Sementeryo sa Pamilyang Smith

Ang Sementeryo sa Pamilyang Smith usa ka kataposang pahulayan nga dapit ni Propeta Joseph Smith, sa iyang asawa nga si Emma Hale Smith, sa iyang mga igsoon nga sila si Hyrum, Don Carlos, ug Samuel; sa ilang mga ginikanan sila Lucy Mack Smith ug Joseph Smith Sr.; ug sa lain pang napulog pito ka mga higala ug mga paryente. Ang sementeryo usa ka sagrado nga dapit nga nagpakita sa mga kinabuhi ug mga sakripisyo sa pamilyang Smith, ug sa ilang hugot nga pagtuo sa mahangtorong plano sa kaluwasan sa Ginoo.

Human gipatay si Joseph ug Hyrum didto sa Bilanggoan sa Carthage niadtong Hunyo 27, 1844, ang ilang mga lawas gidala balik sa Nauvoo. Human sila maandam alang sa paglubong, sila gipakita sa publiko diha sa hawanan sa kan-anan sa Balay nga Mansyon, diin ingon ka daghan sa 10,000 ka tawo ang miadto aron sa paghatag sa ilang kataposang pagtahod. Nahadlok nga ang kaaway mopasipala sa lubnganan, ang mga higala sekreto nga milubong sa ilang mga lawas ngadto sa wala mahuman nga silong sa Balay sa Nauvoo. Sa ulahing bahin sa tinglarag o tingtugnaw, ang mga lawas gibalhin, usab sa sekreto, ug gilubong sa gipanag-iya nga Balay sa Umahan sa Pamilyang Smith ilalom sa gamay nga kamalig.

Basaha ang mahitungod sa pagmartir nila ni Joseph ug Hyrum Smith diha sa Mga Santos, Volume 1, Kapitulo 44.

Ang Sementeryo sa Pamilyang Smith usa ka pribado nga sementeryo. Bukas kini sa publiko 24 oras matag adlaw sa usa ka kasinatian nga ikaw ra maoy mogiya sa imong kaugalingong pagsuroy sa pakigtambayayong sa pamilyang Smith. Kami mapasalamaton sa mainampingong pag-amuma sa piniyalan ug sa padayon nga kolaborasyon nga gipakita niini nga pakig-partner.

Unsa ang Mapaabot

Ang Sementeryo sa Pamilyang Smith usa ka giniyahan sa kaugalingong kasinatian. Mahimo kang molibot sa sementeryo ug motan-aw sa mga lapida. Ang sementeryo mainampingong gimonitor ug gimintenar isip usa ka makasaysayanon nga sementeryo. Palihog ayaw hilabti ang nahugno o nabuak nga mga lapida; ang pagbalhin niini mahimong mao ang hinungdan sa dugang kadaot.

360° nga Pagsuroy sa Dapit