Siyudad sa Templo

Sa mao gihapon nga pagpadayag diin ang Ginoo mitawag sa Nauvoo nga “tukoranan nga bato sa Zion,” Gisugo usab Niya ang mga Santos sa pagtukod og templo aron Iyang mapahiuli “ang kahingpitan sa pagkapari” (tan-awa sa Doktrina ug mga Pakigsaad 124:2, 26–28). Pinaagi ni Propeta Joseph Smith, ang Dios dayon mipadayag sa mga ordinansa sa templo didto sa Nauvoo, lakip ang mga pagbunyag alang sa patay, ang seremonya sa pagtuga, ug mga pagselyo sa kaminyoon. Kini nga mga ordinansa sa kataposan gipahigayon sulod sa Templo sa Nauvoo, ang sentro nga espirituhanong dapit sa siyudad.
Ang makasaysayanong Siyudad sa Templo usa ka hut-ong sa mga bilding ug mga talan-awon nga naghatag og panglantaw sa mga pagpadayag, disenyo, pagkatukod, ug mga relihiyosong mga buhat sa orihinal nga Templo sa Nauvoo. Nagpakita kini og mga butang nga gipanag-iya sa usa ka arkitekto, sa usa ka tigkulit og bato, sa usa ka bishop, ug usa ka mag-uuma nga nahimutang sa amihanang kasadpan sa Templo sa Nauvoo Illinois, usa ka pagtukod og usab (nga nakompleto pagka 2002) sa mga 1840 nga templo nga sa makausa nagbarog sa mao gihapon nga dapit. Kining duha ka napahiuli nga mga luna nagtabang nga masaysay ang sugilanon bahin sa balay sa Ginoo—ang labing importanteng kalamposan gikan sa mga 1840.

Si William ug Caroline Weeks kauban sa liboan ka mga Santos nga nagpundok sa pagtukod sa Nauvoo isip usa ka siyudad sa templo. Si William Weeks, ang ingon og batan-ong tigdisenyo ug magtutukod gikan sa Massachusetts, nakadiskobre sa gipahiuli nga ebanghelyo samtang usa ka estudyante ug mibalhin sa Nauvoo niadtong 1839, diin iyang nahimamat ug giminyoan si Caroline Allen. Naghimo sila og ilang panimalay sa Nauvoo, niadtong 1841, nga naglakip sa usa ka opisina tupad sa sala.

Sunod sa Enero 19, 1841, nga pagpadayag (Doktrina ug mga Pakigsaad 124) nga nanawagan alang sa pagtukod og usa ka balay sa Ginoo nga tukoron sa Nauvoo, mihangyo si Joseph Smith og mga isumiter nga mga disenyo alang sa Templo sa Nauvoo. Sa pagrebyo sa mga gisugyot ni William nga mga disenyo, miingon si Joseph, “Ikaw ang tawo nga akong gipangita.”¹ Dinhi sa studio sa panimalay sa Weeks, si William ug Joseph nagtrabaho sa mga disenyo sa templo. Ang proseso mikabat og dul-an sa duha ka tuig ug adunay daghang rebisyon nga gihimo sa wala pa mohaom sa kataposan ang gisugyot nga disenyo ni William sa panan-awon ni Joseph Smith alang sa templo.

Samtang ang pagtrabaho sa disenyo alang sa templo gihimo dinhi niini nga balay, si Caroline Weeks namatyan og duha ka batan-ong mga anak tungod sa mga sakit, lakip ni Laura, nga namatay tulo ka bulan sa wala pa siya magsaulog sa iyang adlawng natawhan. Sa iya untang 10 ka anak, 3 ra ang nakalabang sa pagkabata. Kining labihan ka makasubong mga hitabo sa kinabuhi tingali nahupay og gamay pinaagi sa tataw nga doktrina sa mga pagpasilyo sa templo ug sa mahangturong mga pamilya.

