Templo sa Nauvoo: Kalamboan sa mga Ordinansa sa Templo

Abril 6, 1841, ang ika-onse nga anibersaryo sa pag-organisar sa Simbahan, usa ka adlaw sa kahinam, pagsaulog, ug pagpasalamat sa Nauvoo ug sa naglibot nga dapit. Ang adlaw gisugdan og usa ka parada sa mga Santos nga mga sakop sa militar gikan sa pamuy-anan sa duha ka habig sa Mississippi River. Mimartsa sila sa dinungan nga paglihok ngadto sa mga nataran sa templo, diin didto nakig-uban sila sa 10,000 ka mga Santos ug mga higala kinsa miadto aron mosaksi sa pagpahimutang sa tukoranan nga bato sa templo. Ang miting gisugdan og pag-ampo ug pagpanganta, sa wala pa ihatag ni Sidney Rigdon ang makapadasig nga sermon.¹ Nagkapundok sila, miingon si Rigdon, “sa pagtuman sa mando sa Ginoo sa kahimayaan” sa pagtukod og templo sumala sa plano nga gihatag pinaagi sa pagpadayag. Human sa wali, gipahimutang ang upat ka tukoranan nga bato ug paglitok ni Joseph Smith sa usa ka panalangin nga unta sila “magpabilin hangtod nga ang tibuok estraktura [sa templo] makompleto … “aron ang mga Santos adunay dapit sa pagsimba sa Dios, ug ang Anak sa Tawo adunay dapit nga kapahulayan sa iyang ulo.”²

Ang konstruksiyon sa usa ka templo sa Nauvoo gisunod sa sundanan nga giestablisar sa mga komunidad nga gitukod sa mga Santos sa una didto sa Ohio ug Missouri. Dihang gisugo sa Ginoo ang mga Santos sa pagpundok ngadto sa Ohio niadtong 1831, misaad Siya nga hatagan sila sa Iyang balaod ug nga sila “pagatugahan uban sa gahom nga gikan sa kahitas-an” (Doktrina ug mga Pakigsaad 38:32). Dihang ang nag-unang mga Santos nagkapundok didto sa Kirtland, Ohio, ang Ginoo misugo kanila sa “pagtukod og balay … sa Dios” diin didto matudloan sila sa ebanghelyo, ug diin ang mga ordinansa ikapahigayon (tan-awa sa Doktrina ug mga Pakigsaad 88; ikompara sa Doktrina ug mga Pakigsaad 109). Tunga-tunga sa 1833 ug 1836, ang mga Santos nagtrabaho nga walay pagkaluya sa pagtukod sa Balay sa Ginoo sa Kirtland; usa ka buluhaton o tahas nga sila walay kahanas ni pinansyal nga kapanguhaan aron ihuman. Bisan sa ilang kakabos, nakatukod sila og labihan katahom nga estraktura nga gidawat sa Ginoo ug diin didto nadawat nila ang dugang pa nga mga yawe sa pagkapari nga magtugot nga mahimo ang pagpahigayon sa gisaad nga mga ordinansa (tan-awa sa Doktrina ug mga Pakigsaad 110). Kini nga mga ordinansa, diin kining tanan ipadayag ug unang mapahigayon sa Nauvoo, naglakip sa mga pagbunyag alang sa mga patay, sa kompleto nga pagtuga, ug sa pagselyo nga ordinansa.

Pagka-Enero 1836, dihang hapit na makompleto ang Kirtland Temple, gipaila ni Joseph Smith ang bag-ong mga ordinansa nga gitawag og “mga paghugas ug mga pagdihog” ngadto sa pundok sa mga lider sa Simbahan sa ikatulong andana sa templo. Atol niining una nga miting, nakadawat si Joseph Smith og pagpadayag nga gipakita kaniya nga kadtong nangamatay nga walay oportunidad nga modawat sa mga ordinansa sa ebanghelyo mahatagan og oportunidad nga makahimo niini sa sunod nga kinabuhi. “Ang tanan nga namatay nga walay kahibalo niini nga ebanghelyo,” ang Ginoo mipasabot nga, unta modawat niini kon sila gitugotan pa sa pagpabilin, mahimo nga manununod sa celestial nga gingharian sa Dios” (Doktrina ug mga Pakigsaad 137:7). Kon unsaon kini sa pagkahitabo ug unsang mga ordinansa ang maghimo niini nga posible, hinoon, nagpabiling dili klaro sa panahon niini nga pagpadayag.

