Ang Balay sa Umahan

Human sa dakong kagubot sa ilang kinabuhi sa Ohio ug Missouri, ang Balay sa Umahan sa Pamilyang Smith usa ka luwas nga dangpanan alang sa pamilyang Smith. Dinhi si Propeta Joseph Smith nakadawat og mga pagpadayag ug mitudlo og bag-ong doktrina sa iyang pamilya ug ngadto sa mga miyembro sa Simbahan. Sa ilang bag-ong panimalay, si Joseph migahin og panahon uban sa iyang asawa ug mga anak nagtukod og komportable nga kinabuhi samtang nagpadayon sa iyang trabaho isip usa ka propetikanhong lider.

Si Joseph ug Emma Smith ug ang ilang upat ka anak mibalhin ngadto sa ilang unang pinuy-anan sa Nauvoo niadtong Mayo 10, 1839. Ang duha ka lawak sa trosong kamarote ug ang nakapalibot nga propedad kanhi gipanag-iya sa pamilya ni Kapitan James White, usa sa unang lumulupyo sa maong dapit. Si Joseph Smith Sr. nagpuyo sa usa ka gamay nga lawak nga troso nga gidugang ngadto sa Balay sa Umahan sa wala pa mobalhin sa bag-ong balay tabok sa dalan. Niadtong 1840 ang pamilyang Smith mipadako sa balay, midugang og dakong lawak sa amihanan. Ang panimalay gipadak-an sa kadugayan pinaagi sa pagdugang og laing duha ka andana. Diha sa silong, gitagoan sa usa ka sekretong luna sa ilalom sa hagdanan mao ang usa ka lawak diin si Joseph migahin usahay og panahon sa pagtago gikan sa iyang mga kaaway sa Tinglarag niadtong 1842.

Sa wala madugay human ang mga Smith mibalhin niini nga balay niadtong 1839, ang komunidad sa mga Santos sa dapit nag-atubang og sakit nga mikatap pinaagi sa mga lamok. Tungod kay ang ilang balay mao ang usa sa pipila ka lig-on nga mga estraktura sa lungsod, si Joseph ug Emma midala sa daghang masakiton dinhi. Ilang gibalhin ang ilang pamilya sa gawas ngadto sa usa ka tolda ug gihimong ospital ang ilang balay. Niana nga ting-init, human maayo gikan sa iyang pagkasakit, ang Propeta Joseph migamit sa gahom sa pagkapari sa pag-ayo sa mga Santos kinsa nagkasakit. Sa kaulahian nailhan isip “usa ka adlaw sa gahom sa Dios,” kining milagrosong pag-ayo nagsugod sa Balay sa Umahan sa Pamilyang Smith.

Basaha og dugang ang mahitungod sa adlaw sa pag-ayo sa Nauvoo diha sa Mga Santos, Volume 1, Kapitulo 34.

Ang Balay sa Umahan sa Pamilyang Smith gipanag-iya og gidumala sa Community of Christ isip kabahin sa Makasayayong Dapit ni Joseph Smith. Kini gibalhin ngadto sa Makasaysayanong Nauvoo niadtong 2024. Kami mapasalamaton sa pag-amuma sa kanhi nga mga tinugyanan ug sa padayon nga kolaborasyon uban sa Community of Christ ug sa ubang mga kauban.

Unsa ang Mapaabot

Ang Balay sa Umahan gibisitahan lamang isip kabahin sa dakong paglibot nga naglakip sa Balay nga Mansyon ug sa mga talan-awon sa gawas sa Balay sa Nauvoo. Ang mga bisita mosulod gikan sa habagatan nga bahin sa bilding. Ang tibuok kasinatian molungtad og mga 15 minutos.

360° nga Pagsuroy sa Dapit