Pulang Tisa nga Tindahan

Agig dugang sa gamit niini isip tindahan nga adunay nagkadaiyang mga baligya, ang Pulang Tisa nga Tindahan ni Joseph Smith mao usab ang punoang buhatan sa Simbahan diha sa Nauvoo gikan niadtong 1842 hangtod sa 1844. Gikan sa iyang ibabaw nga opisina, si Joseph Smith mipahigayon sa gimbuhaton sa Simbahan ug mirekord og pagpadayag. Sa dakong lawak sa ikaduhang andana, ang propeta mipahigayon sa seremonya sa unang pagtuga nga sa kaulahian gipahigayon sa nakompleto nga Nauvoo Temple. Dinhi usab niya giorganisar ang Female Relief Society sa Nauvoo “subay sa sumbanan sa pagkapari.”

Ang Pulang Tisa nga Tindahan gitukod niadtong 1841 ug giablihan alang sa patigayon niadtong Enero 5, 1842. Alang sa misunod nga tulo ka tuig, ang bilding nahimong punoang buhatan sa Simbahan ug nagsilbing usa ka tindahan nga adunay nagkadaiyang mga baligya, dapit abotanan sa komunidad, ug pribado nga luna sa opisina. Si Bishop Newel K. Whitney mipahiluna sa iyang pribadong opisina ug opisina sa ikapulo sa ubos, tupad sa tindahan nga adunay nagkadaiyang mga baligya. Sa taas, si Joseph nagtrabaho sa iyang pribado nga opisina, diin maaninaw ang suba. Tapad sa opisina ni Joseph, miukopar sa halos tibuok nga ikaduhang andana, mao ang dakong lawak tigomanan nga gigamit sa mga panagpundok, mga miting sa konseho, ug mga seremonya. Giguba ang bilding niadtong 1890. Ang kasamtangang istruktura sa bika usa ka pagkapareha (replica) nga giablihan niadtong 1980.

Duha ka dagkong panghitabo ang nahitabo diha sa Pulang Tisa nga Tindahan nga tag-usa ra ka buwan ang lat-ang sa matag usa. Niadtong Marso 17, 1842, sa dakong lawak tigomanan sa taas, giorganisar sa Propeta ang Female Relief Society sa Nauvoo, sa kaulahian nailhan nga Relief Society. Dayon, niadtong Mayo 4, 1842, gipresentar ni Joseph ang unang seremonya sa pagtuga ngadto sa siyam ka kalalakin-an didto sa taas nga andana sa Pulang Tisa nga Tindahan. Sa wala pa mahuman ang templo, si Joseph nakadawat og pagpadayag mahitungod sa importanteng mga ordinansa nga diin sa umaabot ipahigayon sa sulod sa templo. Sa taas nga lawak sa tindahan, mainampingon niyang gihimo ang unsay iyang napanan-awan nga sama sa unsa ang sulod sa templo aron ang mga ordinansa mapahigayon sa murag templo nga kahimtang.

Basaha ang mahitungod sa organisasyon sa Relief Society ug ang pagpahiuli sa mga ordinansa sa templo diha sa Mga Santos, Volume 1, Kapitulo 37.

Ang Red Brick nga Tindahan ni Joseph Smith kanhi gipanag-iya ug gidumala sa Community of Christ isip kabahin sa Makasaysayanong Dapit ni Joseph Smith. Kini gibalhin ngadto sa Makasaysayanong Nauvoo niadtong 2024. Kami mapasalamaton sa pag-amuma sa kanhi nga mga tinugyanan ug sa padayon nga kolaborasyon uban sa Community of Christ ug sa ubang mga kauban.

Unsa ang Mapaabot

Ang mga bisita magsugod sa ilang paglibot didto sa unang andana sa Pulang Tisa nga Tindahan. Ang mga misyonaryo mogiya kanila diha sa tindahan nga dapit sa bilding sa dili pa moadto sa taas. Sa ikaduhang andana ang mga misyonaryo mopakigbahin mahitungod sa pag-organisar sa Relief Society, ang pasiuna sa pagtuga, ug ang pagbalhin sa mga Yawe sa Pagkapari ngadto sa mga bisita samtang sila manglingkod sa lawak sa taas. Dayon ang gilibot nga grupo manggawas naog sa hagdanan ug mopaingon ngadto sa likod (habagatan) nga pultahan.

360° nga Pagsuroy sa Dapit