Kappukot M̧an̄ke ko

“Whoa!” Ethan ekar ba. “Kwaar ke lo men ņe?”

“Aaet, lale teeļ jidikdik eņ an em̧m̧an” Lily ekar ba.

Boston ekar reilōn̄ļo̧k, ak ekar loe wōt annan̄ ko.

“Em̧ōj am̧ kadede loi m̧an̄ke ko jilu rainin!” Ethan ekar ba.

Ak Boston ekar jab lo jabdewōt men! Baam̧le eo an ekar loļo̧k juon bukwin wōjke n̄an lale m̧an̄ke ko raawia. Ak m̧an̄ke ko rekar lukkuun ettoļo̧k jān Boston n̄an an loi.

Boston ekar pilo. Ekar maron̄ wōt loe men ko rekar epaake e. Eiten aolep iien, ekar jab watōke an maron̄ pilo. Ekar maron̄ kōm̧m̧ani wōt elōn̄ men ko rekaitok limo. Emaron̄ riiti Braille ko kōn addiin pein im etetal kōn jokwōņ eo an ilo marok. Im emaron̄ in lo armej ro jān an ron̄jake ainikieer.

Ak jet iien, Boston ekar jab kōņaan bwe en pilo. Āinwōt rainin.

Boston ekar jijet ioon laļ im kakkije. Ejjab jim̧we! ekar ļōmņak.

Jejjo minit tokālik ekar wōr juon an ļōmņak. Jemedwōj Ilan̄, jouj jipan̄ bwe juon m̧an̄ke en itok epaake eō bwe in loe, Boston ekar jar ilo ļōmņak eo an.

Boston ekar jab maron̄ lo jabdewōt m̧an̄ke. Innām ekar ron̄ juon ainikien jān ijo ettoļo̧k.

“Kwoj ron̄ ke men eņ?” Boston ekar kajjitōk. “Ij ļōmņak ekar juon m̧an̄ke!”

“Ikar jab ron̄ jabdewōt men,” Ethan ekar ba.

“Barāinwōt n̄a,” Baba ekar ba. “Em̧m̧an lo̧jiln̄im̧!”

Boston ekar ron̄ an juon m̧an̄ke ettōr jān ibuļōn wōjke ko itōrerāein iaļ eo. Ekar jitōn̄ļo̧k ainikien eo. “Ijuweeo!”

Innām ekar ron̄ bar juon, im bar juon. Jet iien baam̧le eo an remaron̄ loe m̧an̄ke ko ejja iien eo ekar jitōn̄ļo̧k er. Ak ejjeļo̧k m̧an̄ke ekar maron̄ epaakeļo̧k e bwe en maron̄ loe.

Im ekar iien rool n̄an m̧weo.

“Joļo̧k aō bōd bwe kwaar jab elolo m̧an̄ke,” Jinen ekar ba ke rej etal n̄an wa eo.

Boston ekar lelōn̄ļo̧k aeran. “Em̧m̧an wōt. Ikar kōņaan loe juon, ijjelo̧kin, ikar maron̄ ron̄ ainikien elōn̄ iaer.” Innem ekar ļōmņak kōn jar eo an. “Ekar kakeememej eō kōn Jetōb Kwojarjar eo.”

“Ta meļeļe in am̧ ba?” M̧am̧a eaar kajjitōk.

“Ke ikar bōjrak in ron̄jake, ikar kile bwe rekar aolep pād ipeļaakū. Imaron̄ kar ron̄ ainikieer men̄e ikar jab maron̄ lo er. Āinwōt aō ron̄jake Jetōb Kwojarjar eo n̄e ij ron̄jake.”

“Ekar juon katak em̧m̧an,” Jinen ekar ba.

Boston ekar ron̄ juon men ilo bukwin wōjke ko iturin. Innām juon men ekar ettōr ioon iaļ eo— im̧aan mejān! Ekar būrōrō kolin bōran im aetok teeļ eo an. Ekar bōjrak im reilo̧k n̄an e. Innām ekar ettōr ļo̧k n̄an bar wōjke ko.

Juon m̧an̄ke! Ekar maron̄ loe juon āliktata!

Boston ekar ettōn̄ dikdik. Ilo an kar pilo ekar pen jet iien. Ak rainin, ekar jipan̄e ekkatak kōn Jetōb Kwojarjar eo. Im bwe ekar lukkuun em̧m̧an.

Kōmeļeļe jān Alyssa Gonzalez