Usa sa silingan ni Caroline misulat bahin niining makapalaom nga mga doktrina kabahin sa human sa kinabuhi taliwala sa personal nga pagkawala sa mga sakop sa iyang pamilya. Niadtong 1844, si Eliza R. Snow mibalhin kauban ni Stephen ug Hannah Markham sa kasadpang bahin lang sa panimalay sa Weeks. Pagka-Oktubre nianang mao gihapon nga tuig, misulat si Eliza og usa ka balak nga giulohan og “Alang sa Akong Langitnong Amahan” sa pagbangotan sa pagkamatay sa iyang amahan. Ang maong balak sukad niana nahimong matahom nga himno nga giulohan og “O Amahan ko” nga naghisgot bahin sa mahangtorong mga pamilya ug naghatag sa kaseguroan nga ang kamatayon dili maoy kataposan sa atong kinabuhi.

Bisan og wala pa mahuman ni William Weeks ug ni Joseph Smith ang mga plano, gisugdan na sa mga Santos sa Ulahing mga Adlaw ang pagtukod sa templo. Usa ka modernong Pabilyon nga Ginama sa mga Bato sa Templo karon nagbarog sa kanhi luna ni William ug Elizabeth Jones. Ang teksto ug mga himan nagpakita sa hago kaayo nga proseso sa pagkubkob, pagporma, ug pagpahimutang sa bato aron matukod ang Templo sa Nauvoo. Isip usa ka hanas nga tigtabas og mga bato, si William Jones mihulma sa unang sihag nga bato [moonstone] alang sa Templo sa Nauvoo. Ang iyang asawa, si Elizabeth Jones, usa sa nag-unang miyembro sa Relief Society sa mga Babaye sa Nauvoo. Mibiyahe siya ngadto sa hilit nga mga siyudad aron makatigom og mga pundo alang sa pagtukod sa templo.

Ang mosunod nga hinulagway nga mga slide maghatag kanimog ideya sa dako kaayong trabaho sa pagproseso sa walay pormang mga bato sa dili pa kini ipahimutang sa mga bongbong sa templo. Ang pagkubkob, paghakot, pagpikas, pagputol, pagkulit, paghuman, ug pagpahimutang ipasabot kay may kalabotan kini sa pagtukod sa templo, lakip ang mga paghulagway sa mga himan nga gigamit.

Si Edward ug Ann Hunter mga kinabig gikan sa Lalawigan sa Chester, Pennsylvania, dili layo sa Philadelphia. Human sila nagpasakop sa Simbahan, ilang gibaligya ang ilang malamboon nga umahan ug gitabangan ang kadaghanan sa ilang branch sa Simbahan—lakip ang pamilyang Gheen, kinsa atong makaila unya—sa pagbalhin ngadto sa Nauvoo. Ang mga Hunter nakigkontrata nga magpatukod og nindot, dako nga balay sa dili pa mobalhin ang ilang pamilya sa Illinois.

Didto sa Panimalay sa mga Hunter niadtong ting-init sa 1842, mitago si Joseph Smith aron makalikay sa mga marshal [kadagkoan sa militar] nga misulod sa Nauvoo sa tuyo nga dakpon siya ug dad-on siya balik sa Missouri.² Mao kadtong panahon nga temporaryo siyang mipuyo didto nga gisulat ni Joseph ang pipila ka dugang nga mga instruksiyon mahitungod sa doktrina ug ang buhat sa mga pagbunyag alang sa mga patay. Kadto nga mga instruksiyon gibutang sa duha ka sulat alang sa mga Santos sa Ulahing mga Adlaw. Makita kini karon sa Doktrina ug mga Pakigsaad isip mga seksiyon 127 ug 128.

Niadtong 1844 si Edward Hunter gitawag nga moserbisyo isip bishop sa Nauvoo 5th Ward.³ Isip usa ka bishop, si Edward adunay mga responsibilidad sa pagdawat og mga donasyon sa ikapulo ug pag-atiman niadtong nanginahanglan pinaagi sa pagpundok ug pag-apod-apod sa mga halad sa puasa. Ang pipila niini nga mga donasyon alang ra gayod sa templo. Samtang nagpaabot ang mga tawo sa pagpahinungod sa templo, daghan ang nagdala sa ilang nindot nga mga alpombra, seramika, mga lamesa, ug mga lingkoranan aron itabang sa pagsangkap sa bilding.

