Ang Balay sa Nauvoo

Niadtong Hunyo 19, 1841, si Joseph Smith nakadawat og pagpadayag gikan sa Ginoo nagsugo sa Mga Santos sa pagtukod og usa ka dakong balay sak-anan nga gitawag og Balay sa Nauvoo. Ang bilding tukoron unta sa samang higayon nga gitukod ang Balay sa Ginoo (ang Nauvoo Temple) ug gituyo aron makahatag og lugar niadtong moabot sa dapit aron “makapamalandong sa himaya sa Zion” (Doktrina ug mga Pakigsaad 124: 60). Malantaw gikan sa daplin sa sapa, ang Balay sa Nauvoo magrepresentar sa paglaom, kahimsog, kahilwasan, ug kabalaan alang niadtong moabot sa siyudad.

Si Lucien Woodworth midesinyo og usa ka bilding nga dunay duha ka dakong birada, matag usa 36.58 ka metros ang gitas-on, 12.19 ka metros ang gilapdon, ug mosaka ngadto sa 4 ka andana ang gitas-on, kini adunay igo nga lawak aron makapahiluna sa 300 ka bisita. Sila si George Miller, Lyman Wight, John Snyder, ug si Peter Haws miserbisyo isip mga piniyalan sa proyekto, sa pagpangalap og kwarta ug sa pagdumala sa pagtukod. Ang mga lokal nga magpapatigayon ug ang mga miyembro sa Simbahan mipalit og 50-dolyar nga mga stock sa bilding aron makabawi sa gasto. Sa usa ka sinugdanan sa seremonyas niadtong Oktubre 2, 1841, ang pagtukod nagsugod pinaagi sa pagpahiluna sa habagatang-sidlakang bato sa pamag-ang. Dungan nga gitrabaho sa mga tigtukod ang Balay sa Nauvoo ug ang Nauvoo Temple. Miputol sila og kahoy, mikubkob og bato, ug wala magpasuhol alang sa duha ka bilding.

Human sa kamatayon ni Propeta Joseph Smith, si Brigham Young miawhag nga ipadayon ang pagtrabaho. Sa Tinglarag niadtong 1845, klaro na nga dili mahuman ang duha ka bilding sa dili pa mopahawa ang Mga Santos sa siyudad. Ang mga paningkamot gibalhin ngadto sa pagkompleto sa templo nga nagbilin og wala mahuman, duha ka andana nga kabhang sa bato ug anapog nga walay atop. Sugod sa 1867, si Emma Hale Smith ug ang iyang ikaduhang bana, si Lewis Bidamon, mikuha sa mga materyales gikan sa wala mahuman nga bilding ug migamit niini sa pagbuhat og balay sak-anan gikan sa habagatang-kasadpang suok sa Balay sa Nauvoo. Ilang gitawag ang bag-ong bilding nga Daplin sa Sapa nga Mansyon ug midugang og kwadra aron kabutangan sa mga kabayo sa mga bisita. Si Emma mipuyo sa Daplin sa Sapa nga Mansyon sa milabayng 8 ka tuig sa iyang kinabuhi sa wala pa siya mamatay niadtong 1879.

Basaha ang mahitungod sa pamuluy-an sa Nauvoo, ug ang sugo sa Ginoo nga tukoron ang Balay sa Nauvoo diha sa Mga Santos, Volume 1, Kapitulo 35.

Ang Balay sa Nauvoo gipanag-iya ug gidumala sa Community of Christ isip bahin sa Makasaysayanong Dapit ni Joseph Smith. Ang pagkatinugyanan gibalhin ngadto sa Makasaysayanong Nauvoo sa 2024. Kami mapasalamaton sa pag-amuma sa kanhi nga mga tinugyanan ug sa padayon nga kolaborasyon uban sa Community of Christ ug sa ubang mga kauban.

Unsa ang Mapaabot

Isip kabahin sa mas dakong paglibot sa Balay sa Umahan sa Pamilyang Smith, imong maaninaw ang Balay sa Nauvoo gikan sa gawas.