Betkōj eo Ekabwilōn̄lōn̄

Jān Julia A. Anderson

“Jema Ilan̄, ejjeļo̧k kijemmim n̄an kejota. Jouj jipan̄ kōj.”

Juon bwebwenato em̧ool jān USA.

Pija eo in juon leddik painier im juon pija in betkōj ko reppen.

Ainikien kōto em̧oļo, im snow rej jepooļ handcart eo. Jane ekar kōkankanļo̧k wōt ko̧o̧j eo an ilo aeran. Ne ko neen rekar mej, ak ekar etetal wōt. Rekar ped ilo iaļ eo aer n̄an Salt Lake City, Utah.

Jane im baam̧le eo an rekar ekkatak kōn Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo England. Ke rikanaan eo ekar kajjitōk ippen membōr ro an Kabun̄ in n̄an itok n̄an Utah, baam̧le eo an rekar kakoņ aolep jāān ko remaron̄ kar bwe ren maron̄ etal ilo iaļ in. Rekar ejerakrōk ilo lom̧aļo̧ eo. Kiiō rekar em̧akūtkūt kōn handcart ko ilo jikin ko reļļap. Rekar etetal ilo elōn̄ allōn̄ ko, im ekar etal im maat kijeer m̧ōn̄ā.

Drenin kemjaaļaļ rekar otlo̧k jān mejen Jane. “Eļap aō kwole,” ekar ba n̄an ļaddik eo jein Thomas. “Ijjab ļōmņak imaron̄ etetal m̧aanļo̧k!”

Thomas ekar m̧wijit jidik kilin menin mour eo jān neen waan bwilbwil eo. “Eo, memeiki,” ekar ba. “Enaaj Em̧m̧an.”

“Kom̧m̧ool,” Jane ekar unoojdikdik ilo an memeiki m̧ōttan kilin menin mour eo.

Ejjab to ekar iien bōjrak im kakkije ilo bon̄in eo. Jet iaan em̧m̧aan ro rekar etal im kakijen buffalo. Jane ekar kōjatdikdik ke renaaj kar elolo. Lo̧jeen ekar ejjeļo̧k kobban. Ke rekar kōttar, Jane im baam̧le eo an rekar koba ippān doon ilo tūrin juon kijeek edik, rem̧ōk, rekwole, im pio.

“Jen jar,” Jane ekar ba.

Rekar bukwelōlō ippān doon, im Jineer ekar jar. “Jema Ilan̄, ejjeļo̧k kijemmim n̄an kejota. Jouj jipan̄ kōj.”

Jane im brother ro im sister ro an rekar jijet im jab ekeroro. Innem Jineer ekar kajim̧weļo̧k an jijet.

“Ta ņe?” Thomas ekar kajjitōk.

“Ij kab kemeemej juon men.” Jineer ekar m̧ōkaj n̄an handcart eo im kōpeļļo̧ke jikin m̧weik eo an baam̧le eo. Innem ekar kadiwōjtok juon bo̧o̧k metal edik im kōpeļļo̧ke. Ilowaan ekar ped ruo betkōj ko reppen. Kar bwe in tūreep eo aer ilo lo̧jet elōn̄ allōn̄ ko m̧o̧ktaļo̧k.

Jane ekar emōņōņō. Ekar wōr kijeer! “Jemaron̄ ruje n̄an m̧ōttan ko reddik im ajeeje,” ekar ba.

Ak ke rekar kajjeon̄, betkōj ko rekar likkuun pen n̄an ruji.

“Jen kajjeon̄e menin,” Jineer ekar ba. Ekar likūt betkōj ko ilo obwin Dutch eo im lutōk jidik dren iooer. Innem ekar kiil mejen ainbat eo im likūt ioon drekā ko rebwil.

Baam̧le painier eo rekar kuk ippān doon im jepooļ ainbat eo ej ped ilo kijeek eo.

Jane im baam̧le eo an rekar bar jar juon alen. Ekar ļōmņak kōn bwebwenato in Jisōs Kraist ilo jeje ko rekwojarjar, ke E ekar najidik ļalem taujin kōn wōt jejjo pilawe im ek. Ekar jeļā bwe Jemedwōj Ilan̄ emaron̄ kar bar jipan̄ er.

Ālkin jidik iien emootļo̧k, Jinen ekar kadikdik an kōpeļļo̧ke ainbat eo. Ekar obrak kōn m̧ōn̄ā. Ekar kanoojin lōn̄ n̄an naajidik aolepen baam̧le eo.

Jane ekar likkuun atabo̧kwij jinen. “Ej juon kabwilōn̄lōn̄!”