Si Bishop Hunter mitabang usab sa pag-organisar og ikapulo nga trabaho. Ang ikapulo nga trabaho mao ang pagdonar sa mga trabahante og usa ka adlaw nga tingtrabaho sa matag napulo ka adlaw alang sa pagtukod sa templo. Gitudloan ni Joseph Smith ang mga tawo nga kadtong miamot sa ilang panahon ug kwarta irekomendar nga unang makasulod sa templo. Sa Simbahan karon, ang mga bishop motabang sa pagpirma sa mga rekomend sa mga indibidwal aron makasulod sa templo. Niadtong 1846, ang rekord sa ikapulo maoy usa ka paagi nga ang mga tawo makakuha og rekomend sa pagsulod sa Templo sa Nauvoo.

Sama sa daghan pang uban sa Nauvoo, si William ug Esther Gheen mipunting dayon sa ilang mga panan-aw ngadto sa templo dihang nangabot sila sa Nauvoo. Sa ilang pag-abot niadtong 1842, maayo na ang pagkahan-ay sa mga plano ug pagtukod sa templo. Mipalit sila og hapit katunga sa ektarya nga yuta gikan ni Joseph Smith didto dapit ubos sa bungtod gikan sa luna sa templo ug mitukod sa ilang balay nga nag-atubang kon diin gitukod ang templo. Mitabang si William Gheen sa pagtukod sa templo pinaagi sa pagtrabaho ug sa paghatag og ubay-ubay nga donasyon. Sa pagkatinuod, ang mga rekord sa ikapulo nagpakita nga niadtong Disyembre 1844, si William Gheen mibayad sa iyang ikapulo pinaagi sa pagbahin sa iyang hapit sa tunga ka ektaryang yuta ug sa pagdonar sa kasadpan nga katunga ngadto sa Simbahan.

Samtang gipanday pa ang templo, ang bunyaganan gipahinungod alang sa buhat sa mga bunyag alang sa mga patay. Niadtong 1843, si William ug Esther Gheen miadto og kaduha niini nga bunyaganan ug gibunyagan alang sa mga sakop sa pamilya kinsa namatay sa wala pa sila makadawat sa gipahiuli nga ebanghelyo ni Jesukristo.

Mipauli si William Gheen gikan sa usa ka misyon sa tingpamulak niadtong 1845 ug nagkasakit sa wala madugay human niadto. Niadtong Hulyo 15, 1845, namatay si William Gheen didto sa kaugalingon niyang panimalay. Sa iyang lubong, gihinumdoman si William isip tawo nga “nakalahotay sa reputasyon sa usa ka matinud-anong santos hangtod sa kamatayon.”⁴ Si Esther Gheen nagpabiling matinud-anon. Niadtong Pebrero 2, 1846, mga unom ka bulan human namatay ang iyang bana, si William, naselyo si Esther ngadto ni William pinaagi sa proxy didto sa Templo sa Nauvoo. Pinaagi niini nga pagselyo, milantaw siya lapas sa temporal nga kamatayon ug nakita ang umaabot uban sa iyang bana sa kahangtoran. Kini ug ang ubang susama nga ordinansa nakatuman sa katuyoan sa pagtukod sa templo—ang mga Gheen nahimong pamilya nga nabugkos sa kahangtoran.

Ang mga pamilyang Weeks, Jones, Hunter, ug Gheen nagrepresentar sa daghang matinud-anong mga miyembro sa Ang Simbahan ni Jesukristo sa mga Santos sa Ulahing mga Adlaw nga nakatampo sa pagpalambo sa Nauvoo ngadto sa usa ka siyudad sa templo ug “tukoranan nga bato sa Zion.” Ang mga panalangin sa templo nga gipadayag isip kabahin niining tukoranan nga bato sa Zion padayong mihiusa sa mga pamilya hangtod karon ug sa tibuok kalibotan.