Kakahoyan sa Kasadpan

Ang Kakahoyan sa Kasadpan [West Grove] nakamugna og balik og gamayng hut-ong sa mga kahoy diha gayod dapit sa bungtod gikan sa Templo sa Nauvoo. Usa kini sa daghang luna nga kamitingan sa gawas diin ang mga Santos sa Ulahing mga Adlaw magpundok sa pagsimba niadtong mga 1840. Niining malinawon nga dapit sa gawas, si Joseph Smith ug ang ubang mga lider mitudlo sa mga nanambong sa mga kamatuoran sa gipahiuli nga ebanghelyo ni Jesukristo.

Ang makasaysayanong mga asoy naghisgot og labing menos duha ka kakahoyan o gamayng hut-ong sa mga kahoy duol sa Templo sa Nauvoo. Ang usa direktang anaa sa sidlakang bahin sa luna sa bilding, ug ang usa naa sa kasadpan. Ang mga rekord sa miting sa kasagaran motino lamang sa lokasyon isip “gamayng kakahoyan” o “ang kakahoyan” mao nga karon dili klaro kon unsa nga sermon ang nanghitabo og diin nga lokasyon. Sa katuigan human sa 1846, ang mga kahoy gipamutol aron isugnod ug himoong tabla. Pagka-2015, ang mga kahoy sa Kasadpan sa templo gitanom og balik nga magsilbing suplemento sa gitukod og balik nga templo. Mahingkod na ang kadugayon niini inig ka 2039, sa ika-200 nga anibersaryo sa pagkatukod sa Nauvoo.

Sa katuigan sa 1840, Ang mga Santos sa Ulahing mga Adlaw nagdahom nga makagamit sa Templo sa Nauvoo alang sa sinemana nga mga serbisyo sa pagsimba, mga serbisyo alang sa mga paglubong, ug ubang mga relihiyosong katigoman, sama sa ilang gihimo sa una didto sa Kirtland, Ohio. Samtang ang templo gitrabaho pa, adto sila mag-abot sa mga balay, mga publiko nga mga bilding, o sa gawas ilawom sa landong mga kahoy. Usa ka halandomong sermon nahitabo sa Kakahoyan sa Kasadpan niadtong Agosto 31, 1842, atol sa usa ka miting sa Relief Society sa mga Babaye sa Nauvoo. Niana nga okasyon, si Joseph Smith mipasabot sa mga sister sa Simbahan nga nakadawat siya og pipila ka bag-ong panabot pinaagi sa pagpadayag mahitungod sa puli [proxy] nga pagpabunyag alang sa patay nang mga katigulangan. Mga adlaw human niadto, ang propeta misulat sa mga pagpadayag alang sa tibuok Simbahan.

Unsay Malaoman

Ang Kakahoyan sa Kasadpan sa kasamtangan dili bukas alang sa mga bisita. Matan-aw kini gikan sa Edward ug Ann Hunter nga Panimalay, nga naglakip sa mahubad nga timailhan. Matan-aw usab kini gikan sa layo kon magbiyahe paubos sa Mulholland Street.