Panimalay nila ni Edward ug Ann Hunter

Samtang nagpuyo sa ilang panimalay, ang mga Hunter nagserbisyo sulod sa komunidad sa Nauvoo nga adunay pakigsaad ug napanalanginan nga makakita sa siyudad sa templo ug sa ilang pamilya nga milambo. Si Ann mipasakop sa Relief Society sa mga Babaye sa Nauvoo niadtong Agosto 1843. Pagka-Nobyembre 1844, si Edward gitawag nga moserbisyo isip Bishop sa Nauvoo 5th Ward, nga naglakip sa mga katungdanan sama sa pagtabang nga maorganisar ang paggahin sa ikapulo nga trabaho [labor tithing] aron sa pagtukod sa templo ug pagkolekta og mga halad sa puasa nga ipang-apod-apod ngadto sa bag-ong nangabot nga mga imigrante ug ubang mga panginahanglan. Nianang mao gihapon nga tuig, si Ann nanganak sa bugtong anak sa magtiayon, si Ann.

Ang pamilyang Hunter nagpuyo niini nga panimalay sukad sa 1842 hangtod sa 1846. Si Edward ug Ann Hunter nakabig sa Ang Simbahan ni Jesukristo sa mga Santos sa Ulahing mga Adlaw niadtong 1840. Dayon gibaligya nila ang ilang malamboon nga uma sa lalawigan sa Chester, Pennsylvania, mihimo og mga kasabotan nga usbon kini nga panimalay sa dili pa sila moabot, ug mitabang sa ubang miyembro sa Simbahan gikan sa ilang lokal nga branch, lakip ang pamilyang Gheen, sa pagsunod sa mapanagnaong panawagan nga magpundok sa Nauvoo.

Sa ting-init sa 1842, si Joseph Smith mitago sa Panimalay sa Hunter aron malikay sa mga kadagkoan sa militar [marshal] nga misulod sa Nauvoo sa tuyo nga arestohon siya ug dad-on siya og balik sa Missouri. Samtang nagtagotago, si Joseph nagpadayon sa iyang mga tahas isip propeta ug lider, namulong sa balaanong pagpadayag ngadto sa mga miyembro sa Simbahan pinaagi sa mga sulat. Niini nga panimalay, gidiktar niya ang duha ka sulat nga may kalabotan sa ordinansa sa templo nga nahibaloan isip bunyag alang sa mga patay na, nga ang mga porsiyon niini karon makita sa mga seksiyon 127 ug 128 sa Doktrina ug mga Pakigsaad.

Basaha ang mahitungod sa paglikay ni Joseph Smith sa dili makiangayong mga legal nga aksiyon, lakip sa panahon sa iyang pagtago-tago didto sa Panimalay ni Edward ug Ann Hunter diin didto nakadawat siya og mga pagpadayag bahin sa mga bunyag alang sa mga patay nga anaa sa Mga Santos, Volume 1, Kapitulo 39.

Unsay Malaoman

Ang paglibot sa Panimalay sa mga Hunter mao ang paglibot sa tulo ka kwarto nga adunay tiggiya nga maglakip sa sala, opisina, ug pangting-init nga kusina. Human makalibot sa panimalay, ang mga misyonaryo moadto ubos sa bungtod sa Panimalay sa Gheen aron taposon ang paglibot sa Siyudad sa Temple.

360° nga Pag-aninaw sa Tibuok Palibot