En̄jake Būrom̧ōj

Savannah ekar pinej bōraņ kōn būļan̄kōj eo. Rainin ekar juon raan enana.

Ilo jikuuļ rainin, Savannah ekar jab em̧m̧an an ļōmņak kōn jabdewōt men. Ekar m̧ōk, kūtōtō, im būrom̧ōj. Ekar abņōņō lo̧jeen im ekar jab jako. Ilo jem̧ļo̧kin raan eo, men eo wōt ekar kōņaan kōm̧m̧ane ej rum̧ļo̧k ium̧win tābōļ eo an im kitileekek.

Kiiō, Savannah ej būrom̧ōj aolep iien. Ro m̧ōttan rekar kajjeon̄ kam̧ōņōņōiki, ak jet iien Savannah ejjab kōņaan ped ippāer. Aolep iien rej m̧ōņōņō. Jet iien ej ļōmņak renej m̧ōņōņōļo̧k wōt ilo an jab ped ippāer.

Ta eo enana ippa? Savannah ekar ļōmņak. Etke ijjab maron̄ m̧ōņōņō āinwōt aolep?

Ekar en̄jake m̧oļo im ajimakeke āinwōt n̄e ekilmeej kōdo ko nam̧ōj. Im kiiō ekōņaan wōt kiki.

Savannah ekar ron̄ an kōjem in ruum̧ eo an peļļo̧k.

“Savannah,” M̧am̧a ekar ba, jijet ilo jabōn biton̄ eo, “eita?”

“Ejjeļo̧k,” Savannah ekar ba. “Im̧ōk.”

“Kwoj m̧ool ke?” M̧am̧a eaar kajjitōk. “Ij inepata kake eok.”

“Em̧m̧an aō mour,” Savannah ekar ba.

“Ekwe em̧m̧an.” M̧am̧a ekar jutak. “Kemeemej bwe komaron̄ kenaan n̄an eō kōn aolep men. Ij iakwe eok.”

Savannah ekar ped wōt ilo jikin kiki eo an m̧ae iien kejota. Bon̄in eo, ekar jaje kiki. Kōmelāij eo an ekar jab bōjrak jān an ļōmņak kōn aolep men.

Raan eo tok juon ekar en̄jaan an likkuun m̧ōk. Ekar bar juon raan aitok. Savannah ekar ro̧o̧l n̄an m̧weo jān jikin jikuuļ im jijet ioon tābōļ in m̧ōn̄ā eo. Ekar bōk kūtuwōn im erreinam̧ōjļo̧k ilo wūņto eo. Ekar bar snow.

“Savannah?”

Savannah ekar bōk bōran im ilbōk ke ej loe an Jibūn dreļo̧n̄tok ruum̧ eo.

“Iakwe, Būbū,” Savannah ekar ba. “Kwoj ita ijin?”

Būbū ekar jijet laļļo̧k. “Jinōm̧ ekar kōņaan bwe in itok,” ekar ba. “Ij inepata kake eok.”

“Eļap wōt aō m̧ōk. Ak, em̧m̧an aō mour,” Savannah ekar ba.

Būbū ekar mejen ettōn̄dikdik. “Ikar ke jiron̄ eok kōn summer eo kom̧ro Jim̧m̧a ekar em̧m̧akūt?”

“Iba wōt,” Savannah ekar ba.

“Ekar kabūrom̧ōjm̧ōj aolep iien,” Būbū ekar ba. “Ikar kōņaan m̧ōņōņō, bōtaab ikar jab kea kōn aolep men. Ikar en̄jake ajimakeke.”

“Ak Jim̧m̧a im m̧am̧a rekar ped ippōm̧.” Savannah ekar kalimjek laļļo̧k juuj ko an. “Etke komaron̄ kar en̄jake ajimakeke?”

“Ikar jab likkuun jeļā ta eo ekar waļo̧k,” Būbū ekar ba. “Ikar jab en̄jake jekjek in kar m̧okta. Āliktata ikar jibadōkļo̧k taktō eo.”

“Ta eo ear waļo̧k?”

Būbū kar bo̧kwij eō. “Ikar ekkatak bwe ikar nan̄inmej in depression.”

“O, im kwar en̄jake būrom̧ōj?” Savannah ekar kajjitōk.

“Jaab, depression eļapļo̧k jān wōt en̄jake būrom̧ōj,” Būbū ekar ba. “Būrom̧ōj eo aō ekar jab jakoļo̧k. Ikar apan̄ n̄an kōm̧m̧ane aolep men ko ekkā aō kōm̧m̧ani. Im ekar pen aō iaieo ippān armej ro jet, em̧ool bar ippān baam̧le eo aō make. Ikar aikuj jipan̄.”

Savannah ekar erreilōn̄ļo̧k. “Kain jipan̄ rōt?”

“Taktō eo ekar kōmeļeļeik ta eo ekar jab jim̧we, im kom̧ro ekar kōm̧m̧ane juon pepe ippān doon n̄an jipan̄ eō kōkm̧anm̧anļo̧k aō en̄jake,” Būbū ekar ba. “Bōtaab jet iien ikar baj wōt būrom̧ōj. Ikar joļo̧k eļap iien ilo jar. N̄e ij en̄jake ajimakeke, ij pijaikiļo̧k an Rilo̧mo̧o̧r jijet itūrū. Ekar em̧m̧anļo̧k aō mour ilo aō ļōmņak kake E.”

Savannah ekar kalimjekļo̧k snow eo nam̧ōj im wūdiddid. “Eļap aō bar būrom̧ōj. Ij kajjeon̄ m̧ōņōņō, ak jet iien ijjab maron̄, innem kiiō ij illu ippa make kōn aō en̄jake jekjek eo.”

“ijeļa, būbū.” Būbū ekar atabo̧kwij Savannah. “Endeņe aō bar en̄jake jet iien. Ak kojjab make iaam̧. Ij iakwe eok, jinōm̧ im jem̧ōm̧ rej iakwe eok, im Jemedwōj Ilan̄ im Jisōs Kraist rej iakwe eok. Remeļeļe kōn metak eo am̧ im jāmin naaj kōtļo̧k eok.”

Bōlen Būbū ejim̧we, Savannah ekar ļōmņak. Ijjab make iaō. Eddo eo ilo lo̧jeen Savannah ekar jab kiiō eddo āinwōt kar m̧okta.

“Ij ļōmņak ij aikuj ekōņono n̄an M̧am̧a,” Savannah ekar ba. “Ekōnaan bar jipan̄ eō.”

“Ej juon itia em̧m̧an!” Būbū ekar bōk pein Savannah.

Savannah ekar mejen ettōn̄dikdik im babuļo̧k aeran Būbū. Ekar jab kiiō pieo im ajimakeke.

Kōmeļeļe ko jān Mariona Cabassa