļo̧n̄ļo̧k ruum̧ eo an. Ekar jar im etaļ n̄an beet eo an n̄an kiki. Innām Mamá ekar riit n̄an e juon bwebwenato. Ekar jidikjidik kiilļo̧k mejān. Ejjab to eaar mejki.

Ak Logan ekar wōr juon an ettōņak ekaam̧jak. Ekar makeļo̧k iaan ilo juon jikin emarok. Ekar loe juon tim̧on ekilep, ekūrbalōklōk im ekilep n̄iiin. Ekar ainikien lāj n̄an e. Innām ekar jino ettōrļo̧k n̄an e!

Logan ekar kajjieon̄ ko. Ak ekar tippok im okjak! Tim̧on eo ekar epaakeļo̧k e im kilepļo̧k m̧ae iien—

Logan ekar jerkak im jijet ioon beet eo. Ekar ir dān in kōmjaļļaaļ ko jān turin mejān im kar loe bwe ekar marok wōt inam̧ōj.

Ekar kōņaan kōnono n̄an jinen im jemān kōn ettōņak eo. Ak ekar jab kōņaan jutak jān beet eo an. An marok ekar kōm̧m̧an an en̄jake āinwōt ewōr juon tim̧on ekar kittileek ilo juon jikin. Aolep annan̄ ko rekar kaam̧jak. Juon kidu inam̧ōj ekar āinwōt ainikien juon tim̧on ej in̄n̄ūrn̄ūr.

Logan ekar kanōk ko̧o̧j eo n̄an bo̧tin. Ekar lukkuun mijak n̄an m̧akūtkūt.

Ekar kōņaan okjaklikļo̧k im kiki. Ak kajjojo iien ekar kiil mejān, ekar loe mejān tim̧on eo ellu im ekkan̄ n̄iin. Ekar jab maron̄ bōjrak an reilo̧k n̄an annan̄ ko rekam̧jak.

Innām ekar loe juon pija ioon tebōļ eo iturin beet eo an. Pijain e, ļaddik ro jein ruo, Papá, im Mamá inam̧ōj in tampeļ eo ilo Monterrey, Mexico. Rekar lukkuun m̧ōņōņō.

Ejjab etto, naan ko n̄an al in Būraimere eo em̧m̧an ippān rekar jarjar ilo kōļmenļo̧kjeņ eo an. “Ij m̧ōņōņō in lo tampeļ eo,” Logan ekar jino al. “Inej etal n̄an ijeņ juon raan. N̄an en̄jake Jetōb Kwojarjar eo, n̄an ron̄jake im n̄an jar.”*

Ke ej al, Logan ekar ļōmņake raan eo ilo kar tampeļ eo ippān baam̧le eo an. Ekar en̄jake an lukkun aenōm̧m̧an. Kōn wōt tampeļ ko, emaron̄ pād ippān baam̧le eo an n̄an indeeo.

Logan ekar jab maron̄ ron̄ an kidu eo ro̧rro̧r kōn ainikien al eo an. Ekar kiil mejān im al wōt. “Āinwōt juon ajri nejin Anij, ikar ekkatak m̧ool in: Juon baam̧le ej n̄an indeeo.” Ekar en̄jake juon aenōm̧m̧an ilo būruwōņ eo ekar kōm̧m̧an an ettōn̄ dikdik. Ekar jeļā bwe ejjeļo̧k tim̧on.

Ruum̧ eo ekar marok im kaam̧ijak. Ak kiiō ekar meļak, im juon jikin einem̧m̧an. Logan ekar okjaklikļo̧k n̄an bed eo an ilo aenōm̧m̧an im kiki.

Ke ekar ruj, ekar det nam̧ōj. Ekar jerkak im reilo̧k n̄an meram in aļ kakilaajaj jān pijain tampeļ eo an. Ekar in̄ūrn̄ūri al eo em̧m̧antata ippān ke ekar kōppojak n̄an jar.

Ilo iaļ eo an ļo̧k n̄an m̧ōnjar eo, ekar jiron̄ baam̧le eo an kōn ettōņak nana eo an im al eo ekar al kake. Ekar ron̄jake kōnono ko im al ko ilo m̧ōn jar eo. Innām ekar iien n̄an etal n̄an Būraimere.

Logan em̧m̧an ippān ron̄jake piano eo. Im kiiō ekar jeļā bwe jet al relukkuun kajoor n̄an aer kaam̧jak tim̧on ko bwe ren ko.

“Ruwainene tok n̄an iien al eo,” Ritōl eo an Būraimere ekar ba. “Al ta eo jej aikuj al m̧okta?”

“Ijeļā!” Logan ekar ba, ilo an kajutak pein lōn̄ļo̧k imejatoto. “Jen al ‘I Love to See the Temple.’”

Kōmeļeļe ko jān Carolina Farías