Pagka-Agosto 15, 1840, gihangyo si Joseph Smith nga mamulong sa lubong ni Seymour Brunson. Atol sa iyang sermon, nakita ni Joseph si Jane Neyman, usa ka sister kansang anak nga si Cyrus bag-o lang namatay nga wala pa mabunyagi. Nasayod nga nabalaka si Jane mahitungod ni Cyrus, gibasa ni Joseph ang gikan sa 1 Mga Taga-Corinto 15:29 ug mitudlo nga ang buhi nga mga lalaki ug mga babaye makaapil sa mga ordinansa alang sa ilang patay nang kapamilya ug mga higala. Wala madugay human sa wali, miadto si Jane sa Suba sa Mississippi uban sa usa ka elder sa simbahan ug gibunyagan alang ni Cyrus.³

Dihang nadawat ni Joseph Smith ang pagpadayag nagsugo nga ang usa ka templo kinahanglang tukoron sa Nauvoo, gilakipan kini sa mga instruksiyon nga ang ordinansa sa mga pagbunyag sa mga patay “kalakip sa akong balay” ug misugo nga ang mga Santos maghimo og bunyaganan sulod sa templo alang niini nga katuyoan (tan-awa sa Doktrina ug mga Pakigsaad 124:29–36). Ang dugang nga mga pagpadayag, nga nadawat pagka 1842, dugang nga mipasabot kon sa unsang paagi ang ordinansa ipahigayon ug irekord (Tan-awa sa Doktrina ug mga Pakigsaad 127 ug Doktrina ug mga Pakigsaad 128).

Sulod sa unang mga katuigan sa Simbahan, ang mga Santos nagkugi sa pagtinguha alang sa katumanan sa saad mahitungod sa pagtuga og gahom gikan sa kahitas-an. Bisan og ang kasungian uban sa ilang kasilinganan misangpot sa bayolente nga trahedya, ang mga Santos mihupot sa paglaom nga ang kaluwasan ikahatag ngadto sa tanan pinaagi sa mga ordinansa sa templo. Mga luna alang sa templo gipahinungod sa Independence, Adam-ondi-Ahman, ug sa Far West, Missouri, uban sa panghinaot nga ang gisaad nga dugang nga mga ordinansa ug ang mga paagi sa paghalad og kaluwasan sa tanan ipadayag.

Ang mga paghugas ug mga pagdihog nga gipadayag na ngadto sa mga Santos sa Kirtland maoy mga sinugdanan sa gahom sa pagtuga, hinoon, nasayod si Joseph Smith ug ang mga Santos nga dili kadto kompleto. Human nangabot sa Nauvoo, nanghinaot silang makatukod og laing templo aron makaapil niining mga ordinansa ug makadawat sa bahin nga wala pa ipadayag. Niadtong Enero 1842, wala madugay human nag-abli si Joseph Smith sa iyang tindahan nga adunay nagkadaiyang mga baligya [general store], gisugo niya ang mga sakop sa Korum sa Napulog Duha ka Apostoles sa pag-andam sa ilang kaugalingon nga modawat sa pagtuga.⁴ Pagka-Mayo 4, 1842, gidala ni Joseph Smith ang pinili nga grupo sa mga lider sa Simbahan ngadto sa kwarto sa taas sa iyang tindahan. Didto, sa usa ka espesyal nga miting, gipresentar niya ang kompleto nga pagtuga sa templo nga bag-ohay lang nga gipadayag ngadto niya. Ang seremonya gisugdan sa mga paghugas ug mga pagdihog sama sa mga gipahigayon didto sa Kirtland ug gipadayon pinaagi sa usa ka bag-ong ordinansa diin, nga base sa kasulatan, nagtudlo mahitungod sa pamaagi sa langit ug mitawag sa mga partisipante sa pagsulod sa sagradong mga pakigsaad sa pagpakabuhing matarong ug pagserbisyo sa gingharian sa Dios.⁵

Kini nga ordinansa sa kataposan gipalapdan nga maglakip sa tanang miyembro sa Simbahan—lalaki ug babaye—nga andam nga mosulod sa sagradong mga pakigsaad. Usa ka bersiyon niini nga ordinansa gipahigayon karon sa mga templo sa tibuok kalibotan alang sa mga buhi ug sa mga patay.

Niadtong Abril 3, 1836, si Joseph Smith ug Oliver Cowdery nangadto sa pulpito sa bag-ong gipahinungod nga Templo sa Kirtland ug nangluhod sa pag-ampo.” Human makabarog gikan sa ilang pag-ampo, usa ka panan-awon ang naabli bahin sa Manluluwas nga si Jesukristo kinsa midawat sa templo isip Iyang balay. Si Kristo gisundan dayon sa tulo ka sama sa anghel nga mga bisita nga ang matag usa kanila mihatag sa mga yawe sa pagkapari ngadto ni Joseph ug ni Oliver. Ang ikatulo niining mga bisita, ang propeta sa Daang Tugon nga si Elijah, mitugyan sa yawe nga sa wala madugay gitudlo ni Joseph Smith nga adunay gahom sa pagpahimutang “sa mga selyo sa Melchizedek nga pagkapari sa balay ni Israel.”⁶

Sugod sa 1843, gitudlo ni Joseph Smith nga, sa paggamit niini nga yawe, ang relasyon sa kaminyoon mamahimo nang mahangtoron. Kon “maselyo na,” ang mga pamilya sa mga lalaki ug mga babaye nga maminyo sa ingon niini nga paagi makabaton sa saad nga magkauban sila hangtod sa hangtod. Ang labing una nga mga seremonya sa pagselyo, sama sa pagtuga, gipahigayon sa kwarto sa taas nga andana sa tindahan ni Joseph Smith. Hinuon, karon, kini nga mga kaminyoon ipahigayon sa mga templo lamang alang sa mga buhi ug sa mga patay.